"قامشىنىڭ" حات قورجىنىنا وتاندىق ءانشىنى سىناعان ماتەريال كەلىپ ءتۇستى. ۇلت جاناشىرىمىن دەگەن اۆتوردىڭ سىنىن جاريالاي وتىرىپ، سايتىمىزدىڭ ەركىن وي-پىكىر الاڭى ەكەندىگىن ەسكەرتكىمىز كەلەدى. سىنعا ىلىككەن ەكىنشى تاراپ تا وسى قۇقىقتى پايدالانا وتىرىپ، وزىندىك پىكىر-پوزيسياسىن رەداكسيامىزعا جولداسا، جاريالاۋعا دايىنبىز.

"31 ارنادان «I am singer» حالىقارالىق مۋزىكالىق جوباسىن تاماشالاپ ءجۇرمىز. ديماشتىڭ باعىن اشقان بۇل جوباعا بەكەردەن-بەكەر ءبىزدىڭ تاراپ قىزىعۋشىلىق تانىتپادى. نەشە ءتۇرلى كەزەڭدەردەن، سىناقتاردان تۇراتىن بۇل جوبا كورەرمەننىڭ ءىشىن پىستىرمايدى. ءبىراق «ديماشتاي جارىق جۇلدىزدىڭ جارىققا كەلۋىن تاعاتسىزدانا كۇتەمىز» دەپ و باستاعى ماقسات-مۇددەسىن ايقىنداعان ءادىلقازىلاردىڭ كەشەگى اڭگىمەسى قۇلاعىمىزعا تۇرپىدەي ءتيدى.

قاتەلەسپەسەم، 2 ماۋسىمنىڭ 11 ەپيزودى، كوگىلدىر ەكراننان كورسەتىلدى. جوباعا قاتىسۋشى ءادىل احمەتجانوۆ ومىرىندە ساحنادا العاش رەت اعىلشىن تىلىندە ءان شىرقادى (ءوزىنىڭ ايتۋى بويىنشا). حالىقتىڭ سۇيىكتى ءانشىسى ماقپال ءجۇنىسوۆا مەن كەزىندە «سۋپەر ستاردان» تۇلەپ ۇشقان، بۇگىندە قاناتى قاتايعان ماقپال يسابەكوۆا اراسىنداعى ديالوگ ءبىزدىڭ دە ءۇن قاتۋىمىزعا سەبەپ بولدى. بىزدىكى، شوۋ-بيزنەستىڭ «ساپ-سارى جاڭالىقتارىنان» شارشاعان وقىرماننىڭ ودان سايىن جۇيكەسىن جۇقارتىپ، الاۋىزدىق وتىن مازداتۋ ماقسات ەمەس. مۇنداعى ماقسات – بىرىنشىدەن، ۇلكەنگە قۇرمەت، كىشىگە ىزەت كورسەتىلۋىن، ەكىنشىدەن، ۇلتتىق ءبىتىم-بولمىسىمىز بەن قازاقيلىعىمىزدىڭ مەرەيى ۇستەم بولۋىن تالاپ ەتۋ.

«ءان تاڭداۋىڭ جاقسى، الايدا اعىلشىنشا ءان تاڭداعان ەكەنسىڭ، دۇرىستاپ دايىندالىپ، اكسەنتسىز ورىنداۋعا بارىڭدى سالۋىڭ قاجەت ەدى» دەپ پىكىر ايتقان ماقپال يسابەكوۆاعا حالىقتىڭ ماقپالى «اكسەنتتە تۇرعان ەشتەڭە جوق دەپ ويلايمىن. بۇل اعىلشىننىڭ بالاسى ەمەس، قازاق قوي» دەپ  جاۋاپ بەردى. حالىق ءارتىسىنىڭ اۋزىمەن ايتىلعان پىكىر وي ساناسىنا جەتپەگەن جاس ماقپال «مەن بايقاعانىمدى ايتىپ وتىرمىن. جالپى، ايتۋعا قۇقىعىم بار شىعار. ارينە، اكسەنتتە تۇرعان دانەڭە جوق. جارتىلاي ۇيعىر بولسام دا، قازاقشا تاپ-تازا سويلەپ وتىرمىن عوي» دەپ اششى اقيقاتتى جۇرتقا جاريا قىلدى. جارتىلاي ۇيعىر، جارتىلاي قازاق بولعانىنا قاراماستان ەمىن-ەركىن قازاقشا سويلەپ وتىرعانىن ماقتانىش قىلعان ماقپالدىڭ بۇل ويىن جەتكىزۋدەگى ەموسياسى تاكاپپارلىق تۇنىپ تۇرعان بەت-جۇزىنەن اپ-ايقىن كورىنىپ تۇرعانداي بولدى. بۇل ءوز كەزەگىندە قازاق تەليەۆيزياسىنداعى ەتيكا مەن ەستەتيكانىڭ ورنى ويسىراپ تۇرعانىن تاعى دا ءبىر مارتە دالەلدەدى. شەشە تۇرعاندا سويلەيتىن قىزدىڭ كوبەيگەنى قاي زامان!؟ شەشەسىنىڭ كوزىن شۇقيتىن قىزدىڭ قىمسىنباۋى، تەلەجاشىككە تەلمىرىپ وتىرعان اكەسىنىڭ قازاقتىعىنا كۇمان كەلتىرۋى ەندى شەكتەن شىققاندىق. قازاق ءتىلى دەگەندە كوكىرەك كەرگەن قىزىمىزدىڭ سوزىنە زەر سالساق، ماقپال يسابەكوۆا مويىندالماعان 101ء-شى جاڭا ەسىم. اسقار تاۋداي اكەسى قازاق بولا تۇرا، «جارتىلاي ۇيعىرمىن، جارتىلاي ورىسپىن، جارتىلاي كارىسپىن» دەگەندەردىڭ بارلىعىنا وسى مەدالدى مويىندارىنا تاعىپ بەرگىم-اق كەلىپ كەتتى.

ديماش قىتايداعى «I am singer» جوباسىنا قاتىسقان كەزدە تانىمال شەتەل اندەرىن اكسەنتپەن ورىندادى. دەگەنمەن جۇڭگو «اعىلشىنشانى، فرانسۋزشانى اكسەنتپەن ايتادى ەكەن» دەپ باس قاتىرماق تۇگىلى، ءبىر اۋىز ءسوز قوزعامادى دا. تەك ورىنداۋ شەبەرلىگىنە باسا نازار اۋداردى. تالانتىنا تاڭداي قاقتى. اياقتارىنان تىك تۇرىپ، شاپالاعىن اياماي ۇردى. سونىسىمەن دە جۇڭگو كورەرمەنى بارشا الەمدى ءسۇيسىندىردى. اعىلشىنشاسىن بۇگىنگى تاڭدا قولعا العان ديماش الەمدىك ونەر جۇلدىزىنا اينالۋعا دايىن ەكەندىگىن بايقاتتى.

توقسان اۋىز ءسوزدىڭ توبىقتاي ءتۇيىنى – قازاقستاننان شىققان كەز كەلگەن تەلەونىمنىڭ ىرگەتاسى پاتريوتيزم، ۇلتجاندىلىق جانە قازاقى مىنەز بولۋىن مىندەتتەۋ كەرەك".

ءسانيا ساعي قىزى