«نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ استانا قالاسىنداعى الەۋمەتتىك نىسانداردى ارالاپ شىقتى. اشىمبايەۆپەن قوسا رەسپۋبليكالىق قوعامدىق كەڭەس مۇشەلەرى دە ەلورداداعى بەس الەۋمەتتىك باستامانىڭ قالاي جۇزەگە اسىرىلىپ جاتقانىن باقىلاپ قايتتى.

ماۋلەن اشىمبايەۆ پەن كەڭەس مۇشەلەرى الدىمەن ميللەنيۋم ساياباعىنا تابان تىرەدى. پارتيا ءتوراعاسى ورىنباسارىنىڭ بۇل ساپارى دا بەكەر ەمەس. وندا «7-20-25» باعدارلاماسىمەن پاتەرلى بولعان بىرنەشە وتاسى تۇرادى. ولاردىڭ ءبىرى – بالقاش قالاسىنان باس قالاعا كوشىپ بارعان ازامات پەن جانار. ءبىر جىل بويى پاتەردەن پاتەرگە كوشىپ ساندالىپ جۇرگەن جاس وتباسىنىڭ بۇگىندە جەكە پاتەرى بار. ءارى بۇعان سەبەپ – «7-20-25» باعدارلاماسى. ايتۋلارىنشا، اي سايىنعى تولەم جالاقىلارىنان الدەقايدا تومەن.

ماۋلەن اشىمبايەۆ باعدارلاما ارقاسىندا پاتەرلى بولعان وتباسىن قۇتتىقتاپ، استانا قالاسىنىڭ مۇمكىندىكتەرىن اتاپ كورسەتتى.

«استانا – ەلىمىزدىڭ باس قالاسى. تۇرعىنداردىڭ سانى جىل ساناپ ءوسىپ كەلەدى. بۇگىن استانا قالاسىندا 1 ميلليونعا جۋىق ادام تۇرادى. سول سەبەپتى ەلوردادا پاتەر ماسەلەسى وزەكتى. ال مەملەكەت باسشىسىنىڭ 5 الەۋمەتتىك باستاماسى مەن «7-20-25» باعدارلاماسى بۇل ماسەلەنى شەشۋگە كومەكتەسەدى. باعدارلاما ارقاسىندا قازاقستاندىقتار ءۇيلى بولادى دەگەن سەنىمدەمىن. تۇرعىنداردىڭ بارىنشا اتسالىسقانى يگى»، - دەدى ماۋلەن اشىمبايەۆ ءوز سوزىندە.

سونىمەن قاتار، ەلباسىنىڭ باستاماسىمەن جۇزەگە اسىپ جاتقان باعدارلامانىڭ ارقاسىندا قۇرىلىس سالاسى دا دامىپ كەلەدى. بۇل ەكونوميكانىڭ وسۋىنە تىكەلەي اسەر ەتپەك.

 «باسپانا» يپوتەكالىق ۇيىمىنىڭ مالىمەتىنشە، استانا قالاسىندا جىل باسىنان بەرى 840 ءوتىنىش قابىلدانعان. ولاردىڭ 584ء-ى ماقۇلداندى. بۇل رەسپۋبليكا بويىنشا كورسەتكىشتىڭ ۇشتەن ءبىرى عانا.

بۇدان كەيىن استانانى ارالاپ جۇرگەن دەلەگاسيا جولى ءال-قۋات جاتاقحاناسىنا ءتۇستى. جاتاقحانا ەلباسىنىڭ بەس الەۋمەتتىك باستاماسى اياسىندا سالىندى. ءارى ستۋدەنتتەردىڭ ءبىلىم ساپاسىن ارتتىرۋعا ىڭعايلى جاعداي جاسالعان. كومپلەكس ديرەكتورى گۇلجانات ماۋسىمبايەۆانىڭ ايتۋىنشا، جاتاقحانا 2015 جىلى 400 ورىن بولىپ اشىلعان. اۋماعى 5 مىڭ شارشى مەتردى قۇرايدى. جالپى 90 بولمەسى بار جاتاقحانا ىشىندە 150 ورىندى اسحانا مەن 120 ورىندى ءماجىلىس زالى دا بار.

جاتاقحانا جاعدايىمەن تانىسقان پارتيا دەلەگاسياسى استانادا 35 كوللەدجدىڭ بارىن ءبىلدى. جالپى 26 مىڭ ستۋدەنت ءبىلىم الادى ەكەن. ستۋدەنتتەردىڭ 2000-ى جاتاقحانادا تۇرمايدى. EXPO حالىقارالىق كورمەسىنەن كەيىن بۇگىندە قالادا 100-گە جۋىق قوناق ءۇي مەن  9000 ورىندى جاتاقحانا بار.

ۋنيۆەرسيتەتتەر مەن كوللەدجدەردىڭ ءبارىن ەسەپتەگەندە ەلوردادا جالپى سانى 16 مىڭ ستۋدەنت جاتاقحاناعا مۇقتاج. بۇل ماسەلەنى شەشۋ ءۇشىن قالا اكىمدىگى EXPO حالىقارالىق كورمەسىنەن كەيىن قالعان جاتاقحانالاردى ۋاقىتشا پايدالانۋعا بەردى. الايدا بولاشاقتا جاڭا جاتاقحانالار سالىناتىن بولادى.

ءوز كەزەگىندە «نۇر وتان» پارتياسى ءتوراعاسىنىڭ ورىنباسارى ماۋلەن اشىمبايەۆ مۇنداي قادامنىڭ ءتيىمدى ەكەنىن ايتادى.

«جاتاقحانالار ساپالى ءبىلىم الۋ ءۇشىن ءتيىمدى ويلاستىرىلعان جوبا. ستۋدەنتتەردى باسپانامەن قامتاماسىز ەتۋدىڭ بۇل جولى جاقسى ويلاپ تابىلعان. وسى ورايدا ەلباسىمىزدىڭ 5 الەۋمەتتىك باستاماسى قالادا ءساتتى جۇزەگە اسىپ جاتقانىن بايقاۋعا بولادى. ال «نۇر وتان» پارتياسى باستامالاردىڭ جىلدام ءارى ساپالى ورىندالۋى جاعىن قامتاماسىز ەتەتىن بولادى»، - دەدى اشىمبايەۆ.

ساپارى بارىسىندا قالاداعى ۇزدىك ۋنيۆەرسيتەتتەردى دە ارالاپ شىقتى. «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ، سەنات ءتوراعاسى باقىتجان جۇماعۇلوۆ، استانا قالاسىنىڭ اكىمى باقىت سۇلتانوۆ پرەزيدەنتتىڭ بەس الەۋمەتتىك باستاماسىنىڭ جۇزەگە اسىرىلۋى جونىندە جينالىس وتكىزدى.

ماۋلەن اشىمبايەۆ پرەزيدەنت باستامالارىنىڭ استانادا جۇزەگە اسىرىلۋىن جوعارى باعالادى. قالا اكىمى باقىت سۇلتانوۆ ەلوردا بەس الەۋمەتتىك باستامانى ءتيىمدى جۇزەگە اسىرۋعا بەلسەنە كىرىسكەنىن تىلگە تيەك ەتتى. سۇلتانوۆتىڭ ايتۋىنشا، ەلباسىنىڭ باستامالارىن جۇزەگە اسىرۋدا جاستاردىڭ ءرولى ايرىقشا. بۇل جاستاردى استانا تاعدىرىنا ارالاستىرۋعا سەپتىگىن تيگىزەدى.

ايتا كەتەيىك، 5 ناۋرىزدا نۇرسۇلتان نازاربايەۆ پارلامەنتتە 5 الەۋمەتتىك باستامانى جاريالادى. پرەزيدەنت حالىقتى قولجەتىمدى باسپانامەن قامتۋ، سالىق جۇكتەمەسىن ازايتۋ، جوعارى ءبىلىم الۋدىڭ قولجەتىمدىلىگى مەن ساپاسىن ارتتىرۋ، شاعىن نەسيە بەرۋدى كوبەيتۋ جانە ەلدى گازبەن قامتاماسىز ەتۋدى ۇسىندى. اتاپ ايتقاندا، ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ ماقساتىندا ۇلتتىق بانك ارنايى ۇيىم قۇرۋ ارقىلى جاڭا يپوتەكالىق «7-20-25 باعدارلاماسىن» دايىندايتىن بولادى. ونىڭ نەگىزگى شارتى نەسيە ءوسىمىنىڭ مولشەرلەمەسى جىلىنا 7 پروسەنتتەن، باستاپقى جارناسى 20 پروسەنتتەن اسپايتىن بولادى. نەسيە مەرزىمى – 25 جىلعا دەيىن.

ال جالاقىسى تومەن جۇمىسشىلاردىڭ سالىق جۇكتەمەسىن ازايتۋ  ءۇشىن ۇلتتىق ەكونوميكا مينيسترلىگىنە 2019 جىلدىڭ 1 قاڭتارىنان باستاپ، اي سايىن ەڭ تومەنگى ەسەپتىك كورسەتكىشتىڭ 25 ەسەلەنگەن كولەمىنەن از جالاقى الاتىن جۇمىسكەرلەرگە سالىناتىن جەكە تابىس سالىعىنىڭ مولشەرىن 1 پروسەنت ەتۋ تاپسىرىلدى. بۇل رەتتە، سالىقتى ازايتۋدان شىعاتىن قارجىنىڭ ولاردىڭ جالاقىسىن كوبەيتۋگە باعىتتالۋى ءتيىس.

جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ ماسەلەسى دە ەلباسى نازارىندا وسى ورايدا، ءبىلىم جانە عىلىمي مينيسترلىگىنە جاڭا ەكونوميكادا سۇرانىسقا يە مامانداردىڭ قاجەتتىلىگىن تالداۋ نەگىزىندە 2018-2021 وقۋ جىلدارىنا ارنالعان جوعارى جانە جوعارى بىلىمنەن كەيىنگى كادرلاردى دايارلاۋعا مەملەكەتتىك ءبىلىم بەرۋ تاپسىرىسىن بەكىتۋ تۋرالى قاۋلى جوباسىن دايىنداۋ جۇكتەلدى.  سونىمەن قاتار جوعارى ءبىلىم سالاسىنا قوسىمشا 20 مىڭ گرانت ءبولىپ، 2020 جىلدىڭ سوڭىنا دەيىن ەڭ كەمى 75 مىڭ ورىندىق ستۋدەنتتەرگە جاتاقحانا سالۋ كوزدەلىپ وتىر.

سونىمەن قاتار ەلباسى شاعىن جانە ورتا بيزنەس ءۇشىن نەسيە كولەمىن 20 ميلليارد تەڭگەگە ارتتىرۋ باستاماسىن كوتەردى.