بيىل جىل سوڭىنا دەيىن 1500 الماتىلىق سالىمشىلار «نۇرلى جەر» باعدارلاماسى بويىنشا پاتەرگە يە بولماق.

جىلجىمايتىن مۇلىك نارىعىندا تۇرعىن ۇيلەردىڭ 1 شارشى مەترىنىڭ قۇنى 179 مىڭ تەڭگەنى قۇرايدى.

الماتى قالاسىنداعى 1500-عا جۋىق «تۇرعىن ءۇي قۇرىلىس جيناق بانكىنىڭ» سالىمشىلارى جاڭا پاتەرگە يە بولىپ، جاقىن ارادا قونىس تويىن تويلاماق.

بەلگىلى بولعانداي، «نۇرلى جەر» مەملەكەتتىك تۇرعىن ءۇي باعدارلاماسى بويىنشا پاتەرلەر الماتى قالاسىنىڭ الاتاۋ اۋدانىنداعى «سايالى» ىقشاماۋدانىندا «جەرگىلىكتى اتقارۋشى ورگاندار ارقىلى نەسيەلىك تۇرعىن ءۇي سالۋ» باعىتى بويىنشا بوي كوتەرۋدە. تۇرعىن ءۇي كەشەنى بەس قاباتتى جانە كوپپاتەرلى ۇيلەردەن قۇرالادى. پاتەرلەردىڭ اۋدانى 29 شارشى مەتردەن 84 شارشى مەترگە دەيىن جەتەدى.

«بەرىلەتىن تۇرعىن ۇيلەردىڭ 1 شارشى مەترىنىڭ باعاسى 179 000 تەڭگەنى قۇرايدى. بۇل مەگاپوليستەگى نارىقتىق باعادان ەكى ەسە تومەن. قولجەتىمدى باعامەن تۇرعىن ۇيگە قول جەتكىزۋ ءۇشىن دە وزىندىك شارتتاردى ورىنداۋ قاجەت، ەڭ الدىمەن، «تۇرعىن ءۇي قۇرىلىس جيناق بانكىنىڭ» تۇتىنۋشىسى بولۋ قاجەت جانە دەپوزيتتە تۇرعىن ءۇي باعاسىنىڭ، كەمىندە 20 پايىزى بولۋى شارت. نەسيەنىڭ جىلدىق ءوسىمى 5 پايىزدى قۇرايدى. مىسالى، شامامەن 6،3 ميلليون تەڭگە تۇراتىن ءبىر بولمەلى پاتەردى ساتىپ الۋ ءۇشىن، بانك دەپوزيتىندە كەمىندە 1،2 ميلليون تەڭگە قاراجاتىڭىز جيناۋلى بولۋى كەرەك. مۇنداي جاعدايدا اي سايىنعى تولەمنىڭ باعاسى 52 500 تەڭگەنى قۇرايتىن بولادى»، - دەپ مالىمدەدى «تۇرعىن ءۇي قۇرىلىس جيناق بانكىنىڭ» ماماندارى.

قازىرگى ۋاقىتتا بانك 886 پاتەرگە ارنالعان پۋل قۇرىپ، جىل سوڭىنا دەيىن 621 پاتەردى ساتىپ الۋعا وتىنىشتەر قابىلداۋدى جوسپارلاپ وتىر. سونىمەن قاتار، «تۇرعىن ءۇي قۇرىلىس جيناق بانكى» ارقىلى «نۇرلى جەر» باعدارلاماسى بويىنشا ىسكە اسىرىلعان پاتەرلەردىڭ بەرۋىنە التى ۇمىتكەردەن كەلەدى.

«بۇگىنگى تاڭدا «تۇرعىن ءۇي قۇرىلىس جيناق بانكىنىڭ» ونىمدەرى مەن باعدارلامالارى قازاقستاندىقتار اراسىندا ەڭ كوپ سۇرانىسقا يە ءارى تانىمال بولىپ وتىر. اعىمداعى جىلدىڭ توعىز ايىنىڭ قورىتىندىسى بويىنشا، ءبىزدىڭ بانك جالپى قازاقستاندىق يپوتەكالىق نەسيە سوماسىنىڭ 62 پايىزىن بەرگەن. بيىل 26 مىڭعا جۋىق وتباسى، ونىڭ ىشىندە 6 مىڭ قازاقستاندىق «نۇرلى جەر» مەملەكەتتىك باعدارلاماسى بويىنشا پاتەرگە يە بولىپ، قونىس تويىن تويلادى. جانە دە جىلدىڭ سوڭىنا دەيىن الماتى قالاسىنىڭ وزىندە 3000-عا جۋىق تۇرعىن پاتەرگە يە بولىپ، ونىڭ 1500-ى «نۇرلى جەر» مەملەكەتتىك تۇرعىن ءۇي باعدارلاماسى ارقىلى تۇرعىن ۇيگە قول جەتكىزبەك. بۇل كورسەتكىش ەلىمىزدەگى كۇن تارتىبىندە تۇرعان ەڭ ماڭىزدى ماسەلەلەردىڭ ءبىرى – حالىقتى تۇرعىن ۇيمەن قامتاماسىز ەتۋ ماسەلەسىنىڭ وڭ شەشىمىن تاۋىپ جاتقانىنىڭ ايقىن دالەلى بولا الادى»، - دەدى «تۇرعىن ءۇي قۇرىلىس جيناق بانكى» الماتى قالالىق فيليالىنىڭ ديرەكتورى گۇلزات سيمتيكوۆا.

«نۇرلى جەر» مەملەكەتتىك تۇرعىن ءۇي باعدارلاماسى ارقىلى پاتەرلەر 50/50 ءپرينسيپى بويىنشا بەرىلەدى. ياعني، پاتەردىڭ 50 پايىزى اكىمشىلىكتىڭ كەزەگىندە تۇرعان ادامدارعا بەرىلسە، قالعان 50 پايىزى كەزەككە تۇرماعان، الايدا «تۇرعىن ءۇي قۇرىلىس جيناق بانكىندە» دەپوزيتتىك شوت اشتىرعان سالىمشىلارعا بەرىلەدى.

«سونىمەن قاتار، اكىمدىكتىڭ تىزىمىندە تۇرعاندار مەملەكەتتىك تۇرعىن ءۇي باعدارلاماسى ارقىلى پاتەرگە قول جەتكىزۋ ءۇشىن ولاردىڭ دا «تۇرعىن ءۇي قۇرىلىس جيناق بانكىندە» دەپوزيتى بولىپ، سول بانكتىڭ سالىمشىسى بولۋى شارت جانە دە دەپوزيتتە جينالعان قاراجاتى بولۋى كەرەك. سەبەبى، پاتەر بەرۋ مەملەكەتتىك تۇرعىن ءۇي باعدارلاما شەڭبەرىندە تۇرعىن ءۇيدى جەڭىلدىك شارتتارىمەن جۇزەگە اسىرادى جانە دە شارشى مەترگە ۇمىتكەرلەر ءۇشىن ناقتى تالاپتار قويىلعان. ولار: قازاقستان رەسپۋبليكاسىنىڭ ازاماتتىعى نەمەسە ورالمان كۋالىگىنىڭ بولۋى؛ سوڭعى بەس جىلدا قازاقستان رەسپۋبليكاسىنىڭ اۋماعىندا مۇلىكتىك مەنشىكتەن (ءوزىنىڭ جانە ۇنەمى بىرگە تۇراتىن وتباسى مۇشەلەرىنىڭ) تۇرعىن ءۇيى بولماۋى؛ الماتى قالاسىندا كەمىندە ەكى جىل تىركەۋدە بولۋى؛ اي سايىن تولەم جاساۋعا قابىلەتتى بولۋى جانە ونىڭ دالەلدەمەسى»، - دەپ اتاپ ءوتتى «تۇرعىن ءۇي قۇرىلىس جيناق بانكىنىڭ» ماماندارى.