«بۇل جەردە باسقا ەشكىمدى جازالاماۋلارىڭىزدى سۇرانامىن.
مەن بارىنە ءوزىم جاۋاپ بەرەمىن»
ماماديار جاقىپوۆ،
«جەتىسۋ» گازەتىنىڭ 1985-1987 جىلدارداعى باس رەداكتورى
وزگە ەمەس، جاۋاپ بەرەم مەن ءوزىم،
ءتىلىمدى كەس، تۇرمەڭە جاپ، توزەمىن.
كۇنى كەشە «جاڭا الاڭدا» جازىقسىز،
جاستارىما قارۋىڭدى كەزەدىڭ،
شىندىقتى ىزدەپ شىعىپ ەدى، «جاۋ» بولدى ،
... ەندى مەنىڭ كەلگەندەي مە، كەزەگىم؟!.
جەلتوقساندا...جاس تۇنادى جانارعا،
قانشا قىرشىن تاپتالدى ەكەن تاباندا؟!.
ۇل-قىزىمدى يتتەرىڭە تالاتتىڭ،
تەپكىلەتتىڭ ار-ۇياتسىز نادانعا.
سوتقا سۇيرەپ، «يتجەككەنگە» ايداتتىڭ،
... سول ارسىزدىق قول سالماق پا، ماعان دا؟!.
جەلتوقساندا... سول كۇندەردە ىزعارلى،
(كوڭىلدەردە ماڭگى وشپەيتىن سىز قالدى).
ۇل-قىزدارىم الاۋ بولىپ جىلىتتى،
ساقىلداعان سارى ايازدا مۇز-قاردى.
جاستارىمنىڭ جاسىمادى جىگەرى،
... «يلىكتىرسەم» دەپ تۇرسىڭ با، تۇلعامدى؟!.
جەلتوقساندا... سوقتى داۋىل، ءبىر اعىن،
جاراتقاننان ساقتاي كور دەپ سۇرادىم.
قان قاساپتا يىلسە دە، سىنباعان،
جاستارىما ءتاۋبا جاساپ، جىلادىم،
قىزىل-الا قاندى كورىپ، اھ ۇردىم،
... تاعدىرىمنىڭ كۇتەم مەن دە، سىناعىن؟!.
جەلتوقساندا... اۋرە-سارساڭ مىنا جۇرت،
قاس-قاعىمدا ەرلىك، ەزدىك سىنالىپ.
حالقىن سۇيگەن قايراتكەردەن، تەكتىدەن
ىزدەدىڭدەر «حالىق جاۋىن» شىعارىپ.
ءبىر قازاقتى ءبىر قازاققا كۋا عىپ،
... ەندى مەنى جاۋ دەيسىڭ بە، «قۋانىپ»؟!...
«حالىق جاۋى» ... تاڭسىق ەمەس بۇل ۇعىم،
زار زاماندا... سالدى تالاي «قۇرىعىن».
ولار ماعجان، احمەت پەن ءمىرجاقىپ،
ساكەن، يلياس ىرىلەرى ءىرىنىڭ.
كۇنى كەشە اقتالدى سول ارىستار،
... مەن دە ەلىمنىڭ ار-نامىستى ۇلىمىن...
«حالىق جاۋى»... الاشىم دەپ اھ ۇرعان،
تۋعان حالقىن ەل بولۋعا شاقىرعان.
اڭساعانى ازاتتىق ءھام ەركىندىك،
تەڭدىك ىزدەپ ايدالعان ءھام اتىلعان.
كەڭ ولكەمدە كوكبورى – رۋحى جورتىپ ءجۇر،
... جان الساڭ دا، قامالسام دا، باس ۇرمان...
«حالىق جاۋى».... زار زاماننىڭ «امالى»،
(ءدال سول كەزدەي بۇگىن دە جۇرت قارالى).
جەلتوقساندا... جارق ەتتى ءبىر نايزاعاي،
ءدۇر سىلكىنتتى ۇيقىداعى سانانى.
تاياۋ قالدى، تاۋەلسىزدىك تاڭى اتار،
... مەن ارىستان، قۇرساۋداعى جارالى...
ماعجان سىندى كامىل سەنەم جاستارعا،
(الاش اتىن جازادى ەرتەڭ اسپانعا!!!).
شىنىمەن دە ءبىر عاجايىپ كۇي كەشكەم،
«جەتىسۋعا» بۇل سۋرەتتى باسقاندا.
قايمىقپاستان قاسقايىپ تۇر ءتورت باتىر،
...ەرتەڭ اڭىز، جازىلار-اۋ داستان دا...
نازار سالساڭ بەينەلەرگە اڭداپ ءبىر،
اسقاق قاراپ رىسقۇلبەكوۆ قايرات تۇر،
قايسارلىقتى، سەزىنەسىڭ، ورلىكتى،
اتوي سالعان جاسىن – نامىس، اردى – وتكىر.
ولىمنەن دە قايمىقپايدى تىك قاراپ،
... مەنى-داعى ءدال سولارداي جان دەپ ءبىل...
ءار زاماندا ءبىر «سۇرقىلتاي» دەگەن شىن،
ال ازىرشە جاۋاپ الار، «تورەمسىڭ».
ەرتەڭ تاريح تورىنە ەنەر بۇل سۋرەت،
سان ۇرپاققا اسقاق رۋح بەرەر شىن.
جاستارىمنان ارتىق ەمەس «شىبىن جان»،
... «بۇل مايداندا بالا ولگەنشە، شال ءولسىن»...
... ەشكىم دە ەمەس، «كىنالىمىن» جەكە مەن،
قانداي جازا ارقالاتساڭ، كوتەرەم.
ءتورت باتىرىم «جەتىسۋدان» ۇرانداپ،
قۇلاق ءتۇرىپ قارايتىنداي جەتى الەم.
قارسىلىعىم – قارا جۇرەك قوعامعا،
... پەرزەنتتىك پارىزىم بۇل وتەگەن.
تايدىرارسىڭ قىزمەتتەن، ءمانساپتان،
ايىرارسىڭ كاسىبىمنەن نان تاپقان.
تابىلار-اۋ ەكى قولعا ءبىر كۇرەك،
جايلى ورىنعا جان ەمەسپىن ار ساتقان.
تاۋەلسىزدىك قارلىعاشى بۇل سۋرەت،
... سىر شەرتەتىن الماعايىپ سول شاقتان...
ەسىڭدى جي، بۇل بەينەگە ۇڭىلدە،
«قاڭعىپ كەلگەن شۇرەگەيگە» جۇگىنبە.
دۇنيە كەزەك، قاتال ۋاقىت تەزگە الار،
ەرتەڭ جاۋاپ بەرەسىڭ سەن بۇگىنگە.
باتىر ۇلدار ورالادى ەلىنە،
... اقتالارمىز، شىندىق جەڭەر تۇبىندە...
ر.S. «ساياسي قىراعىلىعىنان ايىرىلعان جانە گازەتتە وقىرمانداردىڭ اشۋ-ىزاسىن قوزدىراتىن يدەيالىق زياندى سۋرەتتەردى جاريالاۋعا اپارىپ سوقتىرعان سايازدىق كورسەتكەنى ءۇشىن» دەگەن جالامەن «جەتىسۋ» گازەتىنىڭ باس رەداكتورى م. جاقىپوۆ كپسس مۇشەلىگى قاتارىنان شىعارىلىپ جانە قىزمەتىنەن بوساتىلدى. سول كەزدەگى رەسپۋبليكا باسشىسى كولبيننىڭ نۇسقاۋىنان كەيىن الىپ شاھار الماتىدان جۇمىس تابىلماي، ءبىر جىلدان اسا ۋاقىت كۇرتى اۋداندىق «شۇعىلا» گازەتىندە كوررەكتور بولىپ قىزمەت اتقاردى. بۇگىندە ماماديار جاقىپ اعامىز زەينەتكەر، الماتى قالاسىندا تۇرادى. قازاقستاننىڭ قۇرمەتتى ءجۋرناليسى.
سەرىكجان قاجي
