اللا تاعالا بارشا ادامزاتتىڭ جۇرەگىنە بالاعا دەگەن مەيىرىمدى بەرىپ قويعان. كەيبىر جاندار سول مەيىرىمدى بالاسىنا بولمەي، پەرزەنتتىڭ قاتىگەز بولۋىنا سەبەپكەر بولادى. ءسابيدى ءسۇيۋ، بالعا قامقورلىق كورسەتۋ، جاسوسپىرىمگە جول كورسەتۋ، ءوزىنىڭ بولسىن جاتتىڭ بولسىن الاسىنا مەيىرىم، شاپاعاتپەن قاراۋ بارشا ادامزاتتىڭ ءمىندتى بولسا كەرەكتى.
«اتا-انانىڭ بالاسى ءۇشىن جاساعان دۇعاسى قابىل بولادى» دەگەن پايعامبارىمىز (س.ع.س.) بالا تاربيەسىندە اللادان تىلەك تىلەپ، دۇعا جاساۋدا ۇلكەن ءمان بار ەكەنىن وسىلاي ۇقتىرىپ وتىرعان.
اناستان جەتكەن حاديستە:
پايعامبارىمىز (س.ع.س.) بالالاردىڭ قاسىنان ءوتىپ بارا جاتقان كەزدە امانداسىپ وتەتىن (بۋحاري).
ناماز وقىپ تۇرعاندا ەگەر بالانىڭ جىلاعانىن ەستىسە، اناسى ۋايىمداي ما؟ دەپ، نامازىن تەز اياقتايتىن. پايعامبارىمىزدىڭ (س.ع.س.) ءابۋ حۋرايرادان جەتكەن حاديسىندە:
پايعامبار (س.ع.س.) (نەمەرەسى) ءالي ۇلى حاساندى سۇيگەن ەدى. سول ۋاقىتتا قاسىندا ءال-اقراع يبن حابيس ءات-تاميمي وتىرعان ەدى. ءال-اقراع بىلاي دەدى: مەنىڭ ون بالام بار ءبىراق ەشقايسىن وسى ۋاقىتقا دەيىن سۇيگەن ەمەسپىن. پايعامبارىمىز (س.ع.س.) وعان ۇناماعان كۇيدە قاراپ بىلاي دەدى: «كىم مەيىرىمدى بولماسا، راقىمشىلىققا بولەنبەيدى» (مۋسليم) دەدى.
قىزى فاتيماعا (ر.ا.) سابيلەردىڭ ۇلپىلدەك شاشىن الىپ، الىنعان شاشتىڭ سالماعىنداي ساداقا بەرۋدى تاپسىرعان. «نارەستەگە بەرىلگەن ءسۇت ادامنىڭ بولاشاق تابيعاتى مەن مىنەز-قۇلقىن قالىپتاستىرادى» دەپ، ادال سۇتپەن قورەكتەندىرۋدىڭ ماڭىزىن ۇقتىرعان. بىردە تاڭ نامازىن ادەتتەگىدەن جىلدام وقىپ بىتىرەدى. ساحابالاردىڭ ءبىرى بۇعان تاڭدانىپ: «ۋا، راسۋلاللا، بۇگىن نامازدى نەلىكتەن جىلدام اياقتادىڭىز؟» – دەپ سۇراعاندا، «ارت جاقتان جىلاعان بالانىڭ داۋىسىن ەستىمەدىڭ بە؟ اناسى بارىپ تەزىرەك جۇباتقانىن قالادىم» (يبن ءحاجار) – دەگەن. بالاعا جالعان سويلەمەۋ تۋراسىندا جەتكەن حاديستەر دە بارشىلىق. بىردە ءماديناعا حيجرەت جاساعان ساحابا انالارىمىزدىڭ ءبىرى ءلايلا (ر.ا.) پايعامبارىمىزدىڭ ۇيىندە وتىرعان كەزىندە سىرتتا ويناپ جۇرگەن ۇلىن شاقىرىپ:
– بالام، كەلە قويشى، ساعان ءبىر نارسە بەرەمىن، - دەيدى. بۇنى ەستىگەندە پايعامبارىمىز (س.ع.س.) دەرەۋ ودان:
– ۇلىڭىزعا نە بەرمەكسىز؟ - دەپ سۇرايدى.
– قۇرما بەرەيىن دەپ ەدىم، – دەگەنىندە:
– ەگەر بالاعا «ءبىر نارسە بەرەم» دەپ شاقىرىپ، ەش نارسە بەرمەسەڭىز، امال داپتەرىڭىزگە «وتىرىك ايتتى» دەپ جازىلار ەدى، - دەپ ەسكەرتكەن (ءابۋ داۋد)
پايعامبارمىزدىڭ (س.ع.س.) بالانى ەركەلەتىپ، ماجبۇرلىك جاعداي بولسا دا ونىڭ كوڭىلىنە قاراعانى جايلى اقپاراتتار بار. اللا ەلشىسى (س.ع.س.) بالانى سونشالىقتى سۇيگەنى، وعان دەگەن مەيىرىمى تۋرالى ءسوز ەتكەندە كوڭىلىڭ جۇمسارىپ سالا بەرەدى. ءابۋ ءقاتادا بىلاي دەيدى: «پايعامبارىمىز (س.ع.س.) ءبىر كۇنى جيەن نەمەرەسى ءۋمامانى يىعىنا وتىرعىزعان كۇيدە مەشىتكە كەلدى. جاماعاتقا ناماز وقىتتى. رۇقۋعقا يىلگەندە قىزدى جەرگە تۇسىرەتىن، ساجدەدەن تۇرعان كەزدە قايتادان الاتىن» (بۋحاري).
اركەز وتباسىندا بالالاردى بىر-بىرىنەن الالاماۋعا شاقىرىپ، «بالالارىڭدى ءبولىپ-جارماي، تەڭدەي كورىڭدەر»، «بالا الدىنداعى اتا-انا مىندەتتەرىڭنىڭ ءبىرى – ولاردى الالاماۋ» دەپ وسيەت ەتكەن پايعامبارىمىز (س.ع.س.) سەكىلدى بارشا اتا-انا پەرزەنتتەرىنە قامقور بولسىن دەپ تىلەيمىز.
اللا تاعالا سىيلاعان بالالارىمىدىڭ دەنى ساۋ بولىپ، يماندى، ساليقالى ۇرپاق بولعاي. اللا ەلشىسىنىڭ (س.ع.س.) كوركەم مىنەزى ءاربىر پەرزەنتكە دارىپ، ۇلاعاتتى وتباسى بولۋىن تىلەيمىز!
نۋروۆ ماحمۋت قاجى نۋر ۇلى
«بالا قاجى» مەشىتىنىڭ باس يمامى
پىكىر قالدىرۋ