(فوتو "شابدالى" كوركەم-فيلمىنەن)

2018 جىلدىڭ 29 جەلتوقسانىندا قازاق ونەرى مايتالمانىنان، اتا-انا سۇيىكتى قىزىنان، بالا اياۋلى اناسىنان ايىرىلدى. اباي-سەيفۋللين كوشەلەرىنىڭ قيىلىسىندا تاڭعى ساعات 5-تەر شاماسىندا ورىن العان جول اپاتى ءۇش ادامنىڭ ءومىرىن جالمادى. سونىڭ ءبىرى – كينو جانە تەاتر اكتريساسى، "شابدالى" كوركەم فيلمىندە باستى ءرولدى سومداعان شولپان ەلگەزەكوۆا. اكتريسانىڭ قازاسى بارشا قازاقستاندىقتىڭ قابىرعاسىن قايىستىردى. دوستارى، ارىپتەستەرى، تۋعاندارى ەلگەزەكوۆانىڭ ومىرىنەن ەستەلىكتەر ايتىپ، دۇعادا ەكەندەرىن جەتكىزىپ جاتتى.

"قارا جامىلىپ، قايعىدان قابىرعاسى قايىسىپ وتىرعان اتا-اناسىنىڭ قاسىندا بولدىق. "اناسىنىڭ جۇرەگى اۋىراتىن ەدى، باسقا بولمەگە بارىپ جىلاپ كەلەيىن..." دەگەن اكەنىڭ جانارىنداعى جاسىن كورىپ، كوز جاسىڭا ەرىك بەرمەۋ مۇمكىن ەمەس ەدى. شولپان قىز عازيز باسىن ساجدەگە قويىپ ۇلگەردى. جانىڭ ءجانناتتا بولسىن، شوپالەك"، - دەپ تولعاندى ساكەن مايعازييەۆ Instagram جەلىسىندەگى پاراقشاسىنا.

شولپان ەلگەزەكوۆانىڭ ومىرىنەن ەستەلىك جازعان رەجيسسەر گۇلسينا مەرعالييەۆا قۇربىسىنىڭ قازاسىنا ءالى دە سەنە المايدى.

"شولپان ەندى جوق. كەشىر مەنى، اللا تاعالا، ءبىراق جاعا ۇستاتارلىق حابار بولدى. تەاتر جانە كينو اكتريساسى. ءوزىنىڭ قۋىرشاق تەاترىن قالىپتاستىرۋشى. انا، قۇربى جانە كاسىبي مامان. ەڭ باستىسى - ادام. يماندى بول، دوسىم، وكىنىشتى...

بىردە ول ماعان ءوزىنىڭ ەنەسى جايلى ايتىپ بەردى.

وقيعا ستۋدەنتتىك شاعىندا بولعان. ۋىزداي جاس كەزىندە تۇرمىس قۇرىپ، دۇنيەگە ايداي قىز اكەلەدى. سول كەزدە ەنەسى 40 كۇنگە دەيىن شولپاننىڭ جۋىنۋىنا، سىرتقا شىعۋىنا، اۋىر زات كوتەرۋىنە تىيىم سالعان ەكەن. كەلىنىنىڭ قامقورلىعىن تولىقتاي ءوز موينىنا العان. تەك سورپا قايناتىپ بەرەدى. شولپاننىڭ دەنەسىنەن تەرى سۋ سەكىلدى اعاتىن. الايدا ۇستىنەن ءسۇتتىڭ ءيىسى مۇڭكىپ تۇردى. ءسابيىن ەمىزدىرگەن سوڭ دەنەسىن سۋلى ورامالمەن ءسۇرتىپ وتىراتىن. شولپان دا ەنەسىنە باعىندى. ءتۇنى بويى ەنەسى كەلىنىنىڭ سۋ بولىپ قالعان ءىش كويلەگىن اۋىستىرىپ وتىراتىن. مۇنداي ءسات 40 كۇنگە جالعاستى.

ال ودان كەيىن عاجايىپ ورنادى. تازارعان، ايىققان شولپان مۇلدەم اۋىرماعان. ەنەسى جايلى قاشان دا جىلى سوزدەر ايتىپ وتىراتىن، ونىڭ مەيىرىمىن ەشقاشان ۇمىتقان ەمەس".

ايتا كەتەيىك، شولپان ەلگەزەكوۆا 29 جەلتوقسان تاڭعا جۋىق جول اپاتىنان قايتىس بولدى. قاتتى جىلدامدىقپەن كەلە جاتقان Mersedes Gelandewagen باعدارشامنىڭ قىزىل تۇسىنەن ءوتىپ كەتىپ، اكتريسا وتىرعان كولىككە سوعىلادى. سونىڭ سالدارىنان ەلگەزەكوۆا مەن Mitsubishi Galant جۇرگىزۋشىسى وقيعا ورنىندا اجال قۇتشتى. ال تاعى ءبىر جولاۋشى ايزادا ساتىبالدييەۆا اۋىر حالدە جانساقتاۋ بولىمىنە جەتكىزىلدى.