ديماش الەمدىك دەڭگەيدىڭ، ونەرگە دەگەن بيىك تالعامنىڭ نە ەكەنىن قازاقتارعا ابدەن ۇقتىرعانداي بولدى. ارينە، ۇعاتىنداي ساناسى بارلارعا جەرىنە جەتكىزە ءتۇسىندىردى. ويتپەگەندە، ونى قازىرگىدەي ماقتان تۇتۋ بىلاي تۇرسىن، ەندىگى ساحنادان قۋىپ جىبەرەر مە ەدىك، كىم ءبىلسىن. بىرنەشە جىل بۇرىن الدە ءبىر «ءادىل قازىلار القاسى» دەيتىن بىرەۋلەر سول ديماشتىڭ يت تەرىسىن باسىنا قاپتاپ سىناپ-مىنەپ جاتقانىن ءدۇيىم جۇرت كورىپ، ەستىگەن ەدى عوي. ال، بۇگىن الەم ەلدەرىنىڭ جوعارى تالعامدى، بيىك مادەنيەتتى كورەرمەندەرى مەن شىن كاسىبي ونەرتانۋشىلارى ونى تانىعان سوڭ عانا قازاقتار «ءيا، سولاي ەكەن عوي» دەپ مويىنداعان بولىپ جاتىر. بۇرىن سولاي تانىسا، مويىنداسا قايدا قالدى؟ 

مويىنداۋعا دا، تانۋعا دا ءبىزدىڭ دانىشپانداردىڭ ورەسى جەتپەس ەدى. الگى «ءادىل قازىلار القاسى» اتالاتىن توپاس توبىردىڭ بىرەگەي وكىلدەرى سىناعان سوڭ ءبىتتى. «ول – ءانشى ەمەس، شىڭعىرعان جاي بىرەۋ» دەپ قانا قاراپ، شىن تالانتتى تەنتىرەتىپ جىبەرگەن بولار ەدىك. باياعى سول اباي دانا ايتقانداي «كوپ ايتسا بولدى، جۇرت ايتسا كوندى» دەگەننىڭ كەرى. بۇل جەردە «كوپ» دەگەندى «توپاس»، «جۇرت» دەگەندى «توبىر» دەپ تۇسىنگەن ابزال شىعار. ءقازىر دە كوپتەگەن سالادا سول توپاستاردىڭ («ءادىل قازى») دەگەنى ءجۇرىپ، توبىر سولاردىڭ ىعىنا قاراي جىعىلىپ تۇر. جالعىز ءان ونەرىندە عانا ەمەس، بارلىق سالادا سولاي. 

ءتۇرلى بايقاۋ-جۇلدەلەردە، كونكۋرس-پونكۋرستاردا ات توبەلىندەي ءبىر توپ قازىلىق ەتىپ وتىرادى. ولاردىڭ دەنى سول ادىلدىكتەن ساداعا كەتكىر زالىمدار. تالعام دەڭگەيلەرى الەمدىك ستاندارتتاردان الدەقايدا ارتتا قالعان، بىلىكتىلىكتەرى تىم تومەندە جاتسا دا، سونىسىنا قاراماي اتاقتارى تار شەڭبەردىڭ اۋماعىندا عانا جەر جارادى. قىسقاسى، قازاقستاندىق ماسشتابتا سول توپاستاردان اسقان داناگوي جوقتاي-اق كورەدى. جۇرت سولاردىڭ ايتقانىنا كونەدى دە، قايداعى ءبىر دارىنسىز، حالتۋرششيكتەردى كوككە كوتەرەدى. شىن مانىندە، ولاردىڭ ءادىل قازى دا، سالانىڭ بىلگىرلەرى ەمەس ەكەندىگىن ءان ونەرىندە ءبىر ديماش ءقازىر تولىقتاي پاش ەتتى، ءبىرشاما ەلدىڭ كوزىن اشتى. 

ەندى، ادەبيەت، كينو سەكىلدى وزگە دە كوپتەگەن سالادا ديماشتاي شىن دارىندار الەمدىك دەڭگەيدە تانىمال بولا باستاسا، قازىرگى ماداقتالىپ، وردەن تاعىپ، اتاق الىپ جۇرگەندەر مەن ولارعا باعا بەرىپ، ساراپتاما جاساپ وتىرعان دانىشپانداردىڭ دا ارتتارى اشىلىپ، اي دالاعا تەنتىرەپ كەتەر ەدى.

قۋاندىق شاماحاي ۇلىنىڭ Facebook پاراقشاسىنداعى جازبا