ءولىم – توي ەمەس. ءبىر شاڭىراقتىڭ، ءبىر اۋلەتتىڭ قايعىسى. سوندىقتان قايعىعا باتىپ، قينالىپ وتىرعان ءۇي يەلەرىنە جانازا كۇنى استاۋ-استاۋ ەت استىرىپ، مۇشەلەپ جىلىك تاراتۋ دۇرىس بولماسا كەرەك-تى. وكىنىشكە وراي، كوپ جەرلەردە ءمايىت ۇيدەن شىعىسىمەن-اق، زيرات باسىنا بارماي ىعىسىپ قالىپ قويعان كىسىلەر جاپا-تارماعاي داستارحانعا ۇمتىلادى. قارا جامىلعان ايەلدەر ىشكى ۇيدە اڭىراپ وتىرعاندا، اتا ساقالدارى اۋىزدارىنا تۇسكەن ەل اعالارىنىڭ ىرگەدە مالجاڭداپ سۇيەك ءمۇجىپ وتىرعانى ءبىرتۇرلى ەرسىلەۋ كورىنەدى ەكەن. ال الگى اۋىر قايعى قابىرعالارىنا باتىپ، تاياق ۇستاپ قالعان اعايىن سولارعا ءشاي تاسىپ، قىزمەت كورسەتىپ اۋرە. ءتىپتى، مۇنى ايتاسىز، ءمايىت ۇيدەن شىقپاي-اق، جانازاسىن كۇتپەي تاباق-تاباق پالاۋ تاراتا باستايتىن جاماعات تا بار.
بۇل تۋراسىندا 2009 جىلى قمدب-نىڭ ورتا ازيا مەن قازاقستان مۇسىلماندارى امال ەتەتىن حانافي ءمازھابىنا ساي دايىندالعان ءپاتۋا نە دەر ەكەن؟ «قارالى ءۇيدىڭ تۇرمىسى اۋىر نەمەسە بىرەۋلەرگە قارىزى بولسا، ولاردىڭ ودان ءارى قارىزعا باتىپ اس بەرۋلەرى دۇرىس ەمەس. ول ۇيدەن اس شىعارتپاۋ كەرەك. تاعامدى تۋىسقاندارى، جورا-جولداستارى نەمەسە كورشىلەرى ۇيىندە جاساۋىنا بولادى. وزدەرى جاقىندارىنان ايرىلىپ قايعىرىپ وتىرعان ءۇي يەلەرىنە تاماق ازىرلەتىپ، كىسى كۇتتىرىپ قويعان دۇرىس ەمەس. ءمايىتتى بىرنەشە كۇن جاتقىزىپ قويىپ، قوناق كۇتۋدىڭ قامىنا كىرىسۋ كۇنا». ءجون-اق. ەندەشە، وسى ءباتۋاعا نەگە توقتامايمىز، اعايىن؟ قايعىدان قابىرعاسى قايىسىپ، قارا جامىلعان ۇيدە قالجىڭ قاعىسا قارقىلداي كۇلىپ، ەزۋىمىزدەن ماي اعىزا كەكىرىك اتۋىمىزدىڭ ەندىگى جەردە ءجونى بولا قويماس، ءسىرا...
ءسىز نە دەيسىز بۇعان؟
بەكجىگىت سەردالىنىڭ Facebook-تەگى پاراقشاسىنان
پىكىر قالدىرۋ