"جىلاماشى، اۋىرىپ قالاسىڭ"

قاڭتاردىڭ 10-ى كۇنى تاڭعى ساعات وندا باستالعان ءجارىسسوز تۇستەن كەيىن ۇشتە اياقتالدى. ىسكە ءتوراعالىق ەتكەن سۋديا ساميددين تەمىرالييەۆ 12 القا بيمەن ەكى ساعات كەڭەسىپ بولعان سوڭ ۇكىمدى وقىدى. شەشىمدى ايىپتالۋشى مەن ونىڭ زاڭدى وكىلى – شەشەسى، قورعاۋشىسى جانە جابىرلەنۋشى بالانىڭ اناسى تىڭدادى.

سۋديا 2002 جىلى وڭتۇستىك قازاقستان وبلىسى (قازىرگى تۇركىستان وبلىسى – رەد.) سارىاعاش اۋدانىنداعى مەكتەپتەردىڭ بىرىندە وقىعان 8-سىنىپ وقۋشىسىن قىلمىستىق كودەكستىڭ 121-بابى "سەكسۋالدىق سيپاتتاعى زورلىق-زومبىلىق ارەكەتتەر" بابى بويىنشا كىنالى دەپ تانىپ، 7 جىلعا باس بوستاندىعىنان ايىردى. سوتتالۋشى جازاسىن كامەلەتكە تولماعاندارعا ارنالعان تۇزەۋ مەكەمەسىندە وتەۋى ءتيىس. سوت ۇكىمى كۇشىنە ەنگەن جوق. ايىپتالۋشى تاراپ اپەللياسيالىق شاعىم تۇسىرۋگە ۋاقىتى بار.

ايىپتالۋشىنى ارنايى كۇزەت سوت زالىنان الىپ كەتتى.

سۋديا ۇكىمدى وقىپ جاتقاندا سوتتالۋشىنىڭ شەشەسى بالاسىن قۇشاقتاپ جىلاي باستادى. "ىستەگەن جوقسىڭ عوي. زورلاعان جوق قوي" دەپ ورىندىقتى ۇرىپ ايقايلادى. سوتتالۋشى اناسىن جۇباتپاق بولعان. ءبىراق شەشەسى ۇلىن قۇشاقتاپ، "كىناسىزسىڭ عوي، سەن ىستەمەدىڭ عوي" دەپ داۋىس كوتەرە جىلادى. "ماما، جىلاماشى. اۋىرىپ قالاسىڭ" دەدى ايىپتالۋشى شەشەسىن قۇشاعىنا الىپ.

سوتتالۋشىنىڭ شەشەسى القا بيلەردى قولىمەن نۇسقاپ "سەندەرگە سەنىپ ەدىم" دەدى. القا بيلەر ايقاي سالىپ جىلاعان ايەلدىڭ ءسوزىن سوڭىنا دەيىن تىڭداماي زالدان شىعىپ كەتتى.

پوليسەيلەر سوت زالىنان بالانى قاماۋعا الىپ كەتىپ بارا جاتقاندا سوتتالۋشىنىڭ اناسى ارتتارىنان جىلاپ جۇگىردى. دالىزگە جەتكەندە ەسىنەن تانىپ قۇلادى. الدەبىرەۋ "جەدەل جاردەم شاقىرىڭدار" دەپ ايقايلادى. بەتىنە سۋ شاشقان سوڭ ەسىن جيعان ايەل سوت دالىزىندە "بالامنىڭ ءومىرى نە بولادى؟" دەپ تاعى جىلادى.

ايىپتالۋشىنىڭ اكەسىنىڭ اعاسى سوت ۇكىمىمەن كەلىسپەيتىن، سوت-مەديسينالىق ساراپتاما قورىتىندىسىندا "بالا زورلانباعان" دەپ جازىلعانىن، اپەللياسيالىق شاعىم تۇسىرەتىندەرىن ايتتى.

سوتقا "زورلانعان بالا" قاتىسقان جوق. جابىرلەنۋشىنىڭ شەشەسى مەن ادۆوكاتى سوت ۇكىمىمەن كەلىسەتىنىن، اپەللياسيالىق شاعىم تۇسىرمەيتىنىن جەتكىزدى.

جابىرلەنۋشىنىڭ ناعاشى اجەسى شاريپا باتىربەكوۆانىڭ ايتۋىنشا، "زورلانعان بالا" مەن ونىڭ شەشەسى ءقازىر الماتىدا تۇرىپ جاتىر. بالا وسى قالاداعى مەكتەپتەردىڭ بىرىندە وقيدى.

سوتقا تۇرتكى بولعان وقيعا

​2018 جىلى ناۋرىزدىڭ 13ء-ى كۇنى سارىاعاش اۋدانىنداعى اباي اۋىلىندا تۇراتىن شاريپا باتىربەكوۆا ازاتتىققا جەتى جاسار جيەنىن 2017 جىلدىڭ تامىزىنان بەرى جوعارعى سىنىپ وقۋشىلارى بىرنەشە مارتە "ۇرىپ، زورلاعانىن" ايتقان. ول جەرگىلىكتى پوليسياعا دەر كەزىندە شاعىمدانعانىمەن، تەك ءۇشىنشى رەت بارعاندا عانا ارىزىن قابىلداعانىن جەتكىزگەن.

سارىارقا اۋداندىق ءبىلىم باسقاراماسى "ساراپتاما قورىتىندىسى زورلاۋ وقيعاسىنىڭ بولماعانىن انىقتادى" دەپ مالىمدەگەن. ايىپتالۋشى مەن جابىرلەنۋشى وقىعان مەكتەپتىڭ ۇجىمى دا "بالا زورلاۋ وقيعاسىن" جوققا شىعارعان. كەيىن "زورلانعان بالانىڭ" تۋىستارى تاۋەلسىز ساراپتاما جاساۋدى تالاپ ەتكەن.

بۇل حابار الەۋمەتتىك جەلىدە كەڭ تاراپ، اقپارات قۇرالدارىنىڭ نازارىنا ءىلىنىپ، الەۋمەتتىڭ اشۋ-ىزاسىن تۋدىرعان.

بىلتىر تامىز ايىندا قازاقستان باس پروكۋراتۋراسىنىڭ تەرگەۋ توبى تۇركىستان وبلىسى (بۇرىنعى – وڭتۇستىك قازاقستان وبلىسى) اباي اۋىلىندا "زورلانعان بالا" ءىسى بويىنشا 14 كەشەندى سوت ساراپتاماسى مەن ءتورت ءتۇرلى زەرتتەۋ جۇرگىزىلگەنىن مالىمدەگەن.

"ءتورت كۇدىكتىنىڭ ىشىندە بىرەۋى عانا 14 جاسقا تولعان. ونىڭ ءىسى قىلمىستىق كودەكستىڭ 121-بابىنىڭ 4-بولىگىنە ("كامەلەتكە تولماعان بالاعا قاتىستى سەكسۋالدىق سيپاتتاعى زورلىق-زومبىلىق ارەكەتتەرى") سايكەس كەلەدى. قالعاندارىنا قاتىستى قىلمىستىق ءىس توقتاتىلدى. سەبەبى ولار 14 جاسقا تولماعان. وقيعانىڭ باسقا ءمان-جايى جاريالانبايدى" دەپ حابارلاعان باس پروكۋراتۋرانىڭ باسپا ءسوز قىزمەتى.

جابىق سوت پروسەسى قىركۇيەكتىڭ 26-سى كۇنى باستالعان.