ديماش ەرەكشە ۇنىمەن الەمدى وزىنە قاراتقانى بەلگىلى. ديماشتىڭ جانكۇيەرلەرى ونىڭ قاراپايىمدىلىعى مەن تاربيەلىلىگىن دە جوعارى باعالايدى. ال ونىڭ داۋىسى تۋرالى شەتەلدىك تىڭدارماندارمەن بىرگە، كاسىبي بىلىكتىلىگى جوعارى ماماندار دا پىكىر ءبىلدىرىپ، تاڭعالىسىن جاسىرا المادى. وسىعان دەيىن تانىمال كومپازيتور يگور كرۋتوي "ديماشتىڭ داۋىسىندا تىلسىم كۇش بار"، — دەپ پىكىر بىلدىرگەن بەلگىلى. كەيىن اراعا ءبىراز ۋاقىت سالىپ شەتەلدىك ماماندار دا ديماشتىڭ داۋسىن زەرتتەي باستادى. ولاردىڭ قاتارىندا اقش-تا ۆوكالدان ساباق بەرەتىن ءمۇعالىم، كاسىبي مامان مەري سيممەر دە بار. ول ءوزىنىڭ Youtube جەلىسىندە "ديماشتىڭ ەرەكشە داۋسىنىڭ قۇدىرەتى نەدە ەكەنىن ايتتى" دەپ جازادى Qamshy.kz اقپارات اگەنتتىگى. 

♦ديماش وليمپييسكييدى اۋزىنا قاراتتى (ۆيدەو)

سيممەر Youtube ارناسىندا تالانتتى انشىلەردىڭ ۆوكالدىق قابىلەتى تۋرالى پىكىر ءبىلدىردى. ول وسىعان دەيىن ديماشتىڭ شىعارماشىلىعىمەن تانىس بولماعان. كوپتەگەن كورەرمەندەردىڭ سۇراۋىنان كەيىن  عانا ديماشتىڭ شىعارماشىلىعىن زەرتتەي باستاعان. ديماشتىڭ شىعارماشىلىعى سيممەر ءۇشىن ناعىز جاڭالىق بولدى.

"ديماش دياپازونىنىڭ كەڭدىگىمەن قاتار، سوزبەن ايتىپ جەتكىزۋگە كەلمەيتىن ەرەكشە ۇنىمەن الەمدى تاڭعالدىردى. ونىڭ ادام سەنگىسىز قاسيەتى دە وسىندا. سونداي-اق ءان ايتۋ بارىسىندا ديماش نەشە ءتۇرلى ورىنداۋ ءستيلىن بىرىكتىرىپ، ۇيلەستىرە الاتىن كاسىبي شەبەرلىككە يە"،— دەدى قىتايدا وتكەن "I am a Singer" شوۋىنداعى ديماشتىڭ ونەرىن كورگەن سيممەر.

♦اتاقتى "تيتانيكتى" ورىنداعان ديماش ساحنانى جاردى (ۆيدەو)

بلوگەر ديماشتىڭ ەرەكشە ءۇنى تۋرالى تاڭعالىسىن جالعاستىردى. ديماشتىڭ ەڭ جوعارى نوتاسى D8 (رە نوتاسى سەگىزىنشى وكتاۆا) بولسا، ال تومەنگىسى ەكىنشى وكتاۆالى سي نوتاسى ەكەنىن ايتتى. ناقتىراق ايتقاندا، قازاق ءانشىسى 6 وكتاۆالىق ارالىقتى يگەرىپ، ءان ايتا الاتىنىن ايتقان بلوگەر ءوز تاڭدانىسىن جاسىرا المادى. 

"10 جىلدىڭ ىشىندە مەنىڭ الدىمنان وتكەن كوپتەگەن شاكىرتتەر بولدى. ولاردىڭ بىردە-بىرەۋى 5 وكتاۆانى دا يگەرە الماعان ەدى. ءتىپتى تانىمال، كاسىبي انشىلەردىڭ ءوزى 2-3 وكتاۆالى اندەردى عانا ايتۋعا شاما-شارقى جەتەدى. ماسەلەن، مەنىكى كوپتەگەن ايەلدەرگە ءتان كەلمەيتىن تومەنگى نوتادان باستاۋ الاتىن 3 وكتاۆالى داۋىس"،— دەيدى سيممەر.

♦ديماش قازاق تىلىندە ءان ايتىپ، قىتايلىقتاردى تاعى دا ءتانتى ەتتى (ۆيدەو)

"ديماش تەڭدەسى جوق تالانتتى ءانشى. سەبەبى، ونىڭ داۋسى نە تەنور، نە باريتون، نە سوپرانو ەمەس. ول مۇنىڭ كەز كەلگەنىن ايتۋعا قاۋقارى جەتەدى. نەگىزىندە ادام نەعۇرلىم جوعارى نوتالاردى ايتا الاتىن بولسا، ونىڭ داۋىسىنىڭ جيىلىگى سوعۇرلىم تومەن بولادى. وسىعان قاتىستى ءۇش نەگىزگى پارامەترى بار: جىڭىشكەلىك، ۇزىندىق جانە كەڭدىك.
ديماش ادام سەنگىسىز ۆوكالدىق قابىلەتكە يە. ونىڭ داۋسى جىڭىشكە ءارى كەڭ. ول سونىسىمەن دە ەرەكشەلەنەدى.
سونداي-اق ديماشتىڭ تالانتىن جاي عانا تابيعاتتىڭ بەرگەن سىيى دەپ قابىلداۋعا بولمايدى. ول ۇزاق جىل بويى كلاسسيكالىق جاعىنان دا، زاماناۋيلىق تۇرعىدان دا ساباق العان. بۇل بىرنەشە جىلدىق وقۋ مەن ەڭبەكتىڭ جەمىسى. سەن تالانتتى بولىپ دۇنيەگە كەلۋىڭ مۇمكىن، الايدا ەڭبەكسىز ەشقانداي ناتيجەگە جەتە المايسىڭ، ءوز داۋسىن ديماش سەكىلدى باقىلاۋ ءۇشىن وتە ەڭبەكقور بولۋ قاجەت. ال ءبىز تەك قانا ونىڭ تالماي ەڭبەكتەنگەنىن، توككەن تەرىنىڭ ناتيجەسىن باقىلاپ، ءسۇيسىنىپ وتىرا الامىز"،— دەپ ءسوزىن اياقتادى مەري سيممەر.