قاڭتاردىڭ 12 كۇنى قىتايدىڭ سيان قالاسىندا «ءبىر بەلبەۋ – ءبىر جول» ستراتەگياسىنىڭ اياسىندا حالىقارالىق ءسان اپتالىعى وتكەنى بەلگىلى. ارنايى قوناق بولىپ شاقىرىلعان ءبىزدىڭ ديماش قۇدايبەرگەن الەم سۇلۋلارىن جانىنا جيناپ، قاتارىنان ەكى ءاندى قۇيقىلجىتا ورىنداپ شىقتى. ۇلىقپان جولداسوۆتىڭ ارمانى جوق شىعار، سەبەبى ءبىرىنشى بولىپ شىرقالعان ءان جۇڭگو تىلىندە بولعانىمەن، اۋەنىن جازعان ديماشتىڭ وكىل اكەسى جولداسوۆتىڭ ءوزى بولىپ شىقتى. 10 مينۋتقا سوزىلعان ونەر كورسەتۋ بارىسىندا قىز-قىرقىننىڭ كوزى قىزىلدا ەمەس، ديماشتا بولدى.

الەۋمەتتىك جەلىدە تارالىپ كەتكەن فوتولاردا دا ديماشتى جەپ قويۋعا دايىن تۇرعان سۇلۋلاردى كورەمىز. ءبىرىنشىسى ءساتتى شىرقالىپ، قىزدار كۇمىس كۇلكىلەرىن تىيا الماي، مارە-سارە بولىپ تۇرعاندا كەش جۇرگىزۋشىلەرى ساحناعا شىعىپ، ديماشتى كىشىگىرىم اڭگىمەگە تارتتى. «قانداي سەزىمدەسىز؟» دەگەن سۇراققا «كەز كەلگەن ەر ادام مەنىڭ ورنىمدا بولۋىن ىشتەي ارمانداپ وتىرعان شىعار. ءوز باسىم تولقىعانىم سونشالىق، ءاننىڭ ءسوزىن ۇمىتىپ قالامىن با شوشىدىم» دەپ ازىلدەدى. كەز كەلگەن سيتۋاسيادا ءوزىنىڭ قانشالىقتى تاربيەلى جانە ۇستانىمى مىقتى ەكەندىگىن دالەلدەي بىلەتىن ديماشتىڭ قالجىڭىنا كورەرمەن ريزا بولىپ، دۋ قول شاپالاقتادى. سودان سوڭ ديماش ايعايعا باستى. جو-جوق، تىكەلەي ماعىنادا ەمەس. ەكىنشى ءانىنىڭ اتاۋى – «Screaming»، ياعني قازاقشا اۋدارماسى - «ايقاي».

زال «ديماشي» دەپ ايعايلاعانىمەن، ءبىزدىڭ ديماش ماحاببات جايلى اسىقپاي-ساسپاي، ءار قادامىن ابايلاپ باسىپ، الەم سۇلۋلارىن شىر اينالدىرا بيلەتە وتىرىپ ورىنداپ شىقتى. قىزدار، قالىڭ كورەرمەن شىن تالانتتىڭ داۋسى مەن ورىنداۋ شەبەرلىگى، ساحنادا ءوزىن ۇستاۋ مادەنيەتى مەن سىمباتىنا تامسانىپ، باستارى اينالعانىمەن، ديماش سابىرلى قالپىنان تايمادى. رەسەيگە ارنايى بارىپ ونەر كورسەتكەندە ميكروفونى ىستەمەي قالعانىن جانكۇيەرلەرى جاقسى بىلەدى.

♦ ديماش وليمپييسكييدى اۋزىنا قاراتتى (ۆيدەو)

سوندا دا ديماش كەش ۇيىمداستىرۋشىلارى ءتىس جارىپ، شاعىم ايتپاعان بولاتىن. ءان ايتىپ بولعاننان كەيىن ديماشقا گۇل شوقتارىن اكەلگەن جانكۇيەرلەر-تىڭدارماندارىن «قۇلدارعا» تەڭەگەن رەسەيلىك جۇرگىزۋشىلەرگە ءمان بەرمەي، dears-تارعا (ديماشتىڭ جانكۇيەرلەر توبى-رەد.) شەكسىز العىسىن ايتىپ، كۇلىپ قوشتاسقان، شىن مانىسىندە وسىنداي ۇيىمداستىرىلۋ دەڭگەيىنەن ءزارازاپ بولعان ديماشتى جۇڭگو ادەتتەگىدەي جوعارى دەڭگەيدە قارسى الدى. تالانتقا لايىقتى قۇرمەت كورسەتتى. ال، ءبىز ءجۇرمىز ديماشقا «مادەنيەت قايراتكەرىن» ءالى بەرمەي. بۇل ءبىراق باسقا اڭگىمەگە ارقاۋ بولسىن...

♦فاناتتاردىڭ شىنايى وقيعالارى. "ديماش بولماعاندا، قاراڭعى قابىردە جاتار ەدىم"