«رۋحاني جاڭعىرۋ» باعدارلاماسىن ىسكە اسىرۋ جونىندەگى ۇلتتىق كوميسيا حاتشىسى، ق ر پرەزيدەنتى اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى ا.ع.بالايەۆا قازىرگى قازاق ادەبيەتى انتولوگيالارىن بۇۇ-نىڭ 6 تىلىنە اۋدارىپ جاتقان اۋدارماشى، رەداكتورلارمەن كەزدەستى. كەزدەسۋدە ۇلىبريتانيا، يسپانيا، فرانسيا، رەسەي جانە جۇڭگو مەملەكەتتەرىنەن كەلگەن اۋدارماشى-ادەبيەتشىلەرمەن قازاق ادەبيەتى جيناقتارىن اۋدارۋ بارىسى تالقىلاندى.

ايدا عالىم قىزى قازاق ادەبيەتىنىڭ ۇزدىك ۇلگىلەرىن بۇۇ-نىڭ 6 تىلىنە اۋدارۋ باستاماسى بۇرىن-سوڭدى بولماعان ەرەكشە جوبا ەكەندىگىنە  توقتالىپ: «ءبىزدىڭ باستى مىندەتىمىز – اۋدارمانىڭ كوركەمدىك ساپاسى قامتاماسىز ەتۋ. ءبىز ول ءۇشىن قاجەت دۇنيەنىڭ بارلىعىن ىستەپ جاتىرمىز. سوندىقتان، اۋدارماشىلار مەن ءبىزدىڭ اۆتورلاردىڭ وسىنداي كەزدەسۋى وسى مىندەتتى ورىنداۋىمىزعا سەپتىگىن تيگىزەدى دەگەن ۇمىتتەمىن»، - دەدى. سونىمەن بىرگە، ق ر پرەزيدەنتى ن.ءا.نازاربايەۆتىڭ «رۋحاني جاڭعىرۋ»، «ۇلى دالانىڭ جەتى قىرى» ماقالالارىندا ايتىلعان مادەنيەت پەن ادەبيەتتى دامىتۋعا باعىتتالعان شارالارىمەن تانىستىرىپ، ونى ىسكە اسىرۋعا اتسالىسۋعا شاقىردى.

قازىرگى تاڭدا انتولوگيانىڭ اعىلشىن، فرانسۋز، يسپان جانە ورىس تىلدەرىندەگى جولما-جول اۋدارما اياقتالدى. جۇڭگو مەن اراب تىلدەرىندەگى جولما-جول اۋدارما پروسەسى ءجۇرىپ جاتىر. اۋدارماشىلار مەن قازاقستاندىق اۆتورلاردىڭ مۇنداي كەزدەسۋى اۋدارمانى ءتۇپنۇسقا ماتىنگە مەيلىنشە جاقىنداتىپ، ونىڭ كوركەمدىك ساپاسىن قامتاماسىز ەتپەك.