27 قاڭتار – تۇرىكمەنستاننىڭ وتان قورعاۋشىلارى كۇنى. كەشە وسىعان وراي پرەزيدەنت گۋربانگۋلى بەردىمۇحامەدوۆ ەلدىڭ اسكەري قارۋلى كۇشتەرىنىڭ قىزمەتكەرلەرىن قۇتتىقتاپ، ولاردىڭ ءبىرقاتارىنىڭ شەنىن ءوسىردى.
مىسالى، مەملەكەتتىك شەكارا قىزمەتىنىڭ باستىعى شادۋر دۋردىيەۆ گەنەرال-مايور اتاعىن الدى. 2018 جىلى پرەزيدەنت بەردىمۇحامەدوۆ ەكى رەت قاتاڭ ەسكەرتۋ جاساعان اتادۋردى وسمانوۆ تا وسى جولى گەنەرال-مايور شەنىنە يە بولدى. سونداي-اق ادىلەت، پروكۋراتۋرا، كەدەن، قۇقىق قورعاۋ سالاسىندا جۇمىس ىستەيتىندەر دە ءبىرشاما ماراپات الدى. ولاردىڭ دا شەندەرى كوتەرىلدى.
ءبىراق ءبىزدى تاڭقالدىرعان نارسە بۇل ەمەس، پرەزيدەنتتىڭ الدىندا تىزە بۇگىپ، باس ۇرىپ، باس ءيىپ، قۇرداي جورعالاعانداردىڭ ارەكەتى بولدى. ولاردىڭ ەشقايسىسى دا، اسكەري تارتىپپەن قاسقايىپ بارىپ، شەكەسىنە قولىن اپارىپ، باس قولباسشىدان ماراپاتىن نەمەسە بولاشاقتا يىعىنا تاعاتىن تاعاتىن شەنىن الا المايدى. «تۇرىكمەنستانعا قىزمەت ەتەمىن» دەپ تە ايتا المايدى. ولار قاراپايىم سارباز، مەيلى گەنەرال بولسىن، تىزەسىن بۇگىپ، باسىن ءيىپ، ارداقتى قامقورشى «اركاداگتىڭ» بەرگەن ماراپاتىن ماڭدايىنا باسۋى ءتيىس. ولار وتانعا ەمەس، پرەزيدەنتكە قىزمەت ەتەدى.
جەكە باسقا تابىنۋدىڭ سوراقى ۇلگىسىن كورسەتىپ جاتقان گۋربانگۋلى بەردىمۇحامەدوۆ قولپاشتى جانى سۇيەدى، جاعىمپازدىقتى جاقسى كورەدى، ونىڭ ءاربىر سوزىنە زالدا وتىرعاندار توقتاۋسىز قول شاپالاقتاۋى ءتيىس. ايتپەسە، بولمايدى! جاقپاي قالۋى مۇمكىن نەمەسە مۇنى ىستەمەگەن ادامنىڭ تۇقىمى تۇزداي قۇريدى. سول ءۇشىن پرەزيدەنتتىڭ الدىنا بارعان ادام قۇرداي جورعالاپ كەلىپ، باسىن يەدى، تىزەسىن بۇگەدى، بەرگەن ماراپاتىن ماڭدايىنا تيگىزەدى. زالدى وتىرعاندار «ۇلى جوعارى باس قولباسشىنىڭ داڭقى ارتا بەرسىن!» دەپ ايقايدى سالادى. ايتپاي كور، ايقايلاماي كور!
...بەردىمۇحامەدوۆتىڭ الدىندا باسىڭ يىلمەسە، باسىڭ كەتەدى!
