ادامنىڭ جاسى ۇلعايعان سايىن ونىڭ جۇمىس ىستەۋ قابىلەتى قانشا دەگەنمەن تومەندەيدى. ءبىراق مەملەكەت ادام بالاسىنىڭ جاعدايىن قانشالىقتى جاساپ وتىر؟ بۇل ۇلكەن ماسەلە، دەسەك تە، اقيقاتىندا زەينەتكەرلەردى اسىراۋ قىمباتقا تۇسەدى. سوندىقتان مەملەكەت زەينەتاقى جاسىن ۇزارتۋعا ءماجبۇر.  بىزدە دە 2018 جىلدان باستاپ ءار جىلعا التى اي قوسىلىپ وتىر. بولاشاقتا ايەلدەر 63 جاستان باستاپ زەينەتكەرلىككە شىعادى. ءقازىر سونىڭ العىشارتى جاسالىپ جاتىر. ونسىز دا قارتتىققا  اياق باسقان قازاق ايەلىنە مۇنىڭ بارلىعى وڭاي تيمەي تۇر. دەسەك تە...

كەشە يتاليا پرەزيدەنتى سەردجو ماتتارەللا الەۋمەتتىك جاعىنان از قامتىلعان وتباسىلاردى ماتەريالدىق جاعىنان قولداۋ جانە زەينكەتكەرلەردىڭ  جاسىن تومەندەتۋ تۋرالى زاڭعا قول قويدى.

پرەزيدەنت قول قويعان زەينەتاقى جونىندەگى رەفورماعا سايكەس، ەگەر زەينەتكە شىعاتىن ادامنىڭ جاسى 62-گە كەلسە، ال ونىڭ ەڭبەك ءوتىلى 38 جىل بولسا، وندا يتالياندىقتار زەينەتكەرلىككە شىعا بەرۋىنە بولادى. ناقتى ايتقاندا، زەينەتكەرلىككە 29 جاسىنان باستاپ تۇراقتى ءۇزىلىسسىز جۇمىس ىستەگەن كەز كەلگەن ادام شىعا الادى. مىسالى، ءسىزدىڭ جاسىڭىز 70-كە كەلسە، وندا مىندەتتى تۇردە 30 جىل ەڭبەك ءوتىلىڭىز بولۋى كەرەك.

سونداي-اق بۇل زاڭ الەۋمەتتىك جاعىنان از قامتىلعان ازاماتتارعا دا ارنالعانىن ايتا كەتەيىك. ەلدە ۇزاق ۋاقىت جۇمىسسىز قالعان ازاماتتار قايتادان قىسقا مەرزىمدىك دايىندىقتان وتەدى.  اي سايىن جۇمىسسىزدارعا 780 ەۆرو، ال وتباسىنا 1032 ەۆرودان بەرىلىپ تۇرادى.  ولار  كەز كەلگەن ماماندىقتى قىسقا مەرزىمنىڭ ىشىندە وقىپ الۋعا كەلىسىمىن بەرۋى كەرەك.

بۇل ارينە مەملەكەت ءۇشىن وڭاي نارسە ەمەس. ءبىراق يتاليا بيلىگى ءوز ازاماتتارىن قورعاۋ ءۇشىن وسىنداي جاعدايعا بارىپ وتىر. يتاليا ۇكىمەتىنىڭ ەسەپتەۋى بويىنشا ءبىر جىلدىق شىعىن 4 ميلليارد ەۆرونى قۇرايدى. ۇكىمەت 2020 جىلعا دەيىن بارلىعى 8 ميلليارد ەۆرو جۇمساۋدى كوزدەپ وتىر.

ەسكەرتە كەتەيىك، 2011 جىلى يتالياداعى قارجىلىق داعدارىسقا وراي ەل بيلىگى زەينەكەتكەرلەردىڭ جاسىن 67 جاسقا كوتەرگەنى بىلگىلى. ەندى مىنە حالىقتىڭ تۇرمىستىق جاعدايى دۇرىستالعاننان كەيىن پرەزيدەنت قايتادان زەينەت جاسىن 5 جاسقا تومەندەتتى. ال ءبىز  زەينەتاقىنى از عانا ءوسىرىپ، زەينەتكەرلەردىڭ شىعۋ جاسىن ەرلەرمەن تەڭ ەتىپ، 63 جاسقا  اكەلدىك. ال الەم ەلدەرىندە قانداي؟

رەسەيدىڭ وزىندە 2018 جىلدان باستاپ، ايەلدەر  60 جاستا، ەرلەر 65 جاسىندا زەينەتكە شىعادى.

2012 جىلى پولشا  ۇكىمەتى دە زەينەتكەرلەردىڭ جاسىن 67 جاسقا ۇزارتقانى بەلگىلى.  2017 جىلدان باستاپ حالىقتىڭ تالابىن ەسكەرە وتىرىپ، مۇنى تومەندەتتى. ءقازىر پولشادا قارتتىققا اياق باسقان ەرلەر 65، ال ايەلدەر 60 جاستان باستاپ زەينەتكە شىعادى.

قىتايدا ەرلەر 60، ايەلدەر 55 جاستان زەينەتاقىلىق اقشاسىن الا باستايدى. ەگەر اۋىر جۇمىس ىستەسە، ايەلدەرگە 50 جاستان باستاپ شىعۋعا مۇمكىندىك بەرىلگەن.

2021 جىلدان باستاپ شۆەسيادا ايەلدەر 60 جاستان شىعادى. ال بۇل دەرەك فرانسيادا ەرلەر مەن ايەلدەر ءۇشىن 62،5 جاستى قۇراپ وتىر. اۆستريادا ايەلدەر -60، ال ەرلەر 65 جاستان شىعادى. 2024 جىلعا قاراي ەلدە ايەلدەر دە، ەرلەردىڭ زەينەتكەرلىك جاسىنا تەڭەسىپ، زەينەتاقى 65 جاستان باستاپ تولەنە باستايدى.  

يزرايلدە زەينەتكەرلىك جاس ەرلەر ءۇشىن - 67، ال ايەلدەر ءۇشىن - 62 جاس.

نورۆەگيادا نەگىزى زەينەتكەرلىك جاس 67 جاس بولىپ ەسەپتەلەدى. ءبىراق كەيبىر پوليسيا، اسكەري ازاماتتار مەن باسقا دا كاتەگوريالار ءۇشىن 65، 63 جانە 60 جاس بولىپ وتىر.

شۆەيساريادا  ايەلدەر - 64، ەرلەر - 65 جاستان باستاپ زەينەتكەرلىككە شىعادى.

...اقيقاتى، قازاقستان مەن ەۋروپا ەلدەرىنىڭ تۇرمىستىق الەۋمەتتىك ەكونوميكالىق جاعدايىن سالىستىرۋعا كەلمەيدى. ءبىز ونسىز دا وتباسىلىق جاۋاپكەرشىلىك موينىنا تۇسكەن قازاق ايەلىنىڭ زەينەتكەرلىك جاسىن ۇزارتىپ، ولارعا سالماق سالىپ جىبەرگەن جوقپىز با؟ ءبىزدى وسى الاڭداتادى.