الاياقتىق ءۇشىن 6 جىلعا باس بوستاندىعىنان ايىرىلعان ءانشى گاۋھار الىمبەكوۆانىڭ ادۆوكاتى جۇماعالي زينەلوۆ ءىستىڭ جاي-جاپسارىن ايتىپ بەردى دەپ جازادى Qamshy.kz اقپارات اگەنتتىگى Tengrinews.kz سايتىنىڭ دەرەگىن نەگىزگە الىپ. ادۆوكات سوت ۇكىمىمەن كەلىسپەيتىنىن جانە تاياۋ ارادا اپەللياسيالىق سوتقا ارىز تۇسىرەتىنىن مالىمدەدى.

"حالىق ءبىلۋى ءۇشىن وقيعانىڭ ءمان-جايىنان باستايىن. بۇل 2013 جىلى بولعان ءىس. الماتى قالاسىنداعى رايىمبەك داڭعىلىنىڭ بويىنداعى "اقكەنت" تۇرعىن ءۇي كەشەنىندە تۇرىك كومپانياسى ءۇي سالعان. ونى ءىستىڭ فيگۋرانتى فەرۋزا وردابايەۆا اكىمدىكتە ىستەيمىن ءارى مەملەكەتتىك باعدارلامامەن 3 بولمەلى پاتەرلەردى 40 مىڭ دوللارعا الىپ بەرەمىن دەپ، 35 ادامدى الداعان. سولاردىڭ ىشىندە ءانشى گاۋھار الىمبەكوۆا دا بار. وردابايەۆا الىمبەكوۆانىڭ تالاي كونسەرتتەرىنە بارىپ، ءسۇيىپ تىڭدايتىن جانكۇيەرى بولعان، سوڭى تانىستىققا ۇلاسقان. ءسويتىپ، ەكەۋى قۇربى بولعان. الىمبەكوۆا سول الاياق قۇربىسىنىڭ ۇسىنىسىنان كەيىن ءۇش تۋىسىنىڭ اتىنان ءۇش بولمەلى 3 پاتەر العان"، - دەپ اڭگىمەلەدى ول.

العاننان كەيىن ءبىر جىلداي ۋاقىت تۇرعاننان كەيىن، ادۆوكاتتىڭ سوزىنشە، ەسكى تانىسى، قۇربىسى باقىت نازاروۆا ءانشىنىڭ ۇيىنە قوناققا كەلگەن. وسى كەزدە نازاروۆا ونىڭ ۇيىنە قىزىعىپ، ءوزى دە ساتىپ العىسى كەلەدى. وسىلايشا، ول دا وردابايەۆامەن تانىسىپ، ۇيگە 40 مىڭ دوللار اقشا بەرەدى. ءسويتىپ، ءبىر ايدىڭ ىشىندە نازاروۆا باسپانالى بولادى. ءانشى الىمبەكوۆا مەن ارىزدانۋشى نازاروۆا ەكەۋى ءبىر پودەزدە تۇرعان.

ال ۋاقىت وتە كەلە بۇل ءۇي نەگىزى كەلىسىمشارت بويىنشا ءبولىپ تولەۋگە ساتىپ الىناتىن، قۇنى الدەقايدا قىمبات ءۇي بولىپ شىعادى.

"سوندا الاياق ايەل بۇل ەكەۋىن باستاپقى جارنا رەتىندە 600 مىڭ تەڭگەسىن تولەپ، ءبىر جىلعا ۇيگە كىرگىزىپ قويعان دا، قالعان اقشاسىن قولدى قىلادى. ءۇي الىپ، ءماز بولىپ جۇرگەندە ەكى جىلدان كەيىن بۇلاردى باسپانا سالۋشى كومپانيا قۋىپ شىعادى. سويتسە، ءۇيدىڭ قۇنى 37 ميلليون بولىپ شىعادى. ءۇيدى العان كەزدە الدانعاندار مۇنىڭ ءبولىپ تولەۋ ارقىلى ساتىپ الىناتىن باسپانا ەكەنىن كەلىسىمشارتتا وقىماعان. الاياق تولەپ بەرگەن ەكى جىل بويى ولارعا ەشكىم تيىسپەگەن دە، وسى ۋاقىت وتكەننەن كەيىن ءۇي سالۋشى كومپانيا بۇلاردان اي سايىن 250 مىڭ تەڭگەدەي سوما تولەپ تۇرۋ كەرەك دەيدى. الدانعاندار وسى كەزدە عانا ەسىن جيىپ، الاياقتى قۇربانى بولعانىن تۇسىنەدى. ءسويتىپ، الىمبەكوۆا دا، ونىڭ قۇربىسى نازاروۆا دا، ولارمەن بىرگە وسىلايشا ءۇيلى بولعان تاعى 35 ادام دالادا قالادى"، - دەيدى ادۆوكات.

وسىدان كەيىن، زينەلوۆتىڭ ايتۋىنشا، زارداپ شەككەندەر الاياقتى ىزدەپ، سوتقا ارىز جازا باستايدى. بۇل كەزدە ءانشى گاۋھار الىمبەكوۆا شىعارماشىلىق ادامى بولعاندىقتان شارۋاسى كوبەيىپ، ارىز جازباي قالعان. 

"ياعني بۇل ىستە ءانشىنىڭ ءوزى زارداپ شەگىپ وتىر جانە ءبىر ەمەس، ءۇش بىردەي ءۇيدىڭ اقشاسىنان ايىرىلىپ وتىر. ارادا ۋاقىت وتكەندە، 2016 جىلى الماتى قالاسىنىڭ المالى اۋداندىق سوتى قىلمىستىق ءىستىڭ باستى فيگۋرانتى فەرۋزا وردابايەۆانى سوتتاپ، ونى 7 جىلعا باس بوستاندىعىنان ايىرادى"، - دەيدى ادۆوكات. 2017 جىلدىڭ سوڭىنا دەيىن اقشاسىن انشىدەن كۇتكەن باقىت نازاروۆا شىدامى تاۋسىلىپ، گاۋھار الىمبەكوۆانىڭ ۇستىنەن ارىز تۇسىرەدى. بۇل سوت ءىسى بويىنشا وتىرىس ءوتىپ قويعان بولسا دا، جاڭا زارداپ شەگۋشى پايدا بولعاندىقتان، ءىس قايتا كوتەرىلىپ، ەندى فەرۋزا وردابايەۆامەن بىرگە سوت الدىنا الىمبەكوۆا دا كەلەدى. مەملەكەتتىك ايىپتاۋشى الىمبەكوۆانى وردابايەۆامەن بىرگە الاياقتىق جاسادى دەپ، ياعني جابىرلەنۋشى نازاروۆانى وردابايەۆامەن تانىستىردى جانە جولىقتىردى دەپ، قىلمىستىق كودەكستىڭ 190-بابى، ياعني "الاياقتىق" بويىنشا ايىپتى دەپ تانۋدى، ءسويتىپ، سەگىز جىلعا باس بوستاندىعىنان ايىرۋدى سۇرايدى. بۇل نە دەگەن سۇمدىق؟ بىردە ءبىر تيىن پايدا كورگەن جوق، جاقسىلىق جاسايىن دەپ تانىستىرعانى ءۇشىن ءىستى بولۋى كەرەك پە؟"، - دەپ نارازىلىعىن ءبىلدىردى ادۆوكات.

نازاروۆانىڭ اراز-تالابى بويىنشا سوت كەشە، 2019 جىلدىڭ 30 قانتار كۇنى ءىستىڭ ەكى فيگۋرانتىنا قاتىستى ۇكىم شىعارادى. ول ۇكىم بويىنشا، فەرۋزا وردابايەۆا قازاقستان رەسپۋبليكاسى قىلمىستىق كودەكسىنىڭ 190-بابىنىڭ 4-بولىگىنىڭ 2-تارماعىندا كورسەتىلگەن قىلمىستى جاساۋدا كىنالى دەپ تانىلىپ، وعان 6 جىل 8 اي مەرزىمگە باس بوستاندىعىنان ايىرۋ تۇرىندەگى جازا تاعايىندالعان. ق ر "قازاقستان رەسپۋبليكاسى تاۋەلسىزدىگىنىڭ جيىرما بەس جىلدىعىنا بايلانىستى راقىمشىلىق جاساۋ تۋرالى" 2016 جىلعى 13 جەلتوقسانداعى زاڭىنىن 4-بابىنىڭ 1-تارماعى 2-تارماقشاسىنىڭ جارتىسىنا دەيىن قىسقارتىلىپ، وعان تۇپكىلىكتى تۇردە 3 جىل 6 اي مەرزىمگە باس بوستاندىعىنان ايىرۋ تۇرىندەگى جازا تاعايىندالعان. ال گاۋھار الىمبەكوۆا سوت ۇكىمىمەن التى جىلعا باس بوستاندىعىنان ايىرىلعان.

وسىلايشا، ادۆوكاتتىڭ ايتۋىنشا، بۇل ىستە ۇكىم وتە جىلدام ءارى ءمان-جايىن انىقتاماي جاتىپ شىعارىلعان. "مەن ايىپتاۋ اكتىسى قاتە شىعارىلعان دەپ ەسەپتەيمىن. گاۋھار الىمبەكوۆانىڭ بۇل ىستە كىناسى، پايدا كورگەنى، ارام پيعىلى بولعانى بىردە-بىر ەپيزودتا دالەلدەنبەگەن دەپ ەسەپتەيمىن. ونىڭ ۇستىنە ءوزى الداعىسى كەلگەن ادامعا وزىمەن كورشى ءۇيدى الىپ بەرە مە؟ بۇل لوگيكاعا جاتپايدى عوي"، - دەپ قورىتىندىلادى ادۆوكات ءسوزىن.

ەسكە سالايىق، ەلىمىزگە تانىمال اندەردىڭ اۆتورى، ءانشى گاۋھار الىمبەكوۆا 30 قاڭتاردا الاياقتىق ءۇشىن 6 جىلعا باس بوستاندىعىنان ايىرىلعان بولاتىن. 

ايتا كەتەيىك، ءانشىنىڭ "اق كەلىن"، "كوكتەمگە حات"، "جاس كەلىن"، "قىز سەزىمى"، "ورالشى ماحاببات"، "اقمارالىم" اندەرى جۇرتشىلىققا كەڭىنەن تارالىپ، تانىمال بولعان. ونىڭ انىنە جازىلعان ولەڭدەردى تانىمال ەسترادا جۇلدىزدارى ورىنداعان.