ەرەكشە اۋەزدى ۇنىمەن كەلىندەردى اتا-اناسىنىڭ بوساعاسىنان اتتاتىپ، ءوز شاڭىراعىنا قادام باستىرعان، وسيەتىن ءان ارقىلى جەتكىزگەن قازاقتىڭ اياۋلى ءانشىسىنىڭ باسىنا قارا بۇلت ءۇيىرىلدى. «اق كەلىن»،  «كەلىنگە وسيەت»، «ورالشى ماحاببات»، «جازىعىم نە؟» اندەرىنىڭ ورىنداۋشىسى گاۋحار الىمبەكوۆاعا «الاياق» دەگەن اتى جامان قىلمىس تاڭىلىپ، 6 جىلعا سوتتالىپ كەتە باردى.

«جازىعىم نە، مەن ءالى تۇسىنبەيمىن...

بار ما الدە جازعان ءبىر ءىسىم دەيمىن؟»

ءوزىنىڭ ورىنداۋىنداعى بۇل ءانى ارقىلى تاعدىرعا سۇراۋ سالىپ ەدى؟! ەندى، مىنە، جازىقتى اتانىپ وتىر. ءدال ءقازىر گاۋحار الىمبەكوۆانىڭ اندەرىن تىڭداپ وتىرمىن. «ءجۇزى جىلىدان تۇڭىلمە» دەگەن قازاق. ءوزىنىڭ ءجۇزى قانداي جىلى بولسا، اندەرى دە جىلى بۇل انشىگە «قىلمىسكەر» دەگەن اتاۋدى جابا سالۋ ءبىز سەكىلدى، سىزگە دە وڭاي ەمەسىنە سەنىمدىمىن.

بىرىنشىدەن «الاياق» دەگەنىمىز كىم؟ ءبىر ەمەس، بىرنەشە ادامدى سان سوقتىرعان، ءار ادامنان مىڭداعان، ميلليونداعان اقشا جيناپ الىپ، ءوزى شەتەلگە تايىپ تۇرعانداردى، تەك ءوز پايداسىن كوزدەگەندەردى قوعام «الاياق» دەپ تانيدى. ولاردىڭ جازاسى دا اۋىر بولۋى ءتيىس. سەبەبى شىن ماقساتتارى – جۇرتقا پايدام تيسە دەپ ەمەس، اقشالارىن الىپ، ءوزىم بايىسام دەگەن ارام نيەتتى العا تارتادى.

ال دەرەكتەرگە سۇيەنسەك، گاۋحار الىمبەكوۆا قۇربىسىنا كومەكتەسكىسى كەلدى دە، ءوزى دە وزگە بىرەۋگە الدانىپ قالدى. ماقساتى – ولجالى بولۋ ەمەس ەدى، كومەكتەسۋ! مۇنى ادۆوكاتى جۇماعالي زەينەلوۆ تا ءوز مالىمدەمەسىندە راستادى.

♦گاۋحار الىمبەكوۆانىڭ ادۆوكاتى ءىستىڭ ءمان-جايىن ءتۇسىندىردى

قازاققا بەلگىلى اقىن، جۋرناليست ەسەي جەڭىس ۇلى Fcaebook جەلىسىندەگى پاراقشاسىندا گاۋحار الىمبەكوۆانىڭ ونەردە عانا ەمەس، ومىردە دە ادال ەكەنىن جازدى. 

«گاۋھار اپكەمدى «جاس الاشقا» جۇمىسقا تۇرعان 1998 جىلدان بەرى بىلەتىندىكتەن، ونىڭ تابيعاتىن تۇسىنەتىندىكتەن، بىرنەشە انىنە سواۆتور بولىپ بىرگە جۇمىس ىستەپ كورگەندىكتەن، اياۋلى ءانشىنى "قىلمىسكەر" دەپ اتاۋعا قيمايمىن. 

قاتەلەسكەن بولار، زاڭنىڭ ءادىل سالتانات قۇرىپ، شىن الاياقتىڭ اقشا العانى دالەلدەنەتىنىنە سەنگەن بولار. قالاي دەگەندە دە، جىعىلعان ۇستىنە جۇدىرىق جۇمساۋدىڭ قاجەت ەمەس ەكەنىن ايتقىم كەلەدى. 

گاۋھاردىڭ ءبىز بىلەتىن الەمى - قياناتتان ادا. اقشا بەرگەن اداممەن اراسىندا تۇسىنىسپەۋشىلىك بولماعانى انىق اڭعارىلادى، ءبىراق ءجونسىز كۇستانالامايىق. ونەرگە ادال قازاقتىڭ ءبىر قىزى بولسا، ول گاۋھاردىڭ ءوزى»، - دەپ انشىگە قولداۋىن كورسەتتى.

مۇنى بار قازاق تا ءبىلىپ وتىر، اسىرەسە، ءانشىنى جاقسى تانيتىن ارىپتەستەرىنە بۇل جاعداي ايان. وسى تۇستا، «گاۋحاردى اقتاپ الماسا، قازاقتىڭ بەلدى انشىلەرىنە سىن» دەگەندى العا تارتقىم كەلىپ وتىر.

وسىدان 6-7 جىل بۇرىن Super Star جوباسى ارقىلى تانىلعان قايرات تۇنتەكوۆ تە ءىستى بولعان ەدى. 2012 جىلى ەشكىم زارداپ شەكپەگەن جول اپاتىنا سەبەپكەر بولعان ءانشى ءۇش جىلعا دەيىن كولىك ايداۋ قۇقىعىنان ايىرىلىپ، 40 كۇن تۇرمەگە وتىرىپ شىقتى.  بۇل كەزدە دە حالىق دۋ ەتتى، قايرات ءۇشىن انشىلەردەن، بيلىكتەن كومەك سۇرادى. وكىنىشتىسى، ەكى تاراپتان دا بۇل وتىنىشكە جاۋاپ بولمادى. الەۋمەتتىك جەلىدە سوزبەن بەلسەندىلىك تانىتقان انشىلەر ىسكە كەلگەندە وسال بولدى. دەرەكتەرگە سۇيەنسەك، قايرات تۇنتەكوۆتەن سوت تالاپ ەتكەن مورالدىق شىعىننىڭ جارتىسىن دا جيناپ بەرە المادى. قايرات تولىعىمەن جازاسىن وتەپ شىقتى، ەسەسىنە ونەردىڭ بيىگىنەن قۇلادى، ابىرويىنا نۇقسان كەلدى. ساحناعا باسىن تىكتەپ شىعۋى ءتيىس قايرات ءالى دە قارا پياردىڭ ناق ورتاسىندا. ءتىپتى ءبىر سۇحباتىندا «ساحناعا قايتا ورالمايمىن» دەپ مالىمدەگەن ەدى.  

ەندىگى كەزەك گاۋحار الىمبەكوۆاعا كەلدى مە؟ قازاعىمنىڭ انشىلەرىنە قارا كۇيە جاعۋدان اۋلاقپىن. الايدا انشىلەردىڭ بىرلىگىنىڭ بار-جوعى وسىندايدا بىلىنەدى. اۋىزبەن ايتۋعا، جازۋعا ءبارىمىز شەبەرمىز. تەك ايتقاندى ىسپەن كورسەتۋ ءبىر باسقا. كەشەلى بەرى الەۋمەتتىك جەلىدە بەلسەندىلىك تانىتىپ جاتقان انشىلەردى كوزىمىز شالىپ، ريزا بولدىق. ەندى سونى ىسپەن دالەلدەپ، گاۋحاردى تۇرمەدەن شىعارىپ الۋعا اتسالىسۋدى مىندەتىم دەپ تۇسىنسە ەكەن، بۇل قازاق.

جىگىت اعاسى اتانىپ، ونەردىڭ تورىندە وتىرعان «مۋزارتتان» باستاپ، حالىقتىڭ سۇيىكتى انشىلەرى قايرات نۇرتاس پەن تورەعالي تورەالى باستاعان توپ ءبىر تويلارىنىڭ اقشاسىن قيىپ بەرسە، ارىپتەستەرىنىڭ ابىرويىن دا ساقتاپ قالار ما ەدى؟!

دەرەككوزدەرگە سەنسەك، قايرات نۇرتاستىڭ ەڭ جوعارى ستاۆكاسى – 10 مىڭ دوللار، ەڭ كەمىندە 7-8 مىڭ دوللار الادى. تورەعالي تورەالىنىڭ دە تابىسى وسىنىڭ اينالاسىندا. بۇدان وزگە تانىمال انشىلەردىڭ ءبىر تويدان العان تابىسى ءبىر كولىكتىڭ قۇنىنا تەڭ. ال قازاقتا كىم كوپ، ءانشى كوپ.  

«كوپ تۇكىرسە كولدى» كورسەتىپ، كوز الدارىندا جۇرگەن ارىپتەستەرىنە ول انشىلەر وسىلاي قولداۋ كورسەتسە يگى.

گاۋحار الىمبەكوۆانى «سۇتتەن اق، سۋدان تازا» دەپ اقتاپ الۋدان اۋلاقپىز. بيلىككە جالبارىنىپ، كومەك سۇراۋدان تاعى اۋلاقپىز. ۇسەنوۆ سەكىلدى قىلمىس ىستەۋگە اۋەستەردى، ۇلكەن كولەمدە پارا السا دا، بيلىكتى اقشامەن قارق قىلعان ۆاسيليي نيلەردى قورعاعان سوت قورعانسىزدارعا كەلگەندە قايىرىمسىز ەكەنىن قاراپايىم حالىق جاقسى بىلەدى.

دوكەيلەردىڭ عانا جاعدايىن جاسايتىن بيلىك ونسىز دا بار، ال قورعانسىز قازاق بولسا، حالقىنان وزگە ەشكىمگە ارقا سۇيەي المايدى. ەندەشە، ىسپەن دالەلدە، قازاق!

گۇلىم جاقان