شولپان ەلگەزەكوۆا جايلى ەشتەڭە بىلمەيتىنمىن. سوڭعى تۇسكەن تەلەحيكاياسىنداعى وبرازىنا ءسۇيسىنىپ، «قانداي عاجاپ ايەل!» دەپ تاڭداي قاقتىم دا، قويدىم. «ەلگەزەكوۆانى جول اپاتىنان قايتىس بولدى» دەگەندە عانا ونى تاني باستادىم. قازاق كينوسى قانداي شەبەر اكتريساسىنان ايرىلعانىن سوندا ءبىر-اق ءبىلدىم. شولپان قازا بولعاننان كەيىن ونىڭ اتى اتالعان جەردىڭ بارىندە «شابدالى» كوركەم ءفيلمى دە قوسا ايتىلىپ ءجۇردى. الدىمەن ءفيلمنىڭ اتاۋى قىزىقتىردى. وسى كينو ارقىلى اكتريسانى دا تانىعىم كەلىپ، ءبىر تۇندە ءبىر دەممەن كورىپ شىقتىم.

قوستانايدا 2 جىل ءومىر ءسۇرىپ، جەتىسايدىڭ دا بەتاشار تويىنا قاتىسىپ كورگەن مەن بۇل ءفيلمنىڭ شىنايى ءومىردى ءدال كورسەتە العانىنا ءشۇبا كەلتىرمەيمىن. «شىمكەنتتىڭ جىگىتىنە تۇرمىسقا شىقپاۋ كەرەك»، «ديپلومدى العاننان كەيىن ەرتەرەك جۇمىسقا ورنالاسۋ كەرەك»، «جۇمىسقا ورنالاسۋ ءۇشىن مىندەتتى تۇردە تانىس تابۋ كەرەك»، «قىزدى تانيتىن، تەكتى جەردىڭ جىگىتىنە تۇرمىسقا بەرۋ قاجەت»، «تويدى دۇركىرەتىپ جاساۋ كەرەك»، «وقىعان قىزعا كوبىرەك قالىڭ مال تولەۋ كەرەك»، «شىمكەنتتىكتەر كەلىندى قۇلشا جۇمسايدى»، دەگەن سياقتى قازىرگى زاماننىڭ قاتىپ قالعان قاعيدالارى مەن قازاقتىڭ بويىنا ابدەن سىڭگەن ءارتۇرلى ادەتتەرىن ادەمى بەينەلەگەن ەكەن.

ءفيلمنىڭ جەلىسى جەڭىل دە، كۇردەلى دە ەمەس. اتاۋى دا ەرەكشە. ادەتتە قازاق كينو تۇسىرسە «ءومىر ءمانى»، «كوڭىل ءسانى»، «جۇرەك جىرى»، «سەزىم سىرى» دەگەن شابلونداردى تاڭداي سالماۋشى ما ەدى؟.. بۇل جولعى اتاۋ وزگەرەك.

ەلگەزەكوۆا ءفيلمنىڭ ءساتتى كادرلارى ءۇشىن بالشىق پەن شالشىققا باتتى. سان ءتۇرلى كۇيگە ءتۇستى، بىردە جىلادى، بىردە اشۋعا ءمىندى. وي، اللا-اي، نە دەگەن ەموسياعا باي! ول سولتۇستىكتىڭ سالقىنداۋ كوزقاراستاعى مەنتاليتەتىن ءدال بەرىپ، پروكۋروردىڭ زايىبىنىڭ مىنەز-قۇلقىن جاقسى بەينەلەگەن.

قىسقاسى، ءفيلمنىڭ ءون بويىندا ءبارى بار: ماحاببات، وسيەت، قۇرمەت، يمان، سىيلاستىق، قاناعاتشىلدىق، سەنىم، قاراپايىمدىلىق، ەڭبەك، باۋىرماشىلدىق، ادامگەرشىلىك، قوناقجايلىلىق.

قازاق كينوسى ساپالى ءبىر فيلممەن تولىققان ەكەن. ...كينو بار، ءبىراق ەندى ەلگەزەكوۆا جوق. «شابدالى» شولپانعا ارناپ جازىلعان سەكىلدى كورىندى ماعان نەمەسە شولپان «شابدالى» ءۇشىن تۋعانداي.

اقەركە ءابىلحان