قراڭعى ءتۇن، قاھارلى اياز قىسقان شاق، 
قام-قايعىسىز ويناپ وتىر ءۇش تومپاق... 
تىم جۇپىنى اياداي-اق ءۇي ءىشى، 
بەسىكتەگى نارستەنىڭ كەتىپ قالعان كۇيىسى. 
ەرەسەكتەۋ بىرەۋى ونى تەربەتەدى "الديلەپ"، 
شىقتى كەنەت پەش ماڭىنان كۇيگەن كيىز ءيىسى...

قاراشا ءۇيدى قارا تۇندە وت جۇتتى، 
قىزىل جالىن توقتار ءتۇرى جوق ءتىپتى. 
بەس ءسابيدىڭ بالدان ءتاتتى دەنەسى، 
اجال - ورتپەن ارپالىسقان ەلەسى.
كەتەر ەمەس، قالاي كەتسىن كوكەيدەن، 
اۋ، ءبىزدىڭ ەل ورتكە ورانىپ ەسەيگەن.

تۇنگى جۇمىس كەتتى اكە، كەتتى انا، 
قۋ مولادا قالدى قايران بەس بالا!
جانىپ كەتتى بەس اق كۇندىك جالعان-اي، 
جان باعىس دەپ جالماڭ قاققان ارمان-اي... 
جەر شارىنىڭ كەڭ بايتاعىن باسسا دا، 
بەس شارشى جەر بۇيرماعان قارعام-اي!
بەس بالا دەپ بەس مىڭ تەڭگە ىزدەگەن، 
ەرتەڭىنەن ەشبىر ءۇمىت ۇزبەگەن. 
قايران سەنىڭ سول ءۇمىتىڭ كۇل بولعان، 
بۇلدىرشىندەر اينالايىن ءبۇر جارعان. ...

ادىلەت احمەت