شىمكەنتتە ءۇشىنشى قاباتتان سەكىرىپ كەتكەن قىز ءوزىن كۇشپەن الىپ قاشقان جىگىت تۋرالى ايتىپ بەردى، دەپ حابارلايدى Qamshy.kz اقپارات اگەنتتىگى ەۋرازيا ءبىرىنشى ارناسىنىڭ دەرەگىن نەگىزگە الىپ. 

19 جاستاعى قىز ءوزىن-وزى ولتىرمەك بولعان. ەر ادام الىپ قاشىپ، زورلاپ، قورلىق كورسەتىپ، ايەلى بولۋعا ماجبۇرلەگەننەن كەيىن وسىنداي جانتۇرشىگەرلىك قادامعا بارعان. بويجەتكەن ءوزىنىڭ "قاقپانعا" قالاي ءتۇسىپ، قانداي سۇمدىقتى باستان كەشكەنى تۋرالى ايتتى. 

قاڭتار. جىل باسى. بولاشاققا جاڭا قادام باسقان شاق. ستۋدەنت قىز داياشى بولىپ جۇرگەن ءدامحاناداعى كۇتپەگەن تانىستىق ونىڭ ءومىرىن باستان-اياق وزگەرتىپ جىبەردى. كەلگەن قوناق بويجەتكەندى ۇناتىپ، تەلەفون ءنومىرىن سۇراعان. ءبىرىنشى كەزدەسۋدەن كەيىن-اق قىز جىگىتپەن ءارى قاراي ارالاسقىسى كەلمەيتىنىن تۇسىنەدى. بەتىن قايتارعانىنا توزبەگەن ەر ادام جاس قىزدى الىپ قاشىپتى.

"تەلەفونىمدى تارتىپ الىپ، ءوشىرىپ تاستادى. اق ورامال الىپ شىقتى. باسقا بولمەدە ايەلدەر كوپ بولاتىن. ءبىراق مەن "قالمايمىن" دەدىم. قۇلاق اسپادى"، دەيدى جابىرلەنۋشى.

"كۇيەۋ جىگىتپەن" جىنىستىق قاتىناسقا تۇسۋگە قىز ۇزىلدى-كەسىلدى قارسىلىق بىلدىرگەن. بۇعان كۇدىكتەنگەن "اتا-ەنەسى" بىردەن گينەكولوگقا الىپ بارىپ، پاكتىگىن تەكسەرتىپتى. كەيىن جاستاردى جالدامالى پاتەرگە جىبەرەدى.

"قىزدىڭ ىقتيارىمەن ەشتەڭە بولماعان. ونى ءماجبۇرلى تۇرلە پاكتىگىنەن ايىردى. زورلادى. ول مۇنى قالاماعان ەدى. بارىنشا قارسىلىق كورسەتتى. وقيعا 25ء-ى كۇنى بولىپ، 27ء-سى كۇنى قايتالانعان. ءبىز سوتقا دەيىن جەتكىزەمىز"،  دەپ حابارلادى جابىرلەنۋشىنىڭ زاڭدى وكىلى ەركىن قاھاروۆ.

بويجەتكەن ۇزاق ۋاقىت بويى ءوزى تاپ بولعان وتباسىنىڭ قورلىعىنا ۇشىرايدى. بەتىنە تۇكىرىپ، ءتىپتى سوققىعا دا جىققان... 31 قاڭتار – ءوزىنىڭ تۋعان كۇنىندە شاراسىز كۇيگە تۇسكەن جابىرلەنۋشى ءدارى ءىشىپ الىپ، ءۇشىنشى قاباتتان سەكىرىپ كەتەدى. ابىروي بولعاندا، امان قالىپتى. ءقازىر باس سۇيەك-مي جاراقاتىن الىپ، ومىرتقاسىنا زاقىم كەلىپ اۋرۋحانادا جاتىر.

"كوز الدىمدا ءولىپ كەتە جازدادى. قىزىمدى ولاردىڭ ۇيىنە جىبەرگىم كەلمەيدى. وزدەرى بەتپاق. ەنەسىن كوردىم. قىزىمدى قارعاپ سىلەدى. ولار بىزگە حات جولداعان بولاتىن، قىزىمنىڭ جازۋىن تانىعانمىن. سويتسەم، جازۋعا ماجبۇرلەپتى. داستۇرگە ساي تۋىستارىمدى جىبەردىم. ءبىراق الگىلەر قىزىمىزعا جولاتپاي قويعان"،  - دەيدى جابىرلەنۋشىنىڭ اناسى.

بۇدان بۇرىن شىمكەنتتىڭ پوليسيا دەپارتامەنتى حابارلاعانداي، 31 قاڭتاردا 19 جاستاعى قىزدىڭ ءوزىن ولتىرمەك بولۋىنا قاتىستى ق ر قك 105-بابى "ءوزىن-وزى ولتىرۋگە دەيىن جەتكىزۋ" بويىنشا سوتقا دەيىنگى تەرگەۋلەر ءجۇرىپ جاتىر. كۇدىكتى انىقتالىپ، ءال-فارابي اۋداندىق پوليسيا بولىمىنە جەتكىزىلگەن. وقيعانىڭ ءمان-جايى انىقتالۋدا.

ۇسىنعان: اسەل بولات قىزى