ق ر ەڭبەك جانە الەۋمەتتى قورعاۋ مينيسترلىگى قاراپايىم حالىق ءۇشىن نە ىستەدى؟ بۇگىنگى كۇنى بارشا قازاقستاندىقتى الاڭداتاتىن سۇراق تا وسى بولىپ وتىر. مينيستر مادينا ءابىلقاسىموۆا حانىمنىڭ بىلتىرعى جىلعى حالىق ءۇشىن ىستەگەنىن Facebook قولدانۋشىسى الەكساندر بارانوۆ جيىپ كورىپتى. جازباسى تومەندەگىدەي:

بىرىنشىدەن، 25 ميلليون تەڭگە مينيسترلىك باسشىلىعىنا ارنالعان 4 كولىكتى جالداۋعا جۇمسالدى. ءارى قاراي...

قازاقستان رەسپۋبليكاسى زەينەتاقى جۇيەسىن مودەرنيزاسيالاۋ جۇمىستارى مەن الەۋمەتتىك كومەكتىڭ جاڭا فورماتى ءۇشىن 35 ميلليون تەڭگە جۇمسالدى.

تاعى 35 ميلليون تەڭگە ۆيدەوكونفەرەنسيالارعا ارنالعان قۇرىلعىلارعا كەتتى؛

«جالپىعا ورتاق ەڭبەك قوعامى» رەسپۋبليكالىق فورۋمى مەن ەڭبەك كۇنىن تويلاۋ ءۇشىن مەملەكەت 16 ميلليون تەڭگەسىن قيدى؛

ءونىمدى جۇمىسپەن قامتۋ جانە بۇقارالىق كاسىپكەرلىك باعدارلاماسىن ناقتىلاۋ ءۇشىن 47،9 ميلليون تەڭگە جۇمسالىپتى؛

30 ميلليون تەڭگە الەۋمەتتىك كومەك الۋشىلاردى انىقتاۋ ءۇشىن قولدانىلاتىن ماقساتتى كريتەرييلەردى جەتىلدىرۋ بويىنشا ۇسىنىستار ازىرلەۋگە كەتسە، 6 ميلليون تەڭگە قازاقستانداعى كوپبالالى وتباسىلاردىڭ ءال-اۋقاتىن انىقتاۋ جۇمىستارىنا كەتىپتى؛

«قازاقستاندا ەڭبەك رەسۋرستارىن مەملەكەتتىك رەتتەۋدى دامىتۋدىڭ كەلەشەگى» تاقىرىبىنا ارنالعان اناليتيكالىق زەرتتەۋ ءۇشىن 18 ميلليون تەڭگە جۇمسالعان؛

«پارىز» بيزنەستىڭ الەۋمەتتىك جاۋاپكەرشىلىگى بايقاۋىن وتكىزۋ ءۇشىن 34 ميلليون تەڭگە بولىنگەن؛

11 ميلليون تەڭگە «الەۋمەتتىك ساياساتتىڭ دەموگرافيالىق ءوسۋ قارقىنىنا اسەرى» تاقىرىبىن زەرتتەۋگە جۇمسالىپتى.

بۇدان وزگە پوليگرافيالىق ءونىم (3،2 ميلليون)، ەسەپتەۋ تەحنيكاسىنا قاجەتتى ماتەريالدارعا (4،5 ملن)، تاپسىرىس حاتتار (700 مىڭ)، مينيسترلىككە ارنالعان كارتينالار (1،3 ملن)، پەردە (2،2 ملن)، كەڭسە كرەسلولارى (1،6 ملن) سىندى ۇساق-تۇيەك زاتتار ءۇشىن دە ميلليونداعان اقشا بولىنگەن. جالپى مينيسترلىكتەگى جۇمىس قىزىپ تۇر، مەملەكەتتەن بولىنگەن قارجى تولىق يگەرىلدى. تاعى قانداي ءمىن تاعاسىز؟

الەكساندر بارانوۆتىڭ Facebook-تەگى پاراقشاسىنان اۋدارىلدى

اۋدارعان: گۇلىم جاقان