قايران قازاق قالاي عانا كوپ بولار
بىزدەر ورتەپ جىبەردىك –
بەس بالانى – بەس گۇلدى…
پەرىشتەلەر-
پەيىشكە ۇشىپ كەتتى ولار،
مازالاماس ەندى قىزدار ەشكىمدى…
شەكەسى تار شەنەۋنىكتەر ۇساقتاپ،
بالالاردىڭ نەسىبەسى تونالدى….
ايازىندا استانانىڭ ءبىرىن-بىرى جىلىتۋمەن قۇشاقتاپ،
جاتقان قىزدار جالىندى وتقا وراندى…
بۇدان كەيىن بىزدەرگە كىم سەنەدى؟
كوكتەي سولدى قىزعالداقتار كوكورىم…
كوككە ۇشىپ كەتتى ولار، سەبەبى،
جەر بەتىندە پەرىشتەگە جوق ورىن!..
بەيكۇنالار، ازابىڭدى تارتامىن،
جۇرەگىمە سالار ءىزىن ءار سىز كۇن…
شىدادى ولار ايازىنا ارقانىڭ،
شىدامادى ايازىنا اتقامىنەر ارسىزدىڭ…
قىزىل وتقا قيدىق قالاي قىزداردى،
اياز بي جوق – الدان ولار نە كۇتتى؟.
ايازبەتتەر بولعانننان سوڭ ىزعارلى،
اياز اتا جارىلقار دەپ سەنىپتى…
اقوردامىز تۇرعان اسقاق قالادا،
بەس پەرىشتە كۇلىن كوككە ۇشىردى…
قىزىلوردا – قارماقشىدا قارماق سالىپ بالاعا،
ۋلى ءتۇتىن تۇنشىقتىردى ءۇش ۇلدى…
اۋزىن اشسا، ولەڭ ەمەس… زار شىققان،
قالامىن تەك قارۋ ەتكەن اقىنبىز.
بالا جاساي الماي ءجۇرىپ بالشىقتان،
بارىمىزدى ورتەپ كەلە جاتىرمىز…
ەل سەنەتىن ەرلەرىمىز قايدا الگى؟..
تۇرمىستىڭ بۇل تۇمانى ءالى تورلاۋدا…
الەۋمەتتىك قورعاۋىمىز اينالدى-
الەۋمەتتى قورلاۋعا!..
تاۋەلسىزدىك – باعىم-بارىم دەپ كەلەم،
ايتپەسە كوپ جۇرەكتەگى جارامىز…
بەس پەرىشتە قازاسىنا
بەتتەرى بۇلك ەتپەگەن
بيلىكپەنەن بىزدەر قايدا بارامىز؟!.
قاسيەتسىز تابىسا الماس كوپ ەلمەن،
قاسىرەتتى اتا-انانىڭ تاڭداۋى دەپ تاۋىپتى…
ءتىلسىز جاۋدى كىنالايمىز، دەگەنمەن،
بەتسىز جاۋلار بارىنەن دە ءقاۋىپتى!..
سوعىس جوقتا قۇرباندىقتىڭ الدى ەمەس بۇل، ارتى دا…
بولدى بىزگە بيىل كەلگەن قىس اۋىر…
اكىم ەگەر جاقىن بولسا xالقىنا،
التى ۇلىمىز بولار ەدى التى اۋىل!..
ءالينۇر دەپ قويعان اتىڭ كەرەمەت!
شەرىن قالاي تارقاتايىن كوڭىلدىڭ…
نۇر بولسا دا ەسىمىڭدە، نە كەرەك
نۇرىن كورمەي كەتتىڭ مىناۋ ءومىردىڭ…
ابزال دەگەن اتىڭ قانداي قاراعىم،
الدارىڭدا كوپ قوعامنىڭ قارىزى…
الديار دەپ قويسا دا اتىن بالانىڭ،
الديارعا جەتپەي كەتتى ارىزى…
باسپاناسىز قالدى قازاق قىس كۇنى،
پەرزەنتتەر جوق
تىرلىكتەن بۇل ءمان قاشتى…
بالالاردى ورتەگەن وت ۇشقىنى
انالاردىڭ جالىنىنا جالعاستى!..
ۇران بولار ۇلتتىڭ قاشان بار ءۇنى،
قۇتقارادى قۇلدىقتان كىم سانانى؟
وزەگىمدى ورتەگەن وت جالىنى
جانىمدى ورتەپ بارادى…
سۇرىنەتىن سۇيەكسىڭدى سۇرەدە
تەكسىزدىكتەن بىزگە باقىت جوق قونار…
ءتىلىن بىلمەس – تىرلىگىڭدى بىلە مە!
شەت تىلىندە سويلەيتىندەر شەت بولار!..
دار اعاشىن دايىنداعان داراعا،
تۇرمىسپەنەن تۇساۋ سالىپ داناعا،
تيىن-تەبەن تاستاپ قويىپ بالاعا،
بار بايلىعىن شاشىپ كەلگەن دالاعا،
ۇكىمەتكە ۇكىم ەتەر كۇن كەلدى!
شىعارايىق ىشتەن تىنعان ءۇندى ەندى-
ءسىز قايداسىز، ۇلتقا قارىز نار اعا؟!
ەرمىز بە ءبىز، ەلمىز بە ءبىز –
ەندەشە،
بەر بوستاندىق ساناعا!
قازىبەك يسا
ۇسىنعان: اسەل بولات قىزى
پىكىر قالدىرۋ