پارلامەنت دەپۋتاتتارىمەن كەزدەسكەن تۇرىكمەنستاننىڭ پرەزيدەنتى گۋربانگۋلى بەردىمۇحامەدوۆ ۇكىمەت پەن ەل الدىنا جاڭا مىندەتتەر قويدى. تۇرىكمەننىڭ مەملەكەت باسشىسى مىنبەردە سويلەگەننەن كەيىن ادەتتەگىدەي دەپۋتاتتار ورىندارىنان تۇرىپ، ۇزاق قول شاپالاقتادى.
ودان كەيىن پارلامەنت ءتورايىمى گۇلشات ماممەدوۆا ءسوز الىپ، دەپۋتاتتار الدىندا پرەزيدەنت گۋربانگۋلى بەردىمۇحامەدوۆكە ايرىقشا العىس سەزىمىن ءبىلدىردى. ونىڭ ءسوزى تۇرىكمەننىڭ بۇقارالىق اقپارات قۇرالدارىندا جاريالانعان جوق. ماممەدوۆانىڭ «باتىر اركاداگ»، «قۇرمەتتى اركاداگ»، «ۇلى اركاداگ» دەگەن سوزدەرى دەپۋتاتتاردىڭ ەرەكشە ىقىلاسىن وياتتى. ايرىقشا العىس پەن قول شاپالاقتاۋلار ۇزاققا سوزىلدى (اركاداگ – قامقورشىم-رەد). ەندى پارلامەنت ءتورايىمىنىڭ ءسوزىن كەلتىرەلىك...
«اسا قۇرمەتتى اركاداگ! ەلىمىزدىڭ زاڭدىلىق قىزمەتىن نىعايتۋ ماقساتىندا ءسىز ءوزىڭىزدىڭ التىن ۋاقىتىڭىزدى قيىپ، دەپۋتاتتارمەن كەزدەسۋگە كەلدىڭىز. بۇل ءبىز ءۇشىن – ۇلى جول! سول ءۇشىن سىزگە ايرىقشا ىقىلاسىمىزدى بىلدىرەمىز. ءسىزدىڭ ولشەۋسىز ەڭبەگىڭىزدىڭ ارقاسىندا ءبىزدىڭ تاۋەلسىز ەل جاڭا جەتىستىككە جەتتى. بۇل ارقىلى ءسىز وتانعا، حالىققا ەرەكشە ماحابباتىڭىزدى كورسەتتىڭىز. ءسىزدىڭ ءسوزىڭىز ميلليونداعان جۇرەكتەردى بيىك ماقساتقا جەتكىزدى.
زاڭعا ارقا سۇيەگەن مەملەكەت ەڭ مىقتى ەل بولىپ سانالادى. ءسىزدىڭ بۇگىنگى ءسوزىڭىز حالىققا قامقورلىعىڭىزدى، ءار ادامعا، ءار وشاققا دەگەن ەرەكشە كوزقاراسىڭىزدى تاعى دا كورسەتتى.
بۇكىل تۇرىكمەن حالقىنىڭ قامقورشىسى، قۇرمەتتى پرەزيدەنت! ءسىز بىزگە سەنەتىنىڭىزدى ايتتىڭىز. ءسىزدىڭ سەنىمىز ءبىزدى كۇن دەمەي، ءتۇن دەمەي جۇمىس ىستەۋگە جىگەرلەندىرەدى. ءبىز ارينە ايرىقشا ىقىلاسپەن جۇمىس ىستەيمىز!
قۇرمەتتى، قامقورشىمىز اركاداگ! ءبارى ءسىزدىڭ ارقاڭىزدا جۇزەگە اسىپ جاتىر. سىزگە مىقتى دەنساۋلىق تىلەيمىز!
...ايرىقشا جالىنمەن سويلەگەن سوزدەن كەيىن تاعى دا ۇزاق قول شاپالاقتاۋ. ادام دا ماقتاۋعا سونشالىقتى ماساتتانىپ، كوزىن شەل باسادى ەكەن عوي.
