مەكتەپكە ءمۇعالىم بولىپ كىرۋدىڭ قۇنى – 200 مىڭ تەڭگە! ال حالىققا قىزمەت كورسەتۋ ورتالىعىنداعىلار ەلەكتروندى ساندىق قولتاڭبانى 1000 تەڭدەگەن ساۋدالاپ، پايدا كورىپ وتىر! اقتوبە وبلىسى اكىمىنىڭ ەسەبىندە وسىلاي دەپ شۋ شىعارعان قالا تۇرعىنى بەردىبەك ساپاربايەۆتان تەز ارادا ماسەلەنى شەشىپ، ءوزىن ەكى اپتانىڭ ىشىندە جۇمىسقا ورنالاستىرۋدى تالاپ ەتتى. بۇل قانشالىقتى راس؟ قاۋەسەت پە، الدە راسىمەن اقتوبەلىك مەكتەپ ديرەكتورلارى جۇرتتان اقشا سۇراپ، دانىككەن بە؟ بۇل Qamshy.kz اقپارات اگەنتتىگى تۋرالى "ەۋرازيا ءبىرىنشى ارناسىنىڭ" دەرەگىن نەگىزگە الىپ حابارلايدى. 

«مەكتەپتەرگە بارامىن، 200 مىڭ تەڭگە كولەمىندە پارا تالاپ ەتەدى. قانشاما كۋاگەرلەر بار. ساپاربايەۆ مىرزا، سىزگە ءبىر اپتا ۋاقىت بەرەمىن. №60 مەكتەپ، ابزال تاجىمىشيەۆتى، ورنىنان الۋىڭىزدى تالاپ ەتەم!» – دەيدى تۇرعىن ءلاززات باداۋوۆا.

اشىنعان كەلىنشەك اكىم-قارالاردىڭ الدىندا توسىلمادى. بار جاعدايدى وسىلاي جايىپ سالدى. جالعىزباستى انا ەكەندىگىن، جۇمىسىنىڭ جوقتىعىنان نەسيەگە العان پاتەرىنىڭ اقىسىن تولەي الماي وتىرعانىن جەتكىزدى. وبلىس اكىمىنە تالاپ قويۋدان باسقا امالى جوقتىعىن ايتتى. ورتا جولدا ءسوزىن ءبولىپ، قولىنداعى ميكروفونىن الىپ، سابىرعا شاقىرماقشى بولعاندارعا قۇلاق اسپادى. سەبەبى، شاعىمى مۇنىمەن بىتپەدى. حالىققا قىزمەت كورسەتۋ ورتالىعىنىڭ الماتى اۋدانىنداعى بولىمشەسىندە باسشىسى ەلەكتروندى ساندىق قولتاڭبانى 1000 تەڭگەدەن ساتادى، كسەروكوشىرمەدەن پايدا تاۋىپ وتىرعانىن دا وسى كەلىنشەك ايتتى. ءلاززات باداۋوۆانىڭ ءار سوزىنەن كەيىن ەسەپكە جينالعاندار دۋ قول شاپالاق سوعۋمەن بولدى.

«سىزدەردەن سۇرايتىنىم، قارىنداس، ءسىز ەندى كىشكەنە سۇراق قويدىڭىز عوي، سۇراق قويعاننان كەيىن تىڭداۋ كەرەك! ايعايلاماڭىز، ۇيىڭىزگە بارىپ ايعايلاڭىز!» – دەيدى وبلىس اكىمى بەردىبەك ساپاربايەۆ.

ءوزىن “پارا الدى” دەپ ايىپتاعان ديرەكتورى ابزال ءتاجىمىشوۆ باستاۋىش سىنىپ ءمۇعالىمى ءلاززات باداۋوۆامەن قىزمەتتەس بولعانىن راستادى. №60 مەكتەپتە نەبارى 9 كۇن جۇمىس ىستەپتى. ول "كەزەكشىلىككە شىقپايمىن" دەپ، مەكتەپ ديرەكتورىنىڭ ورىنباسارىمەن سوزگە كەلدى، دەپ وتىر.

«ول كىسىنىڭ ايتىپ وتىرعان ءسوزىنىڭ ءبارى – جالعان. مەن پوليگراف، شىندىق دەتەكتورىنان وتۋگە دايىنمىن. وزىمە سەنىمدىمىن. سول ءسوزدى تاعى قايتالاپ ايتام. ول كىسى وسى جەردە جۇمىس ىستەپ كەتتى. نەگە كەتتى؟ ول كىسى كەشىرىم سۇراپ جىلادى. «مەن وزىمە قول جۇمسايمىن، سىزگە كورسەتەمىن» دەپ جازدى ماعان. سكريندەرى بار، سىزدەرگە كورسەتتىم. وسىنىڭ ءبارى سونداي جاعدايمەن اياقتالىپ، اقىر سوڭىندا ول كىسى جۇمىستان ارىزىن جازىپ، ءوزى كەتتى»، – دەيدى ابزال تاجىمىشيەۆ.

مەكتەپ ديرەكتورى ەندى ءوزىنىڭ سۋدان تازا، سۇتتەن اق ەكەنىن سوتتا دالەلدەيمىن دەپ دايىندالىپ وتىر. "ەلدىڭ الدىندا پاراقور اتانۋ ماعان دا وڭاي ەمەس" دەيدى. حالىققا قىزمەت كورسەتۋ ورتالىعىنىڭ بولىمشە باسشىسىنىڭ دا وسى كۇندەرى مازاسى قاشقان. كەلىنشەكتىڭ ايتقانى جالعان ەكەنىن ول دا ايتىپ وتىر.

«مەنىڭ اتىمدى اقشا جاساپ وتىر دەپ ايتقان، ەلەكتروندى ساندىق قولتاڭبانى 1000 تەڭگەدەن ساتىپ وتىر دەپ شىقتى، ول جالعان اقپارات. وزدەرىڭىز كورىپ وتىرعانداي، ەسق مەملەكەتتىك ستاندارتتار بويىنشا تەگىن تاراتىلادى. كسەروكوشىرمەنىڭ ماعان قاتىسى جوق. جەكە كاسىپكەرمەن اكىمدىك كەلىسەدى. مىنا جەردە اسحانا، بانك وتىر. ونىڭ ءبارى اكىمشىلىكپەن كەلىسىمگە وتىرادى»، – دەيدى حالىققا قىزمەت كورسەتۋ ورتالىعى №3 بولىمشەسىنىڭ باسشىسى ەركىنباي ءجۇسىپ ۇلى.

قالا اكىمىنىڭ ەسەبىندە ءوزىن تولعاندىرعان ماسەلەنى ايتىپ، شەندىلەردى ءبىر سىلكىپ العان كەلىنشەكتىڭ جاعدايى بويىنشا جان-جاقتى تەكسەرىس ءجۇرىپ جاتىر ەكەن. ءبىر قىزىعى، وسى وقيعادان دەيىن الماتى اۋدانى حالىققا قىزمەت كورسەتۋ ورتالىعىنداعى كسەروكوشىرمە اپپاراتتى ۇشتى-كۇيلى جوق قىلىپ جىبەرگەن. ال وبلىستىق ءبىلىم باسقارماسىنىڭ باسشىسى جۇمىسسىز جۇرگەن كەلىنشەكتى قالا مەكتەپتەرىنىڭ بىرىنە ورنالاستىرۋ ماسەلەسىن قاراستىرىپ جاتقانىن جەتكىزدى.

ۇسىنعان: اسەل بولات قىزى