بۇگىن قازاقستاننىڭ  №1 لەديى، حانىمى، "بوبەك" قورىنىڭ پرەزيدەنتى سارا الپىس قىزى 78 جاسقا تولدى دەپ جازادى Qamshy.kz اقپارات اگەنتتىگى. بۇل تۋرالى جانار بايسەمىزوۆا ءوزىنىڭ فەيسبۋك پاراقشاسىنا جازدى. 

ول تاۋەلسىزدىكتەن كەيىن، ەلگە ەڭ العاش ءوزىن-وزى تانۋ ءىلىمىن اكەلدى. ماحاببات، مەيىرىمدىلىك، ىزگىلىككە تولى ادامگەرشىلىك قاسيەتتەردى ناسيحاتتادى. ادام وزگەنى تانۋ ءۇشىن الدىمەن ءوزىن-وزى تانىپ، ءبىلۋى قاجەت ەكەنىن ايتتى. 

نەگىزى،شىنتۋايتىنا كەلسەك، سارا الپىس قىزى قازاق حالقىنا وتە قاجەت دۇنيەنى دارىپتەدى. ءبىراق ءدال سول كەزەڭدە ونىڭ ءىلىمىن باسقالار ناۋقانشىلىققا اينالدىرىپ جىبەردى. حالىق سونداي تەرەڭ، رۋحاني ءىلىمدى الۋعا دايىن بولمادى. 70 جىل قۇدايدان الشاقتاتقان كەڭەستىك جۇيە قازاقتاردىڭ بويىنداعى يماني قاسيەتتەردى جويىپ جىبەرگەن ەدى. قايتا تۇلەۋگە كوپ ۋاقىت كەتتى. 

سارا الپىسقىزىن سوڭعى رەت يۋسا تەلەارناسىندا جۋرناليست بولىپ جۇرگەندە كوردىم. ول كەزدە مەنىڭ بويىمدا جاستىق ماكسيماليزم جانىپ تۇرعان كەز ەدى. ءبىزدىڭ ءبىرىنشى تاپسىرمامىز سىناۋ، پرولەما ىزدەۋ بولاتىن. وزىمىزشە ادىلدىك ىزدەپ، حالىققا جاق بولاتىن تاقىرىپتار كوتەرىپ ءجۇرمىز، بيلىكتى سىناپ ءجۇرمىز دەپ ءماز ەدىك. سول كەزدەگى ءبىزدىڭ پوزيسيامىز، وزىمىزدىكى ەمەس بوتەن كوزقاراستاردىڭ كورىنىسى بولعانىن ءقازىر تۇسىنەمىن. 

"بوبەك" قورىنىڭ جينالىسىنا بارعاندا وسى جۇيەدەگى جۇمىستى سىناپ، ءبىرىنشى حانىمنىڭ قاعيدالارى قازاققا جات ەكەنىن جاتا كەپ سوعىپ، سيۋجەت بەردىم. ءوزىم ءبىر كەرەمەت ەرلىك ىستەگەندەي ماساتتاندىم. 

ءبىراق ۋاقىت وتە كەلە مەن قاتەلەسكەنىمدى، قايىرىمدىلىققا، ءوزىن-وزى تانۋعا، رۋحاني جاڭعىرۋعا قارسى تۇرعانىمدى ۇعىندىم. ارادا كوپ جىل وتكەن سوڭ، ءبىر كۇنى كوز الدىما وزىنەن ءوزى سارا الپىس قىزىنىڭ سول جيىنداعى بەينەسى كەلە قالدى. 

زالعا ادەمىلەپ كىرگەن ءبىرىنشى حانىم، وزىنە ءسوز بەرىلگەندە باسىن كوتەرىپ، جان-جاعىنا سۇيىسپەنشىلىكپەن قاراپ: "داۆايتە پو فيلوسوفستۆۋەم"، - دەدى جۇمساق ۇنىمەن. مەن جاپ-جاس قىز، ءبىر ءسات اڭتارىلىپ قالدىم...
"قالاي؟ قالاي پو فيلوسوفستۆۋەم..." دەدىم، ىشتەي كۇبىرلەپ... 

سول شاقتاردا سارا الپىس قىزىنىڭ حالقىنا جارىق ساۋلە تاراتقىسى كەلگەنىن، وزىنە اشىلعان ءىلىمدى بولىسكىسى كەلگەنىن كەيىن ۇقتىم. 
وسىلايشا، ماعان بىرنەشە جىلدان كەيىن وزارەنيە كەلدى. 

مەن سىزدەن كەشىرىم سۇرايمىن، سارا الپىس قىزى. 
مەن ءسىزدى جاقسى كورەمىن، سارا الپىس قىزى. 
ءومىرىڭىز ۇزاق بولسىن! 
ءوزىن ءوزى تانۋ بىزگە قاجەت! 
ءسىز ەككەن ءدان، ەندى شىعىپ جاتىر! 

ۇسىنعان: ماقپال سەمباي