اقتوبە قالالىق ءماسليحاتىنىڭ ءبىر توپ دەپۋتاتى كوپبالالى انا گۇلنازيرا سماعۇلاۆانىڭ جاعدايىمەن تانىستى. التى بالالى انا جاتاقحانانىڭ تار بولمەسىندە تۇرىپ جاتىر. بەسىكتەگى بالاسىن ۇيىندە قالدىرىپ، بازاردا ەدەن جۋۋشى بولىپ جۇمىس جاسايدى دەپ جازادى Qamshy.kz اقپارات اگەنتتىگى aktobenews.kz سايتىنىڭ دەرەگىن نەگىزگە الىپ. 

كەلىنشەك 47 مىڭ تەڭگە جالاقى مەن 10 مىڭ تەڭگە جاردەماقى الادى. دەپۋتاتتار كەلىنشەكتىڭ كىشكەنتاي بالالارىن بالاباقشاعا ورنالاستىرۋعا دا كومەكتەسكەن.

«ءبىر بولمەلى پاتەردە تۇرىپ جاتقان كوپبالالى انانىڭ ۇيىنە باردىق. تۇرمىسقا قاجەتتى تەحنيكا، كىلەم، ازىق-تۇلىك جەتكىزىلدى. بولمەنىڭ ەسىگىن اشقاندا ۇيگە قاتتى جەل كەلەدى ەكەن. بەسىكتە ءبىر جاسقا تولعان بالا جاتىر. سول سەبەپتى كىرە بەرىسىنە شاعىن ءدالىز ورناتۋ جۇمىستارى جۇرگىزىلىپ جاتىر. كوپبالالى انانىڭ كوممۋنالدىق قارىزدارى دا جينالىپ قالعان ەكەن. بارلىق كوممۋنالدىق قارىزدارى تولەندى. وتباسىنا ءارى قاراي كومەكتەسەتىن بولامىز»،- دەيدى قالالىق ءماسليحاتىنىڭ باسپا ءسوز قىزمەتى.

ۇسىنعان: اسەل بولات قىزى