سۇرىقسىز ومىرىنەن جالىعىپ، اقىر سوڭىندا ونى ساتىپ جىبەرگەن يەن اشەر بۇگىن باي ءارى باقىتتى. ال ول ءومىرىن قالاي ساتىپ جىبەردى دەيسىزدەر عوي؟..

يەن اشەر باقىتتى وتباسىن قۇرىپ، سۇيىكتى ىسپەن اينالىسۋدى ارمانداعان قاراپايىم ازامات ەدى. الايدا ەكەۋىندە دە ازاماتتىڭ جولى بولمادى.

جاسى 50-گە تاياپ قالعاندا ول اۆسترالياداعى كىشىگىرىم دۇڭگىرشەكتە كىلەم ساتۋشى بولىپ جۇمىس ىستەگەن. ايەلىمەن ارا-قاتىناسى بۇزىلىپ، شەگىنە جەتكەندە، يەن كۇيزەلىسكە قاتتى تۇسەدى. وسىلايشا، ءوزىن دە، ءومىرىن دە جەك كورىپ كەتتى، ابدەن جالىقتى. مىڭ ويلانىپ-تولعانىپ اقىرى سۇرىقسىز ءومىرىن ساتۋعا شەشىم قابىلدادى.

 ول eBay ارقىلى ءوز ءومىرىن ساۋداعا سالدى. وندا: بۇكىل جيھازى بار ءۇيى، كولىگى، موتوسيكلى، پاراشيۋت جابدىقتارى، جۇمىس ورنى جانە دوستارى مەن تانىستارى كىردى. «وسىمەن ءومىرىمدى اياقتادىم، ونىمەن قوش ايتىسامىن» دەپ جازدى سوڭىندا. قىزىق بولعاندا، ءومىرى كادىمگىدەي ساۋداعا ءتۇستى. العاشقى باعاسى 1 دوللار ەدى.  ءبىر اپتادان سوڭ 305 مىڭ دوللارعا ءبىر-اق شىقتى. ءومىرىن مىڭداعان دوللارعا ساتىپ جىبەرگەن يەننىڭ اشەردىڭ تەك قۇجاتى عانا قالدى.

«مەن تىلسىم، اياقاستى بولاتىن دۇنيەلەردى جاقسى كورەمىن. ءبىراق، شىن مانىندە ءومىرىم قىزىقسىز ءوتتى. ىستەگەن ىسىمنەن راحات المايتىن كۇيگە جەتتىم، بارىنەن جالىقتىم دا، باس تارتامىن دەپ شەشتىم»، - دەپ يەن وتكەن ءومىرىن ەسىنە الدى.

قولىنا قوماقتى قارجى تيگەن يەن اشەر الدىنا 100 ماقسات قويىپ، ءتىزىمىن جاسادى دا، ءبارىنىڭ ورىندالۋىنا 100 اپتا ۋاقىت جۇمساۋعا وز-وزىنە ءسوز بەردى. وسىلايشا دۋبايعا ۇشاققا بيلەت الىپ، ماقساتىنىڭ العاشقىسىن باعىندىرا باستادى. العاشقى ماقساتى كۇن استىندا تاۋ شاڭعىسىن تەبۋ بولدى. ەكى جىلىن ۇزدىكسىز ساياحاتتاۋمەن وتكىزدى: يسپانيادا بۇقالارمەن الىستى، افريكادا اكۋلالارمەن، جاپونيادا كيتتەرمەن ءجۇزدى. ۇشاق باسقارۋدى ۇيرەندى. قىتايدىڭ ۇلى قورعانىن جاياۋ ءجۇرىپ ءوتتى، الەمدەگى ەڭ ءىرى سارقىرامالاردى ءوز كوزىمەن كوردى. لوندوندا ءوزىنىڭ كۋميرى – كاسىپكەر ريچارد برەنسونمەن تانىسىپ، ءتۇبى دوستىققا ۇلاستى. گولليبۋدتە فيلمگە ءتۇستى. ءتىپتى كەي فيلمدەرگە تەگىن تۇسكەن.

ەكى جىل وتكەن سوڭ يەن اشەر 100 ماقساتتىڭ 93ء-ىنىڭ ورىندالعانىن بايقادى. ال قالعان 3 ارمانى اياقسىز قالدى. ونىڭ ۇستىنە، ونىڭ 30 مىڭ دوللارى قالعان ەدى. ءسويتىپ قولىنداعى اقشاسىنا پاناما   جاعالاۋىنان تاستاندى ارال ساتىپ الادى. ول جەردە سۇيىكتىسى مومەن تۇرادى. يەن مەن مو ءقازىر بالالارعا ارنالعان كىتاپ شىعاراتىن باسپاحانا اشقان. سونىڭ ارقاسىندا يەن تابىس تاۋىپ ءجۇر.

«ەندى قاراپايىم جۇمىس ىستەمەيمىن»، - دەپ  وز-وزىنە ۋادە بەردى. ەڭ باستىسى، ول – باقىتتى. 

دايىنداعان: گۇلىم جاقان