تاجىكستاننىڭ ءىىم قىزمەتكەرلەرىنە كوركەم ادەبيەت پەن پرەزيدەنتتىڭ كىتاپتارىن وقۋ مىندەتتەلدى دەپ حابارلايدى Qamshy.kz اقپارات اگەنتتىگى currenttime.tv سايتىنىڭ دەرەگىن نەگىزگە الىپ. بۇل تۋرالى تاجىكستاننىڭ ءىىم رامازان راحيمزونا مالىمدەدى.
رەسمي دەرەكتەرگە سۇيەنەتىن بولساق، كىتاپحانالار ىشكى ىستەر باسقارمالارى مەن بولىمدەرىندە اشىلاتىن بولادى.
ءىىم قىزمەتكەرلەرى كىتاپحاناعا ارنايى تارتىپپەن بارادى. كىتاپحاناعا كەلگەن ءار ميليسيا قىزمەتكەرىنىڭ ءاتى-جونىن، قاشان قانداي كىتاپ العانى تۋرالى ءتىزىم جاسالادى سول ارقىلى ءار اي سايىن كىمنىڭ قانداي كىتاپ وقىعانى تۋرالى ەسەپ بەرىلەدى ەكەن. سونداي-اق ميليسيا قىزمەتكەرلەرىنىڭ گازەت-جۋرنال نەمەسە باسقا جانرداعى كىتاپتار وقۋى ەسەپكە الىنبايدى. ولار تەك كوركەم ادەبيەت پەن پرەزيدەنت ەمومالي روحماننىڭ كىتابىن وقۋى قاجەت.
سونىمەن بىرگە تاجىك ميليسياسى اعىلشىن جانە ورىس ءتىلىن جەتىك مەڭگەرۋ مىندەتتەلگەن.
اۋدارعان: اسەل بولات قىزى
