كوپ بالالى، جالعىزباستى جانە الەۋمەتتىك جاعىنان از قامتىلعان انالاردى قولداۋعا ارنالعان شارا ءبىرىنشى كەزەكتە 200 ادامدى قامتيدى. بۇل تۋرالى Qamshy.kz اقپارات اگەنتتىگى اتىراۋ وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساپ حابارلايدى.
اتىراۋدا «جايىق» سپورت كەشەنىندە وبلىس اكىمىنىڭ ەسەپ بەرۋ كەزدەسۋى جالعاسۋدا. نۇرلان نوعايەۆ ەكى مىڭ ادامنىڭ الدىندا «اتىراۋ وبلىسىنىڭ 2018 جىلعى الەۋمەتتىك-ەكونوميكالىق دامۋ قورتىندىلارى تۋرالى» بايانداما جاساپ، بيىلعى جوسپارلاردى اتاپ ءوتتى.
نۇرلان نوعايەۆتىڭ ايتۋىنشا، ءقازىر ايماقتا كوپ بالالى جۇمىسسىز انالاردى، جالعىزباستى، مۇگەدەك بالا تاربيەلەپ وتىرعان جانە الەۋمەتتىك جاعىنان از قامتىلعان انالاردى قولداۋعا باعىتتالعان جاڭا شارالار جاسالعان. شارا اياسىندا انالار جاڭا ماماندىق مەڭگەرۋدىڭ قىسقا مەرزىمدى كۋرستارىنا قاتىسادى. ءبىرىنشى كەزەڭدە كۋرسقا 200 ادام قاتىسادى دەگەن جوسپار بار. ايەلدەردىڭ تاڭداۋلارىنا 10 كاسىبي باعىت بەرىلەدى، كۋرس 15 كۇنگە دەيىن سوزىلادى. وقۋ اياقتالعان سوڭ قاتىسۋشىلارعا سەرتيفيكات بەرىلەدى.
- كۋرستاردى ازاماتتىق ورتالىقتىڭ ماماندارى دايىندادى. ءبىزدىڭ ماقساتىمىز – ايەلدەردى كاسىپكەرلىك نەگىزدەرىنە وقىتۋ، سول ارقىلى ءوز ىستەرىن باستاپ، ماقساتتارىن ايقىنداپ، العا قاراي دامۋلارىنا قولداۋ كورسەتۋ. بۇگىندە وڭىردەگى كاسىپكەرلەردىڭ 47% - ايەلدەر. بۇل كورسەتكىشتى ءالى دە ارتتىرۋ كەرەك، - دەدى اتىراۋ وبلىسىنىڭ اكىمى.
جۇمىسسىز انالاردى وقىتاتىن ون باعىتتىڭ ىشىندە تىگىنشى، اسپاز، شاشتاراز، مانيكيۋر، ۆيزاج، بۋحگالتەريا، ەمدىك ماسساج، ينتەرنەت-ساۋدا داعدىسى، SMM سەكىلدى كۋرستار بار. وقۋ اپتاسىنا ءۇش رەت جۇرەدى، ناۋرىز ايىنان باستاپ توپ جينالادى.
-كۋرس بارىسىندا ايەلدەر جاڭا ماماندىقتى يگەرىپ قانا قويماي، الەۋمەتتىك جەلىلەردە ءىس جۇرگىزۋ، ماركەتينگ پەن بيزنەس نەگىزدەرىنە ونلاين رەجيمدە وقي الادى، - دەدى نۇرلان نوعايەۆ.
ايتا كەتەيىك، اتىراۋ وبلىسىندا 1 اقپان 2019 جىلعى مالىمەت بويىنشا، 12 249 كوپ بالالى انا جاردەماقى الادى، ونىڭ ىشىندە 5557 «كۇمىس القا»، 3594 «التىن القا» يەگەرلەرى، 10 جانە ودان دا كوپ بالا تاربيەلەپ وتىرعان 983 باتىر انا بار. مەملەكەتتەن جاردەماقى الاتىن انالاردىڭ جالپى سانى – 22 383 ادام.
مەكەن-جاي الەۋمەتتىك كومەگىن 2035 وتباسى (10949 ادام) الادى.
كۋرستارعا وقۋعا جۇمىسسىز كوپ بالالى انالار، جالعىزباستى انالار، مۇگەدەك بالا تاربيەلەپ وتىرعان جانە الەۋمەتتىك وسال توپتاعى انالار شاقىرىلادى.
