بۇگىن الماتى قالاسىنىڭ اكىمى باۋىرجان بايبەك مەگاپوليس حالقىنىڭ الدىندا ەسەپ بەردى، دەپ جازادى Qamshy.kz اقپارات اگەنتتىگى.
اكىمنىڭ حالىق الدىندا ەسەپ بەرۋ شاراسى 3 مىڭعا جۋىق ادام سىياتىن رەسپۋبليكا الاڭىندا ءوتتى. اكىم ءوزىنىڭ بايانداماسىندا جىلدىق قورىتىندى جاساپ، بىرنەشە ماسەلەلەرگە توقتالىپ ءوتتى. سولاردىڭ ءبىرى – ءال-فارابي كوشەسىندەگى جىلدامدىقتى ساعاتىنا 60 شاقىرىمعا دەيىن ازايتۋ ماسەلەسى بولدى.
قالانىڭ جوعارعى بولىگىندە ورنالاسقان ۇلكەن كوشەلەردىڭ بىرىندە قوزعالىس جىلدامدىعىن ازايتۋعا بايلانىستى ءبىرشاما كولىك جۇرگىزۋشىلەرى شاعىمدارىن ءبىلدىرىپ، قايتادان جىلدامدىقتى بۇرىنعى قالپىنا كەلتىرۋدى تالاپ ەتكەن بولاتىن. مەگاپوليس باسشىسىنىڭ بۇل شەشىمىنە قارسى شىققاندار دا بولدى. باۋىرجان بايبەك بۇل ماسەلەگە قاتىستى تۇرعىنداردىڭ نارازىلىعىنا جاۋاپ بەرىپ، نە سەبەپتى ونداي شەشىم قابىلداعانىن ءتۇسىندىردى.
«ءال-فارابي كوشەسى – كولىكتەر جارىساتىن جول ەمەس، قالا ىشىندەگى تراسسا. ول كوشەدەگى جىلدامدىقتى ساعاتىنا 60 شاقىرىم ەتىپ ازايتقاننان كەيىن جول اپاتى 2،7-گە دەيىن تومەندەگەن.
بۇرىندارى بىرەۋلەر جىلدامدىقتى اسىرىپ، تەز جۇرسە دە، بار بولعانى 2-3 مينۋت قانا ۇنەمدەيتىن. قازىرگى تاڭدا ءبىز اناليز جۇرگىزىپ جاتىرمىز، ءبارى دە ءبىر قالىپپەن جۇرەدى، جىلدامدىقتى اسىرمايدى، توقتاپ قالمايدى، قوزعالىس الدەقايدا جىلدام. ءجۇرىپ كەلىپ، جىڭىشكە جەرىنە كەلگەندە ءبارى تۇرىپ قالمايدى، ءبىرقالىپتى ترافيك ساقتالۋدا. ال كەپتەلىس ۋاقىتىندا ورتاشا جىلدامدىق 23 شاقىرىمعا دەيىن تومەندەيدى»، - دەدى قالا اكىمى.
ونىڭ ايتۋىنشا، ءال-فارابي كوشەسىندە جىلدامدىقتى ازايتۋ تەك كولىكتى جوعارى جىلدامدىقپەن ايدايتىندارعا عانا ىڭعايسىزدىق تۋدىرىپ وتىر.
«كىم كولىكتى جارىسىپ جوعارى جىلدامدىقتا ايداعىسى كەلەدى سولار قالانىڭ سىرتىنا بارىڭدار، قاپشاعاي تاس جولى بار نەمەسە باسقا دا تراسسالار كوپ. بۇعان قارسى شىققانداردىڭ وتباسىندا جول اپاتىنىڭ قۇرباندارى جوق. ەگەر جاقىندارىڭىزدىڭ ءبىرى قانداي دا ءبىر قايعىلى جاعدايعا تاپ بولعاندا بۇلاي ايتپاس ەدىڭىزدەر، ءبىز ءۇشىن ءاربىر ادامنىڭ ءومىرى ماڭىزدى. جول اپاتىنىڭ قۇرباندارى – بىرەۋىنىڭ اتا-اناسى، تۋىسى، اپكەسى، قارىنداسى، ال قارسىلىق ءبىلدىرىپ وتىرعاندار ءۇشىن ولار ەشكىم دە ەمەس. بۇل – وتە ۇلكەن تراگەديا. ادام ءولىمىن ازايتۋ – بۇگىندە ءبىزدىڭ باستى ماقساتىمىز»، - دەدى باۋىرجان بايبەك.
ايتا كەتەيىك، الماتى اكىمى باۋىرجان بايبەكتىڭ بۇگىنگى حالىق الدىندا ەسەپ بەرۋ جيىنىنا پرەمەر-مينيستردىڭ ورىنباسارى ەربولات دوسايەۆ، پارلامەنت دەپۋتاتتارى مەن مينيسترلىك وكىلدەرى قاتىستى.
ۇسىنعان: نازەركە لابيحان
