الماتى قالاسىنىڭ اكىمى باۋىرجان بايبەك بۇگىنگى ەسەپ بەرۋ كەزىندە پوليسيا قىزمەتكەرلەرىنىڭ جۇمىسى مەن جەمقورلىق تۋرالى پىكىر ءبىلدىردى دەپ حابارلايدى Qamshy.kz اقپارات اگەنتتىگى. 

"پوليسيا قىزمەتكەرلەرى كوشەدە اۆتوماتپەن ءجۇرىپ، كۇندە ادام ءولتىرىپ جاتقان جوق. ءقازىر كوشەدە ەمىن-ەركىن جۇرەمىز. سول تىنىشتىقتى كىم قامتاماسىز ەتىپ وتىر؟ ءبىراق بارلىق پوليسيا قىزمەتكەرلەرىن جاقسى دەپ  ماقتاي المايمىز. ءبىز پارا الاتىن پوليسيا قىزمەتكەرلەرىن قولعا ءتۇسىرىپ، زاڭ جۇزىندە جازالاۋىمىز كەرەك. ولاردان قورقۋدىڭ قاجەتى جوق. سەبەبى ناۆيگاتور بار، ءبارى جازىلادى. سونىمەن بىرگە ارام جولمەن اقشا تاپقىسى كەلەتىن پوليسيا قىزمەتكەرلەرى پسيحولوگ بولىپ كەلەدى. كىمنىڭ پارا بەرىپ، بەرمەيتىنىن جاقسى بىلەدى. ەگەر الدىنا كەلگەن ادام پارا بەرمەيتىن ادام بولىپ، بىردەن ۆيدەوعا ءتۇسىرىپ السا، نان تاۋىپ وتىرعان جۇمىسىنان ايىرىلاتىنىن بىلەدى. سوندىقتان قازىرگى پوليسيا قىزمەتكەرلەرى بارىنشا ساق بولۋعا تىرىسىپ ءجۇر"، دەيدى باۋىرجان بايبەك. 

اكىم سونداي-اق حالىقتى دا جەمقورلىقپەن كۇرەسۋگە شاقىردى. 

"ادامدار پوليسيا قىزمەتكەرلەرىن پارا الدى دەپ سىناپ-مىنەپ جاتادى. ال پارا العان پوليسەيدىڭ ۇستىنەن ارىز جاز دەسەڭ، جازعىسى كەلمەيدى. جاۋاپكەرشىلىكتى العىسى كەلمەيدى، ارىز جازىپ ءوز ايتقانىن، كورگەنىن دالەلدەگىسى كەلمەيدى. بىرگە ارىز جازايىق، بىرگە قىلمىستى اشىپ، دالەلدەيىك. ءتارتىپتى بىرگە ەنگىزەيىك. جەمقورلىق بولعان جاعدايدا كوپتەگەن ادامدار ماعان حات جازىپ جاتادى. ال ولارعا مەن ارىز جازىڭىز دەسەم، "ونىڭ دا بالا-شاعاسى بار عوي، ول دا ادام بالاسى عوي"، دەپ باسىن الا قاشادى"، دەيدى اكىم. 

"تاعى دا قايتالاپ ايتامىن. پوليسەيلەر پارانى جاي-جاي المايدى. زاڭ بۇزعان ادام ونىڭ قالتاسىنا تىعىپ، پارا بەرەدى. ەگەر پوليسيا قىزمەتكەرلەرى پارا سۇراپ جاتسا، ءسىز ۆيدەوعا ءتۇسىرىپ، الەۋمەتتىك جەلىگە جاريالاڭىز. سىزدەن پارا سۇراعان پوليسەي بىردەن جۇمىستان قۋىلادى. جەمقورلىقپەن ءبىز جالعىز ءوزىمىز كۇرەسە المايمىز. حالىقتىڭ دا كومەگى قاجەت. مەن ءقازىر پوليسەيلەردىڭ قاسىنا ءبىر-بىر اكىمشىلىك قىزمەتكەرىن قويىپ، "باقىلاپ وتىر" دەپ تاپسىرما بەرە المايمىن"، دەيدى بايبەك. 

ۇسىنعان: اسەل بولات قىزى