ءبىر ايعا جۋىق ۋاقىت بولدى، ۆەنەسۋەلادا قوس ۇكىمەت بيلىگىن جۇرگىزىپ تۇر. قوزعالىستىڭ ءبىر جاعىندا ۇلتتىق اسسامبلەيانىڭ ءتوراعاسى، اقش-تىڭ قولداۋىمەن باسشى بولعان حۋان گۋايدو، ال ەكىنشى جاعىندا ەلدىڭ قازىرگى پرەزيدەنتى نيكولاس مادۋرو تۇر. ءبىراق  ءبىر اي ۋاقىت وتسە دە،  جاعداي شەشىلگەن جوق، تارتىس ءورشىپ بارادى.

23 اقپان ۆەنەسۋەلانىڭ تاعدىرى شەشىلەتىن كۇن. ويتكەنى الدىن الا جەتكەن مالىمەتتەرگە قاراعاندا، اقش 23 اقپان كۇنى ۆەنەسۋەلاعا گۋمانيتارلىق كومەك رەتىندە اۋىر ماشينالاردىڭ كوشىن كىرگىزبەك. ال مادۋرو اقش تاراپىنان جىبەرىلگەن كومەكتى قابىلداۋعا قارسى. ءتىپتى اۋىر كولىكپەن كەلەتىن جولداردىڭ بارلىعىن دا جاپتى. مادۋرونىڭ بۇيرىعىمەن 15 مىڭ سانايپەر ءقازىر وقۋ اتۋعا دايىن تۇر. كەشە ءوزىنىڭ جاقتاستارى الدىندا ءسوز سويلەگەن نيكولاس مادۋرو «اش قالساق تا، اقش-تان كومەك المايمىز» دەپ مالىمدەمە جاسادى. سونىمەن قاتار، بۇكىل ەل حالقىن كوشەگە ميتينگكە شىعۋعا شاقىردى. وتكەن اپتادا ەلدەگى جاعدايدى بىلۋگە كەلگەن ەۋروپارلامەنتتىڭ بەس دەپۋتاتىن ىشكە كىرگىزبەي نيكولاس مادۋرو شەكارادان كەرى قايتارىپ جىبەردى.

ال باتىس ەلدەرى مەن اقش-تان جەتكەن كومەك ءقازىر برازيليا مەن كولۋمبيانىڭ شەكاراسىندا تۇر. وپپوزيسيا سايلاعان پرەزيدەنت حۋان گۋايلو «قانداي جاعدايعا قاراماستان  شەكارادا تۇرعان گۋمانيتارلىق كومەكتى ىشكە كىرگىزۋگە اتسالىساتىنىن» جەتكىزدى.

–مەنىڭ جاقتاستارىم دا تۇگەل كوشەگە شىعادى. كومەكتى تاراتۋعا ەرىكتىلەر جاساقتالىپ جاتىر. بىزگە ازىق-تۇلىك كەرەك. ايتپەسە، ۆەنەسۋەلا حالقى اشتان ولەدى. قايىرىمدىلىق پەن قامقورلىقتان باس تارتپاۋىمىز كەرەك،-دەپ مالىمدەدى ءوزىن-وزى پرەزيدەنت ەتىپ جاريالاعان حۋان گۋايدو.

انىعىنا كەلسەك، گۋايدو كىمگە سەنىپ وتىر؟ ارينە، ەڭ الدىمەن، اقش-قا!

دۇيسەنبى كۇنى دونالد ترامپ اقش-تاعى ۆەنەسۋەلا دياسپوراسىنىڭ الدىندا ءسوز سويلەپ، «ەگەر نيكولاس مادۋرو بەيبىت جاعدايدا بيلىكتى وتكىزبەسە، ونىڭ سالدارى اۋىر بولاتىنىن» ايتتى.

–ەگەر ولار وسى جولدى تاڭداسا، وندا ولار بارلىعىنان دا ايرىلادى. ءتىپتى تىعىلاتىن جەرتولە دە تاپپاي قالاتىن بولادى. سوندىقتان ويلانۋعا بىر-ەكى كۇن عانا قالدى»،– دەدى دونالد ترامپ.

كەيبىر دەرەكتەرگە قاراعاندا، ۆەنەسۋەلاعا اسكەري جورىق جاساۋعا اقش تاراپىنان قاتتى دايىندىق شارالارى جۇرگىزىلىپ جاتقانعا ۇقسايدى. كەشە ءبىرقاتار ب ا ق وسىدان ءبىر اپتا بۇرىن ۆەنەسۋەلامەن شەكارالاس مەملەكەتتەرگە ترانسپورتتىق-اسكەري ۇشاقتار جەتكىزىلگەنىن ءمالىم ەتتى. ازىرگە ەكىنشى پرەزيدەنت حۋان گۋايدونىڭ جاعىنا ەكى اسكەري گەنەرال عانا وتكەن. ءبىراق ولاردىڭ قاراماعىندا ەشقانداي ارميا جوق. ال اسكەر تولىقتاي نيكولاس مادۋرونىڭ بۇيرىعىن كۇتىپ تۇر. ءبىراق اقش پەن ونىڭ وداقتاستارىنىڭ قىسىمى كۇن وتكەن سايىن كۇشەيىپ بارادى. ال مادۋرونى جاقتاپ وتىرعاندار – رەسەي، مەكسيكا، بوليۆيا، كۋبا جانە جۇڭگو.

...بۇل مادۋرو مەن گۋايدونىڭ عانا ەمەس، الپاۋىت مەملەكەتتەردىڭ دە تايتالاسى.