الماتى اكىمى باۋىرجان بايبەك ەسەپ بەرۋ جيىنى كەزىندە قالا تۇرعىندارىنىڭ لاس اۋا تۋرالى ساۋالدارىنا جاۋاپ بەردى.

«قالاداعى اۆتوتۇراقتاردى ازايتا باستاعان ەدىك، باسىمىز داۋعا قالدى. بىرەۋلەر ماشينا بەر دەيدى، بىرەۋلەر كولىكتى كىرگىزبە دەيدى. بىرەۋ تەز جۇرگىم كەلەدى دەيدى، بىرەۋ تازا اۋا كەرەك دەيدى. مەن قايدان الام تازا اۋانى؟ ءوزىڭ اۋانى لاستاما. مەن دە سول لاس اۋامەن دەمالىپ جاتىرمىن. ءقازىر جوتەلىپ وتىرمىن، اللەرگيام بار. بالالارىم ءۇشىن دە، جاقىندارىم ءۇشىن دە الاڭدايمىن. الماتى تۇرعىنى رەتىندە الاڭدايمىن»، - دەدى باۋىرجان بايبەك.

ونىڭ ايتۋىنشا، الماتى اۋاسىنىڭ لاستانۋىنا 70 پايىز كولىكتەردىڭ بولەتىن ۋلى گازى سەبەپ بولىپ وتىر. سوندىقتان، 10 شارانىڭ 7ء-سى كولىك سانىن ازايتۋعا باعىتتالعان.

«30 جولايرىق سالىندى. كولىكتەر ازايدى ما؟ كەرىسىنشە، ىڭعايلى جاعداي جاساعان سايىن كولىك سانى كوبەيە تۇسەدى. قالانىڭ كەدەي تۇرعىندارى كولىكپەن جۇرەتىن قالا باقۋات ەمەس، كەرىسىنشە جاعدايى جاقسى ادامدار اۆتوبۋسپەن جۇرەتىن قالا باقۋاتتى. ءبىزدىڭ مىندەت - ءبارىن اۆتوبۋسقا وتىرعىزۋ»، - دەدى ول.

ۇسىنعان: نازەركە لابيحان