قاراعاندىداعى №6505 اسكەري بولىمىندە وققا ۇشقان ساربازدىڭ دەنەسى تابىلدى دەپ حابارلادى Qamshy.kz اقپارات اگەنتتىگى كتك تەلەارناسىنىڭ دەرەگىن نەگىزگە الىپ.

بۇل جولى دا قازا تاپقان جاڭا شاقىرتىلعان جاپ-جاس جاۋىنگەر. اسكەريلەر ونى دا «ءوزىن اتىپ ءولتىردى» دەپ وتىر. دەگەنمەن، قارالى حاباردان قابىرعاسى قارس ايىرىلعان تۋىستارى ساربازدىڭ سۋيسيد جاساعىنا سەنبەيدى. سەبەبى، مارقۇم الدىڭعى كۇنى عانا ۇيىنە حابارلاسىپ، اسكەري ءومىردىڭ ۇناپ جاتقانىن ايتقان.

تاڭ اتپاستان سۋىت حابار ەستىگەن انا قايتا-قايتا ەسىنەن تانىپ جاتىر. ال، جەتپىستەگى اجەسى بولسا سەنبەي، نەمەرەسىنە قويماي قوڭىراۋ سوعۋدا. ايتۋىنشا، جاقىندا عانا اسكەردەن حات العان ەكەن. وندا سارباز ۇلتتىق ۇلاندى جەر-كوككە سىيعىزباي سيپاتتاپ، كومانديرلەرىمەن ماقتانعان. ودان قالدى، الدىڭعى كۇنى عانا اناسىنا قوڭىراۋ شالىپ، اسكەري ءومىردىڭ ۇناپ جاتقانىن ايتقان. دەگەنمەن، سولاي دەگەن ساربازدى باسشىلارى «سۋيسيد جاسادى» دەپ سەندىرىپتى. 

«قاتارداعى ءالىبي ساپا وز-وزىنە قول-جۇمساپ، قارۋ ارقىلى مەرت بولعانى انىقتالدى. كوڭىل-كۇيى جاقسى بولعان ەدى. كەنەتتەن بولعان جاعداي. ونداي ويى جوق بولاتىن. ءبارىمىز تاڭ قالىپ وتىرمىز»، - دەيدى 6505 اسكەري ءبولىم كومانديرىنىڭ ورىنباسارى ماقسۇت جۇسىپبەكوۆ.

جالپى، 6505 اسكەري بولىمدەگىلەر جاۋىنگەرلەرىنىڭ ولىمىنە جىلدا تاڭ قالىپ جۇرسە كەرەك. ويتكەنى، 2013-تە دە، 2014-تە دە مۇندا بىرنەشە سارباز ولگەن. وندا دا وز-وزىنە قول جۇمسادى دەلىنگەن. ونىڭ بىرەۋى اسىلعان كۇيى تابىلسا، قالعانى وق جاراقاتىنان ولگەن.  ال 18 جاستاعى ءالىبي ساپانىڭ قازاسىنا قاتىستى تەرگەۋ باستالىپ تا كەتتى. 

وققا ۇشقان ساربازدىڭ دەنەسى تاڭعى 7:40-تا تابىلىپتى. اينالاسى جيىرما مينۋتتىڭ ىشىندە ساراپتاما جاساپ تاستاعانداي، اسكەري بولىمدەگىلەر «بالا ءوز-وزىن اتىپ ءولتىردى» دەگەن شەشىم شىعارىپ قويعان دەيدى تۋىستارى.

ۇسىنعان: اسەل بولات قىزى