باقىتجان ساعىنتايەۆتىڭ ۇكىمەتتەگى التى جىلدىق جورىعى سونىمەن اياقتالدى. ونىڭ الداعى ۋاقىتتا قايدا باراتىنى تۋرالى اڭگىمە بولەك. اقيقاتى، باقىتجاننىڭ جولى اشىق بولدى. 2012-213 جىلدارى «نۇر وتان» حدپ-نىڭ ءتوراعاسىنىڭ ءبىرىنشى ورىنباسارى قىزمەتىندە بولعاننان كەيىن ونىڭ لاۋازىمدىق قىزمەتىندە ورلەۋ باستالدى. ءبىر ءسات كوز جۇگىرتىڭىز، 2013 جىل 16 قاڭتاردان باستاپ جاڭادان قۇرىلعان قازاقستان رەسپۋبليكاسىنىڭ وڭىرلىك دامۋ ءمينيسترى جانە پرەمەر-مينيسترىنىڭ ءبىرىنشى ورىنباسارى.
2013 جىلدىڭ 6 قاراشاسىندا مەملەكەت باسشىسىنىڭ جارلىعىمەن پرەمەر-مينيستردىڭ ءبىرىنشى ورىنباسارى – وڭىرلىك دامۋ ءمينيسترى قىزمەتىنەن بوساتىلىپ، پرەمەر-مينيستردىڭ ءبىرىنشى ورىنباسارى بولىپ تاعايىندالدى. 2014 جىلعى 7 ساۋىردەن قازاقستان رەسپۋبليكاسى پرەمەر-مينيسترىنىڭ ءبىرىنشى ورىنباسارى. ساعىنتايەۆ 2016 جىلدىڭ قىركۇيەگىنەن ۇكىمەت باسشىسى قىزمەتىن اتقاردى. ءبارىن قوسقاندا ول ۇكىمەتتە التى جىلدان استام ۋاقىت بويى جۇمىس ىستەدى.
ارينە ساعىنتايەۆتىڭ ۇكىمەتىندە كەمشىلىكتەر دە ورىن الدى. ونىڭ ەڭ شىرقاۋ شەگى كوپ بالالى انالاردىڭ جانايقايى دەر ەدىك. دەگەنمەن 2،5 جىل جۇمىس ىستەگەن بۇل ۇكىمەتتىڭ ءوز ارتىقشىلىقتارى دا بولدى. سونىمەن...
- ساعىنتايەۆ ۇكىمەتى تاۋەلسىز قازاقستان تاريحىنداعى ەڭ قازاقى ۇكىمەت بولدى.
- ۇكىمەتتىڭ كەڭەيتىلگەن ءماجىلىسى كوپ جاعدايدا مەملەكەتتىك تىلدە ءوتتى.
- ساعىنتايەۆ ۇكىمەت مۇشەلەرىنە تاپسىرمالاردى تازا قازاق تىلىندە بەردى.
- ۇكىمەت باسشىسى رەتىندە باقىتجان ءابدىر ۇلى ءوزىنىڭ جانىنا جاس مينيسترلەردى جينادى
- ساعىنتايەۆ سەنىم ارتقان جاس مينيسترلەر سەنىمدى اقتادى.
- ەگەر پرەزيدەنت قالاسا، داۋرەن ابايەۆ، جەڭىس قاسىمبەك، دارحان قالەتايەۆ، تيمۋر سۇلەيمەنوۆ سياقتى بۇرىنعى ساعىنتايەۆ ۇكىمەتىنىڭ مۇشەلەرى كەلەسى جاساقتالاتىن ۇكىمەت قۇرامىندا تاعى قالۋى مۇمكىن.
- ءوزى قىزمەت ەتكەن جىلدارى قازاقى پرەمەر باقىتجان ساعىنتايەۆتىڭ سوڭىنان قاۋەسەت ەرگەن جوق. ول تاسماعامبەتوۆتەن كەيىنگى قازاققا جانى جاقىن ۇكىمەت باسشىسى رەتىندە تاريحتا قالدى. ول «ەلىمىزدىڭ سان مىڭ جىلدىق تاريحىنداعى ەڭ جاۋاپتى كەزەڭدە حالقىمىزدىڭ باعىنا بەرگەن ۇلى دا جاسامپاز تۇلعاسى» ەلباسىنا العىس ايتتى دا، قىزمەتىنەن كەتتى.
