تارازداعى كوپقاباتتى ۇيدەن شىققان جارىلىس سالدارىنان، سوڭعى دەرەكتەر بويىنشا، ءۇش ادام قازا تاپتى، دەپ حابارلايدى Qamshy.kz اقپارات اگەنتتىگى جامبىل وبلىسىنىڭ پوليسيا دەپارتامەنتىنىڭ باسپا ءسوز قىزمەتىنە سىلتەمە جاساپ. 

وسىعان دەيىن ەكى ادامنىڭ - ايەل ادام مەن ەر ادامنىڭ قازا تاپقانى حابارلانعان ەدى.  بىرنەشە ساعاتتان سوڭ ءۇيىندى استىنان ءۇشىنشى قۇرباننىڭ دەنەسى تابىلدى. زارداپ شەككەن التى ادام تاراز قالاسىنىڭ №1 اۋرۋحاناسىندا اۋىر حالدە جاتىر.

ەسكە سالايىق، بۇل وقيعا بۇگىن، 27 اقپاندا تاڭعى ۋاقىتتا بولعان. ناقتىلانعان مالىمەتتەر بويىنشا، 145 ادام ەۆاكۋاسيالانعان. ءۇش پاتەر بۇلىنگەن. سونداي-اق، سول ۇيدەگى تۇرعىنداردىڭ كوبى پاتەردى جالداپ تۇرعانى ايتىلادى.

«شامامەن ساعات 06.20-دا 9-ىقشاماۋداندا جارىلىس سالدارىنان زارداپ شەككەندەر جايلى مالىمەت ءتۇستى. بارلىعى التى ادام زارداپ شەكتى، ءۇش ادام وقيعا ورنىندا قازا تاپتى. ءۇش ادام قالالىق №1 جانە №2 اۋرۋحانالارعا، سونداي-اق، وبلىستىق بالالار اۋرۋحاناسىنا جەتكىزىلگەن. ءۇش ادامعا كومەك كورسەتىلىپ، ولار ۇيىنە جىبەرىلدى. اۋرۋحاناعا جاتقىزىلعاندار قاجەتتى دارى-دارمەكتەرمەن قامتاماسىز ەتىلدى»، - دەپ حابارلادى باسپا ءسوز قىزمەتىندەگىلەر.

سونىمەن قاتار، №47 مەكتەپ بازاسىنا زارداپ شەككەندەرگە مەديسينالىق جانە پسيحولوگيالىق كومەك كورسەتۋ ماقساتىندا دارىگەرلەر مەن پسيحولوگ ماماندارىنىڭ كومەگى كورسەتىلىپ جاتقانى ايتىلادى.

ۇسىنعان: اسەل بولات قىزى