بۇزاقىنىڭ جاۋىزدىعى مۇنىمەن بىتپەگەن. ول قورعانسىز ايەلدەردى قول-اياعىن ماتاپ بايلاپ، تەپكىلەپ، بىرەۋىنىڭ كوزى مەن بەتىن پىشاقپەن جاراقاتتاعان، دەپ حابارلايدى Qamshy.kz اقپارات اگەنتتىگى ەۋرازيا ارناسىنىڭ دەرەگىنە سۇيەنىپ.

ايدىڭ كۇنى امانىندا قاريالاردىڭ زارە-قۇتىن قاشىرعان قىلمىسكەر كىم؟ زارداپ شەككەندەردىڭ جاعدايى قالاي؟

72 جاستاعى زىليحا قوسپايەۆا ابدەن ۇرەيلەنىپ قالعان. بەت-اۋزى كوگالا قويداي. ءۇيدىڭ ىشىندە ءالى قان ىزدەرى جاتىر. زەينەتكەر جايسىز جاعداي كەشقۇرىم بولعانىن ايتادى. ءوزى ىدىس جۋىپ، ال 65 جاستاعى ءسىڭلىسى سىرتقى ەسىك جابىق پا، تەكسەرۋگە شىققان بەتى ەكەن. ءبىر كەزدە ۇيگە ەڭگەزەردەي جىگىت كىرىپ كەلىپتى. سودان كەيىن نە بولعانى ەمىس-ەمىس عانا ەسىندە. 

«ءسىڭلىمنىڭ بەتىن پىشاقپەن وسىپ جىبەرگەن. دالاداي قان بولدى. پىشاقتى قاردىڭ ۇستىنە تاستاي سالا قاشقان. ەكەۋمىزدى دە تەپكىلەپ، ۇرىپ-سوقتى. مەنىڭ ءتىسىم سىنعان. دۇرىس سويلەي المايمىن. "ميلليوندارىڭ بار، بەر قانە"، دەدى! سوسىن ءسىڭلىم، "قايداعى اقشا، ءبىز زەينەتكەرمىز، الاتىنىمىز تيىن-تەبەن" دەگەن. تاعى دا ۇردى. سوسىن سومكەدەگى 1000 تەڭگەنى بەرىپ ەدىك، ازسىندى، ءسىڭلىم تاعى دا 1000 تەڭگەنى بەردى»، - دەيدى قالا تۇرعىنى زىليحا قوسپايەۆا.

ەكى زەينەتكەردى بەتىنەن، ىشىنەن تەپكىلەپ، اقشا سۇراۋىن دوعارماعان جىگىت قوڭىراۋ سوعۋعا وقتالعان زىليحا اپانى بايقاپ قاپ، تەلەفوننىڭ سىمىن ءۇزىپ تاستاپتى. وسى كەزدە زەينەتكەر دالاعا قاشىپ ۇلگەرىپ، بار داۋسىمەن ايقايلاپ كورشىلەرىنەن كومەك سۇراعان. جەدەل جاردەم شاقىرعان.
زىليحا قوسپايەۆا مەن سىڭلىسىنە كىمنىڭ شابۋىل جاساعانى جۇمباق كۇيىندە قالىپ وتىر. الايدا زەينەتكەردىڭ ءوزى "بار پالە قارسى ۇيدەگى كورشىلەرىمنەن كەلدى" دەپ قويمايدى. "بۇرىننان ماعان قىرىن قاراپ ءجۇر" دەپ وكپەسىن ايتتى. ءتىپتى، سول ءۇيدىڭ بولمەسىن جالعا الىپ وتىرعان جىگىت ءبىزدى ۇرىپ-سوققان دەپ سەنىمدى ايتىپ وتىر. ءبىراق، قۇدايى كورشىلەرى "بۇل بىزگە جابىلعان جالا" دەدى. 

پوليسەيلەر ەكى زەينەتكەردىڭ كورشىلەرىنەن جاۋاپ الىنعانىن ايتتى. الايدا، قاراقشىلىق شابۋىل جاساعان كۇدىكتىنى ءالى تاپپاعان. ىزدەستىرىپ جاتىر.

«اتالعان دەرەككە سايكەس، ق ر قىلمىستىق كودەكسنىڭى 192-بابى، قاراقشىلىق بويىنشا تەرگەۋ جۇرگىزىلىپ، كۇدىكتىنى انىقتاۋ بويىنشا قاجەتتى شارالار قابىلدانۋدا»، دەپ مالىمدەدى وبلىستىق پوليسيا دەپارتامەنتى باسپا ءسوز قىزمەتىنىڭ جەتەكشىسى ەربولات سارقۇلوۆ.

زىليحا قوسپايەۆانىڭ پىشاق جاراقاتىن العان ءسىڭلىسى اۋرۋحانادا ەم قابىلداپ جاتىر. سول جاق كوزى مەن بەت سۇيەگى زاقىمدانعان. ال زىليحا اپايدىڭ ءوزى اۋرۋحاناعا جاتۋدان باس تارتقان. ويتكەنى، بولعان جاعدايدان كەيىن ءۇي-جايىن تاستاپ كەتە المايدى.

ۇسىنعان: نازەركە لابيحان