وزبەكستان پرەزيدەنتى شاۆكات ميرزيەيەۆ نامانعان وبلىسىنا ساپارى بارىسىندا كورتەجى بازار ماڭىنان ءوتىپ بارا جاتىپ، اياق استى توقتايدى. «ەڭ بولماعاندا پرەزيدەنتتىڭ كورتەجىن كورىپ قالايىق» دەگەن بازار حالقى ءاپ ساتتە قۋانىشقا بولەنە كەتتى. ولاردى قۋانتقان – كولىگىنەن شىققان شاۆكات ميرزيەيەۆتىڭ ءوزى ەدى.
پرەزيدەنت كولىگىنەن شىقتى دا، حالقىمەن ءبىر امانداسىپ الىپ، وبلىسقا بايلانىستى الداعى جوبالاردىڭ جوسپارىمەن ءبولىستى. جاڭا ساناتوريي، كاسىپورىندار، مەكتەپتەر مەن جۇمىس ورىندارىنىڭ سالىناتىنىن ايتىپ، نامانعاندىقتاردىڭ قۋانىشىن ەسەلەي ءتۇستى.
ال الەۋمەتتىك جەلىدە حالىقتىڭ كورتەجدى قالاي قارسى العاندىعى تۋرالى ءتۇرلى ۆيدەولار جۇكتەلىپ ۇلگەردى.
وزبەكستان پرەزيدەنتى مەملەكەت باسشىسى تاعىنا وتىرعالى، ءتۇرلى مالىمدەمەلەر جاساپ، الەمدى تاڭعالدىرۋدا. ەل پرەزيدەنتتەرى ايتپاعاندى ميرزيەيەۆ ايتتى. ماسەلەن، ءوزى جايلى فيلمدەر تۇسىرۋگە، اندەر جازۋعا، ماداقتاما جىرلار ارناۋعا قاتاڭ تىيىم سالدى. ال بۇيرىققا باعىنباعاندار قاتاڭ جازالاناتىنىن ەسكەرتتى. بۇل – حالىقتى جاعىمپازدىقتان ارىلتاتىن بىردەن ءبىر ءادىس دەسەك، ەل مادەنيەتىن دامىتۋ ءۇشىن دە ۇلكەن قادامدار جاسادى. كينو سالاسىنا كوپ قارجى ءبولدى، تويلارداعى كەلەڭسىزدىكتەردى ەسكەردى. شەنەۋنىكتەرگە تويلارعا بارۋعا مۇلدەم تىيىم سالدى.
ۇسىنعان: گۇلىم جاقان
