"The World’s Best" اتتى امەريكالىق شوۋداعى قازاقستاننىڭ اتىنان تاعايىندالعان ساراپشى مامان جانە ءادىل قازى القاسىنىڭ مۇشەسى گاۋحار نۇرتاس سايىس تۋرالى پىكىرىمەن ءبولىستى دەپ جازادى Qamshy.kz اقپارات اگەنتتىگى. 

— ديماش پەن دانەليادان باسقا قاتىسۋشىلاردىڭ ونەرى ءسىزدى تاڭعالدىرا الدى ما؟

ءيا. مەن كورەيادان كەلگەن قاتىسۋشىلاردىڭ ونەرىنە ءتانتى بولدىم.  ولار كاسىبي تۇردە ەرەكشە ونەر كورسەتتى. ماعان قاتتى ۇنادى. سونداي-اق ءوز ەرەكشەلىكتەرىمەن باسقا دا قازىلار القاسىنىڭ جۇرەگىن جاۋلاپ الدى. 

— بۇل "مينۋتا سلاۆى" سايىسىنىڭ كوشىرمەسى مە؟

جوباعا بىرنەشە ەلدىڭ تالانتتىلارى قاتىستى. بۇل جوبا بۇرىنعىدان وزگەرەك. جوبانى مەن باسقالارمەن سالىستىرا المايمىن. سەبەبى مۇنداي سايىس ءجيى بولا بەرمەيدى. سەبەبى "The World’s Best" ەڭ ۇزدىك شوۋ جانە قاتىسۋشىلارى دا "سەن تۇر مەن اتايىن"، دەگەن تالانتتىلار. 

—ديماشتىڭ سوڭعى سايىستاعى ونەرىنەن كەيىن ساحنا سىرتىندا قانداي جايت ورىن الدى؟

مەنىڭ شەتەلدىك ارىپتەستەرىم مەنى قۇشاقتاپ، بەتىمنەن ءسۇيىپ، قۇتتىقتاپ جاتتى. ديماشتىڭ ادام سەنگىسىز تالانتىن ايتىپ، تاڭدانىستارىن جاسىرا المادى. ونىڭ باسقالاردان دارالانىپ تۇراتىن ونەرىن ءسوز ەتتى. ديماشتىڭ ءانىن تاڭ-تاماشا بولىپ تىڭداعان كورەرمەندەردىڭ ريزاشىلىعىن، ەموسياسىن ايتىپ جەتكىزۋ مۇمكىن ەمەس. 

— ۇيىمداستىرۋشىلار قاتىسۋشىلاردى قايدا ورنالاستىردى؟

كەلىسىمشارت بويىنشا اتالمىش سايىسقا قاتىسۋشىلارمەن ءبىز سويلەسىپ، جاقىن ارالاسا المايمىز. ارينە مەن قاتىسۋشىلارمەن ارالاسىپ، سويلەسكىم كەلدى. وكىنىشكە قاراي بۇعان قاتاڭ تۇردە تىيىم سالىندى. بۇل دا دۇرىس شىعار. سەبەبى ءبىزدىڭ پىكىرىمىزدىڭ وبەكتيۆتى بولۋى كەرەك. ءادىل باعا بەرۋ بۇل سايىستا وتە قيىن.  سەبەبى ءاربىر ساراپشىنىڭ ءوز جەرلەستەرىنە بۇيرەگى بۇرىپ تۇراتىنى بەلگىلى. مەن دە ءوز جەرلەستەرىمە بارىنشا قولداۋ ءبىلدىرىپ، كومەكتەسكىم كەلدى. ءبىراق كەلىسىمشارتتىڭ اتى كەلىسىمشارت.

— اتالمىش سايىسقا قاتىسۋشىلارعا قانداي تالاپ قويىلدى؟

بىرەگەيلىك. ەرەكشەلىك. الەمدەگى بىرنەشە ميلليارد ادامنىڭ اراسىنداعى ۇزدىگى بولۋ. بۇل سايىسقا قاتىسۋ ءۇشىن ءسىز باسقالار ىستەي المايتىن ونەرىڭىزدى كورسەتۋىڭىز كەرەك. ەگەر ءسىزدىڭ ونەرىڭىزدى الەمدەگى بىردە-بىر ادام قايتالاي المايتىن بولسا، قاتىسۋعا ءوتىنىش ءبىلدىرىڭىز. ءقازىر ۇيىمداستىرۋشىلار كەلەسى ماۋسىمعا قاتىسۋشىلاردى ىرىكتەپ جاتىر. 

— ديماش پەن دانەليانىڭ جەڭۋ مۇمكىندىگى قانداي؟

— وتە جوعارى دەپ ەسەپتەيمىن. مەن جەرلەستەرىممەن ماقتانامىن. تاقىمىمىزدى قىسىپ، قولداۋ بىلدىرەمىز. ناتيجەسىن الداعى ۋاقىتتا كورەسىزدەر

اۋدارعان: اسەل بولات قىزى