بۋففالوداعى (اقش) ءحوسپيستىڭ جانە ءپاللياتيۆتى ەمدەۋ ورتالىعىنىڭ دارىگەرلەرى ون جىلدىق زەرتتەۋدى اياقتاپ، عاجايىپ جاڭالىق  اشتى، دەپ جازادى Qamshy.kz اقپارات اگەنتتىگى popmech.ru سايتىنىڭ دەرەگىن نەگىزگە الا وتىرىپ.

كريستوفەر كەرر باستاعان ماماندار ءولىم اۋزىندا جاتقان ناۋقاستاردى باقىلاپ، ولىمگە دەيىنگى ارالىقتا ادامدار تىلسىم كورىنىستەردى كورە باستايتىندىعىن ايتادى.تەكسەرۋ كەزىندە اتالمىش قۇبىلىس 13 مىڭنان استام ادامنىڭ ىشىندە 88 پايىزىنان بايقالعانىن انىقتالدى.

ناۋقاستاردىڭ پىكىرىنشە، 72 پايىزى دۇنيەدەن وتكەن تۋىسقاندارى مەن  دوستارىن تۇسىندە كورىپ، ولارمەن سويلەسەدى. ال 59 پايىزى سوڭعى تۇسىندە زاتتارىن جيناپ، بيلەت الىپ، سوڭعى ساپارعا جينالىپ جاتقاندىعىن كورەدى ەكەن. ءتىپتى كەيبىرى تۇسىندە پويىزدا وتىرعانىن، ۇشاقپەن ۇشىپ بارا جاتقانىن نەمەسە ەرتە ومىردەن وتكەن جاقىن دوسىمەن بىرگە ەمىن-جارقىن اڭگىمە ايتىپ جاتقانىن كورەدى. 

ال 29 پايىزى ومىردەگى جاقىندارى مەن دوستارىن تۇسىندە كەزىكتىرسە، ادامداردىڭ 28 پايىزى وتكەن ومىرىندەگى جارقىن ەستەلىكتەر مەن ءتۇرلى وقيعالاردى، كەزىندە كەرەمەت اسەر قالدىرعان ساتتەردى تۇسىندە كورەدى. 

ال ءولىم اۋزىندا جاتقان بالالارعا جۇرگىزىلگەن زەرتتەۋدىڭ ناتيجەسىندە ولاردىڭ تەك وزدەرى بىلەتىن ءۇي جانۋارلارىن تۇسىندە كورەتىنى بەلگىلى بولدى. ولار جانۋارلاردان بولەك ۇلكەندەردى دە تۇسىندە كورەدى. ءبىراق كوبىنەسە ناۋقاس بالا تۇسىندە كىمدى كورگەنىن ەسىنە تۇسىرە المايدى ەكەن.

عالىمداردىڭ ايتۋىنشا، ادامدار دۇنيەدەن وتۋىنە 10-11 اپتا قالعان كەزدە وسىعان ۇقساس تۇستەردى كورە باستايدى.  ال 3 اپتادان كەيىن مۇنداي تۇستەردى كورۋى جيىلەيدى. ءارى تۇسىندەگى وقيعالار مەن ادامدار انىق كورىنە باستايدى. بۇل قۇبىلىستىڭ ءمانىن فەنومەن كەري مەن ونىڭ ارىپتەستەرى انىقتاي الماعان. ساراپشىلاردىڭ ايتۋىنشا، ولەر الدىنداعى ميداعى بولاتىن ءارتۇرلى وزگەرىستەر تىلسىم تۇستەر كورۋگە سەبەپ بولۋى مۇمكىن. سونداي-اق بۇل جاعداي ادامداردى تىنىشتاندىرۋعا جانە ولەر الدىنداعى قورقىنىشتى جەڭۋگە كومەكتەسەدى ەكەن.

اۋدارعان: فاريزا جومارت قىزى