كەز كەلگەن ادامنىڭ ومىرىندە تاڭداۋ جاساۋ كەرەك ۋاقىت بولادى. مۇنداي جاعدايدا ءبىز بار قۇندىلىقتارىمىزدى، باعالايتىن، جاقسى كورەتىن، دۇرىس دەپ بىلەتىن نارسەلەرىمىزدى ەسكە الامىز. سەبەبى تاڭداۋ جاساۋدا بىرەۋدىڭ ەمەس، تەك ءوزىمىزدىڭ شەشىمىمىز ماڭىزدى، باعالى بولادى. تەك ءوزىمىزدىڭ شەشىمىمىز شىندىقتى ايعاقتايدى.

تاڭداۋ جاسايتىن كەز – ەڭ اۋىر دەپ سانالادى. سەبەبى شەشىم قابىلداعان سوڭ ارتقا شەگىنەرگە جەر تابىلمايدى. كەيدە شەشىمدى تەز ارادا، ءبىر مەزەتتە قابىلداۋ كەرەك بولاتىن جاعدايلار تۋىندايدى. سوندا ءسىز ىشكى داۋىسىڭىزعا سەنىپ، دۇرىس شەشىم تابۋىڭىز كەرەك. ايتپەسە بىرەۋ ءسىزدىڭ ورنىڭىزعا تاڭداۋ جاساپ، بۇكىل ءومىرىڭىزدى وزگەرتىپ جىبەرۋى مۇمكىن. سول سەبەپتى ەشقاشان تاڭداۋ جاساۋدان قورىقپاڭىز. بۇل – ءسىزدىڭ ءومىرىڭىز. ونى ءوز ويىڭىزداعىداي وتكىزۋگە تالپىنىڭىز.

ءوز ماماندىعىن ەكىنشى تاڭداۋدان تاپقان استانا قالاسىنداعى 6636 اسكەري ءبولىم پسيحولوگ مامانى اعا لەيتەنانت اياجان حامزا تۋرالى ءبىز نە بىلەمىز؟ 2013 جىلى ۇلتتىق ۇلان قاتارىنا كەلىپ، 3660 اسكەري بولىمىندە قىزمەتشى ەڭبەك جولىن باستاعان. اراعا ءبىر جىل سالىپ اسكەري پوگون تاعىپ، 6636 اسكەري بولىمىنە پسيحولوگ لاۋازىمىنا تاعايىندالادى. سودان بەرى وننان اسا شاقىرىلىمنىڭ ساربازدارىن قابىلداپ، اسكەري قىزمەتكە رۋحتاندىرىپ، شىعارىپ سالعان. ەكى مارتە پاۆلودارداعى قورعانىس ىستەرى جونىندەگى دەپارتامەنكە بارىپ، جاس ساربازداردى ارنايى پسيحولوگيالىق تەكسەرىستەن وتكىزە وتىرىپ الىپ كەلگەن.

اياجان ادىلبەك قىزىنىڭ جولداسى دا اسكەري قىزمەتكەر، بۇگىندە ولار ەكى بالانى تاربيەلەپ وتىرعان ۇلگىلى وتباسى. الايدا، «مەنىڭ بالالارىم – ساربازدار» دەيدى. قىزمەت اتقارىپ جۇرگەن اسكەري ءبولىم باسشىلىعى دا پسيحولوگتىڭ جۇمىسىنا كوڭىلدەرى تولاتىنىن، ۇيدەن گورى جۇمىستا كوبىرەك جۇرەتىنى، ساربازداردىڭ جانىنان اركەز تابىلاتىنىن تىلگە تيەك ەتتى. پسيحولوگتىڭ ايتۋىنشا، ساربازدارمەن جۇمىس جاساۋ وڭاي ەمەس. اشىلىپ، ىشكى سىرىن ايتىپ سويلەسەتىندەر بار، ۇندەمەيتىن تۇيىق جاۋىنگەرلەر دە بار، ولاردى سوزگە تارتۋ قيىنعا سوعادى ەكەن. دەگەنمەن، پسيحولوگيا ماماندىعىن تەرەڭىرەك مەڭگەرگەندىگىنىڭ، سونداي-اق وقۋ-تاجىربيە الماسۋداعى تۇيگەنىنىڭ ارقاسىندا امالىن تاۋىپ جاقسى ناتيجەلەرگە قول جەتكىزىپ كەلەدى.

ساربازداردىڭ الۋان ءتۇرى كەلەتىنىن ەسكەرسەك، قازاق، يا ورىس تىلدەرىن بىلمەيتىن نەمەسە مۇلدەم ءارىپ تانىمايتىن ساربازدارمەن ءتىل تابىسۋ، ولارعا پسيحولوگتىڭ قىزمەتى نە ءۇشىن كەرەك ەكەنىن ءتۇسىندىرۋ قيىنعا تۇسكەن ساتتەردە اتا-انالاردى دا كومەككە تارتادى. سول كىسىلەردىڭ بەلسەندىلىگى ارقىلى دا ءبىراز ساربازداردىڭ ەڭ ءبىرىنشى وزىنە دەگەن سەنىمدىلىگى قالىپتاسادى. اعا لەيتەنانت اياجان حامزانىڭ مىندەتىنە ساربازداردان بولەك، كەلىسىمشارت بويىنشا اسكەري قىزمەتشىلەرمەن دە پسيحولوگيالىق جۇمىستار جۇرگىزۋ كىرەدى. ولارمەن جۇمىس جاساۋ وڭاي دەۋگە كەلمەس. كوبىندە وتباسىلىق جاعدايلارعا بايلانىستى ماسەلەلەر جونىندە اڭگىمەلەسۋلەر بولادى ەكەن. ءوز ىسىنە جاۋاپكەرشىلىكپەن قارايتىن، ماماندىعىن جاقسى كورەتىن كەيىپكەرىمىز بار بىلىمىمەن شەكتەلىپ قالماي، ۇنەمى ىزدەنىس ۇستىندە، ءارى قوسىمشا كۋرستارعا بارىپ ءبىلىمىن جەتىلدىرىپ جۇرەدى. «جۇمىستىڭ ءساتتى اتقارىلۋىنا باسشىلىقتىڭ قولداۋى دا اسا قاجەت جانە ولاردىڭ ۇنەمى قولداۋ كورسەتىپ وتىرعانى قۋانتادى»، – دەيدى قامتاماسىز ەتۋ پولكىنىڭ پسيحولوگى. ولاردىڭ قولداۋى ساربازدارمەن جۇمىس جۇرگىزۋ بارىسىندا كوپ سەپتىگىن تيگىزەدى. ويتكەنى، جوعارى وقۋ ورىندارى مەن ماگيستراتۋرا وقىپ كەلگەندەرگە قاراعاندا، مەكتەپ بىتىرە سالىسىمەن كەلگەن ساربازدارمەن ءتىل تابىسۋ جەڭىلىرەك. كوبىندە جاس بولعاندىقتان با مەكتەپتەن كەيىن كەلگەن ازاماتتاردى سوزگە كوندىرۋ، دۇرىس پەن بۇرىستى ءتۇسىندىرۋ الدەقايدا وڭاي. ءبىراق تا، ولار بىر-ەكەۋ عانا ەمەس، قانشاما بولعاندىقتان رۋحاني دا اۋىرلىق ەتەدى. وسىنداي جاۋاپتىلىق پەن توزىمدىلىكتى قاجەت ەتەتىن قىزمەتتىڭ قيىندىعىن ەڭسەرىپ جۇرگەن، كىشكەنتاي جۇرەگى قانشاما جانعا مەيىرىم توگىپ تۇرعان 6636 اسكەري بولىمدەگى ەڭ مىقتى، ءارى اقكوڭىل نازىك جاندىلاردىڭ بىرەگەيى – اعا لەيتەنانت اياجان حامزا ەكەنى ەشبىر ماقتاۋ سوزدەرسىز-اق ساربازداردىڭ جۇزىنەن كورىنىپ تۇر.

قاتارداعى

ەسەنبول يمانعازى