كەلەسى جىلدىڭ 1 قاڭتارىنان باستاپ قازاقستان ازاماتتارى تابىس پەن مۇلىك دەكلاراسياسىن تاپسىرادى.

ماماندار قازاقستاندىقتاردى تابىس دەكلاراسياسىن تەزىرەك وتكىزۋگە شاقىرىپ جاتىر. ويتكەنى، ەل ازاماتتارى قازىردەن قيمىلداماسا، قۇجاتتى وتكىزۋدە بەلگىلى ءبىر قيىندىقتارعا تاپ بولۋى مۇمكىن. بۇل تۋرالى الماتىدا وتكەن باسپا ءسوز ءماسليحاتىندا رەسپۋبليكالىق كاسىپكەرلەرگە كومەك ورتالىعىنىڭ ديرەكتورى دميتريي كازانسيەۆ ءمالىم ەتتى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.

2020 جىلدىڭ 1 قاڭتارىنان باستاپ قازاقستاننىڭ 13 ميلليونعا جۋىق تۇرعىنى تابىس پەن مۇلىك بويىنشا جىل سايىن دەكلاراسيا وتكىزەتىن بولادى. بۇل ەسەپتى ەل ازاماتتارى قاعاز تۇرىندە 2020 جىلدىڭ 15 شىلدەسىنە دەيىن، ال ەلەكتروندى تۇردە 15 قىركۇيەككە دەيىن وتكىزۋ كەرەك.

"ويلاڭىزشى، 13 ميلليون (!) ادام دەكلاراسيا وتكىزەدى. بۇل - وتە كوپ كولەم. مامان رەتىندە بۇل دەكلاراسيانى قاعاز تۇرىندە وتكىزبەۋگە كەڭەس بەرەر ەدىم. ويتكەنى ول ءقاۋىپسىز. ال كۇزدە سوڭعى ساتتە 13 ميلليون ادام ەلەكتروندى بازاعا لاپ قويسا، نە بولادى؟ ارينە، بازا كىبىرتىكتەيدى. سالدارىنان قانشاما ادام ءوزىنىڭ تابىس دەكلاراسياسىن دەر ۋاقىتىندا وتكىزىپ ۇلگەرمەي قالادى. سوندىقتان، ءبىز حالىقتى بۇل جايت تۋرالى الدىن الا ەسكەرتىپ، حابارلاپ جاتىرمىز"، - دەدى كازانسيەۆ.

ال دەكلاراسيا دەر ۋاقىتىندا وتكىزىلمەي قالسا، كازانسيەۆتىڭ ايتۋىنشا، ادام اكىمشىلىك جاۋاپكەرشىلىككە تارتىلۋى مۇمكىن.

"ۇلگەرمەسە نەمەسە تولتىرعان قۇجاتتا شىنايى اقپارات كورسەتىلمەسە، وندا ول ادامعا 30 ايلىق ەسەپتىك كورسەتكىش كولەمىندە نەمەسە 75 750 تەڭگە ايىپپۇل سالىنادى"، - دەدى ول.

قازاقتىڭ تويى دا دەكلاراسيالاۋعا جاتاتىن بوپ شىقتى. ارينە، تويدان تۇسكەن اقشا مەن سىيلىقتىڭ قۇنى 500 مىڭ تەڭگەدەن اسقان جاعدايدا.

"دەكلاراسيادا قۇنى 500 مىڭ تەڭگەدەن اساتىن، بولاشاقتا ساتۋعا بولاتىن نارسەلەردى كورسەتۋگە كەڭەس بەرەمىن. بۇل باعالى بۇيىمدار، توندار، كارتينالار بولۋى مۇمكىن. ال، ماسەلەن تويدان تۇسكەن اقشالاي سىيلىقتى دەكلاراسياداعى "تاعى باسقا" دەگەن گرافاعا تولتىرۋعا بولادى. وتە باعالى سىيلىق الساڭىز، وندا سىيلاۋشىدان مۇمكىندىك بولسا، چەگىن سۇراپ الۋعا كەڭەس بەرەر ەدىم"، - دەيدى كازانسيەۆ.

وعان قوسا، ەندى قازاقستاندىقتار بانك كارتاسى ارقىلى ءجون-جوسىقسىز اقشا اۋدارىمىن جاساي المايدى.

"مىسالى، دوسىڭىز "كارتانى بەرشى، اقشا اۋدارتىپ الا قويايىن" دەيدى. ەگەر ول ۇلكەن سوما بولسا جاعداي قيىن. ويتكەنى سالىقشىعا ءسىز ونىڭ قانداي اقشا ەكەنىن دالەلدەي المايسىز. بىرەۋ كارتاڭىزدى پايدالانىپ، 1 ميلليون تەڭگە جونەلتتى دەلىك. سول 1 ميلليون تەڭگەنىڭ سالىعى سىزدەن الىناتىن بولادى، سەبەبى ول دەكلاراسيالانباعان"، - دەيدى ول.

ۇسىنعان: ماقپال سەمباي