«استانا وپەرا» تەاترىنىڭ بالەت ترۋپپاسى رەسەيدەگى ەڭ بەدەلدى تەاترلىق-كونسەرتتىك الاڭداردىڭ ءبىرى - مەملەكەتتىك كرەمل سارايىندا (ماسكەۋ)  ونەر كورسەتەدى دەپ حابارلايدى Qamshy.kz اقپارات اگەنتتىگى inform.kz سايتىنا سىلتەمە جاساپ.

«ۆاسلاۆ نيجينسكيي. ورىس بالەتىنىڭ كەمەڭگەرى» اتتى  بالەت جۇلدىزدارىنىڭ عالامات گالا-كونسەرتى 18 ساۋىردە وتەدى. 

ونىڭ اياسىندا بالەت ترۋپپاسىنىڭ كوركەمدىك جەتەكشىسى، رف حالىق ءارتىسى التىناي اسىلمۇراتوۆانىڭ جەتەكشىلىگىمەن «استانا وپەرا» تەاترى حورەوگرافيالىق ونەردىڭ جاۋھار تۋىندىسى - ن.ريمسكيي-كورساكوۆتىڭ مۋزىكاسىنا م.فوكيننىڭ «شەحەرازادا» بالەتىن ۇسىنادى.

«ءبىز ءۇشىن بارلىق گاسترول ماڭىزدى، جاقىندا بالەت ترۋپپاسى ءبىر اي كولەمىندە ەۋروپا قالالارىندا وراسان زور جەتىستىكپەن ونەر كورسەتتى. بارلىق جەردە انشلاگ بولدى. بۇگىندە ماسكەۋدەگى ەڭ بەدەلدى كونسەرتتىك زال ساحناسىندا «شەحەرازادا» ءبىر ءبولىمدى بالەتىن ورىنداۋ تۋرالى اندريس ليەپادان شاقىرتۋ كەلىپ ءتۇستى. بۇل ءبىز ءۇشىن جاۋاپتى ءارى ايتۋلى ونەر كورسەتۋ بولماق، سەبەبى، گالا-باعدارلامانىڭ تۇتاستاي ءبىر ءبولىمى «استانا وپەرا» تەاترىنا بەرىلگەن. كرەمل سارايى ساحناسىن كوزدىڭ جاۋىن الار دەكوراسيالار ساندەيتىن بولادى. ءبىز ولاردى قازاقستاننان الىپ بارامىز. ارتىستەرىمىز سپەكتاكلدى كەرەمەت دەڭگەيدە كورسەتەدى دەگەن ۇمىتتەمىز. بىزگە دەگەن ىقىلاسى مەن سەنىمى ءۇشىن اندريس ماريسوۆيچكە العىس بىلدىرەمىن. ناۋرىز ايىندا قازاقستاندىق كورەرمەندەر وسىناۋ بالەتتى «استانا وپەرا» ساحناسىنان تاماشالاي الادى"، - دەپ اتاپ ءوتتى التىناي اسىلمۇراتوۆا.

ءداستۇر بويىنشا رەسەيدىڭ حالىق ءارتىسى اندريس ليەپانىڭ «قولتاڭبالار جانە بەدەل» جوباسى جىل سايىن وتەدى.

گالا-كونسەرت باعدارلاماسىنا «قاسيەتتى كوكتەم»، «پەترۋشكا»، «ۇيقىداعى ارۋ»، «جيزەل»، «تاليسمان» جانە ت.ب. بالەتتەردىڭ ۇزىندىلەرى ەنگەن.

دەگەنمەن دە، كەشتىڭ باستى وقيعاسى ليەۆ باكستتىڭ قايتا جاڭعىرتقان دەكوراسيالارى مەن كوستيۋمدەرى بار «شەحەرازادا» شىعىس ەرتەگىسىنىڭ كورسەتىلىمى بولارى انىق.

ۇسىنعان: ماقپال سەمباي