سەنات دەپۋتاتى نۇرلان قىلىشبايەۆ اۋدان جانە اۋىلداردا مەملەكەتتىك قىزمەتتە جۇمىس ىستەيتىن تۇرعىنداردىڭ 7-20-25" باعدارلاماسىنا قاتىسا الماي وتىرعانىن ايتتى دەپ حابارلايدى Qamshy.kz اقپارات اگەنتتىگى sputniknews-تىڭ دەرەگىن نەگىزگە الا وتىرىپ.

ق ر يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن ۇي-كوممۋنالدىق شارۋاشىلىق ىستەرى كوميتەتى ءتوراعاسىنىڭ ورىنباسارى باقىتجان قاشاقوۆ "7-20-25" باعدارلاماسىنا قاتىسۋ ءۇشىن ايلىق تابىس شامامەن 150 مىڭ تەڭگەدەن اسۋى قاجەت ەكەنىن اتاپ ءوتتى.

 "ولار ەلىمىزدىڭ كەز كەلگەن وڭىرىنەن قۇنى 25 ميلليون تەڭگەگە دەيىنگى جاڭا سالىنعان پاتەردى ساتىپ الا الادى"، - دەدى ول.

الايدا دەپۋتات نۇرلان قىلىشبايەۆ مۇنىمەن كەلىسپەيتىنىن جەتكىزدى.

"كوميتەت بەرگەن اقپاراتپەن كەلىسە المايمىن.  وڭىرلەردە 150 مىڭ تەڭگە جالاقىمەن پاتەر الاتىنىنا كۇمانىم بار"، - دەدى ول.

ونىڭ ايتۋىنشا، ەكى بالاسى بار وتباسىنىڭ تەك 12 ميلليون تەڭگەنىڭ پاتەرىن الۋعا شاماسى جەتەدى.

"بانكتەر وتباسىنىڭ تازا تابىسىن ەسەپتەيدى. تۇرعىنداردىڭ ەكىنشى دەڭگەيلى بانكتەردە قارىزى بولماۋى كەرەك. باعدارلامادا يپوتەكالىق زاەم دەپ جازىلعانىمەن، بانكتەر باسقا قارىزداردىڭ بولماۋىن جانە كرەديت تاريحىنىڭ جاقسى بولعانىن تالاپ ەتەدى. بۇل – بانكتەر قوياتىن نەگىزگى تالاپ"، - دەدى نۇرلان قىلىشبايەۆ.

دەپۋتات اۋداندىق بالاباقشاداعى جاس تاربيەشى 50 مىڭ تەڭگە، ال كاتەگورياسى بار تاربيەشى 70 مىڭ تەڭگە، بالاباقشا مەڭگەرۋشىسى 100 مىڭ تەڭگە جالاقى الاتىنىن ايتتى. سونداي-اق، ونىڭ ايتۋىنشا،  اۋداندىق دەڭگەيدەگى جەتەكشى اكىمدىك قىزمەتكەرىنىڭ جالاقىسى 55 مىڭ تەڭگە، باس مامان 55 مىڭ تەڭگە، ەڭبەك ءوتىلى جوق ءبولىم باسشىسى 125 مىڭ تەڭگە، ەڭبەك ءوتىلى جوعارى ءبولىم باسشىسى 190 مىڭ تەڭگە كولىمىندە تابىس تابادى.

"قاراپايىم مەكتەپتەگى كاتەگورياسى جوق ءمۇعالىمنىڭ جالاقىسى 50 مىڭ تەڭگە، جوعارى كاتەگوريالى ءبىر ستاۆكادا جۇمىس ىستەيتىن ۇستازدىڭ جالاقىسى 90 مىڭ تەڭگە، جوعارى كاتەگوريالى 1،5 ستاۆكاداعى پەداگوگ 150 مىڭ تەڭگە الادى. ال كاتەگورياسى جوق دارىگەر 56 مىڭ تەڭگە، جوعارى كاتەگوريالى دارىگەر 77 مىڭ تەڭگە، كەزەكشىلىكتى ەسەپتەگەندە كاتەگورياسى جوق دارىگەر 77 مىڭ تەڭگە، جوعارى كاتەگوريالى دارىگەر 119 مىڭ تەڭگە الادى" دەپ ءتىزىپ شىقتى نۇرلان قىلىشبايەۆ.

"سوندىقتان اۋىلدىق جەرلەردەگى تۇرعىنداردى باسپانامەن قامتاماسىز ەتۋدىڭ جاڭا جولىن ىزدەۋ كەرەك. ءبىز اتالعان باعدارلاماعا قانداي الەۋمەتتىك توپتار قاتىسىپ جاتقانىن بىلگىمىز كەلەدى. وڭىرلەردەگى تۇرعىنداردىڭ تولەم قابىلەتى بانكتەردىڭ تالابىنا سايكەس كەلمەي وتىر. كوپتەگەن تۇرعىننىڭ كرەديت تاريحى ناشار"، - دەپ تۇيىندەدى ءسوزىن دەپۋتات.

ۇسىنعان: فاريزا جومارت قىزى