الماتىداعى الىپ ءتيىننىڭ تاعدىرى ءساۋىر ايىندا شەشىلەتىن بولدى، - دەپ حابارلايدى Qamshy.kz اقپارات اگەنتتىگى "الماتى" تەلەارناسىنا سىلتەمە جاساپ.

بيىكتىگى 4 قاباتتى ۇيمەن بىردەي ءتيىندى جاساۋعا 15 توننا تەمىر مەن بولات، 3 توننا اعاش جانە 3 توننا سابان جۇمسالعان. جوبا اۆتورى – بريتاندىق سۋرەتشى الەكس رينسلەر ءوزىنىڭ مۇنداي ونەر تۋىندىلارىن ۋاقىتى كەلگەندە ورتەپ جىبەرەدى ەكەن. بۇل جولى ءمۇسىن قالا ورتاسىندا ورنالاسقاندىقتان، اۆتور ونى ورتەمەيمىن دەپ شەشىپتى. ارت-نىساندى بۇزباۋى دا مۇمكىن. تەك بەت-بەينەسىن عانا وزگەرتىپ، ورنىندا قالدىرۋى عاجاپ ەمەس. ال ناۋرىز مەرەكەسىنە وراي ءتيىن جاڭا كەيىپكە ەنىپ، تۇرلەنبەك.  

باسىندا تاقياسى، ال قولىندا راۋشان گ ۇلى بار الىپ ءتيىننىڭ ماڭايىندا 22 ناۋرىز كۇنى الماتىلىقتار مەن قالا قوناقتارى ناۋرىز مەرەكەسىن تويلاماق. ال ارت-نىساننىڭ ەندىگى تاعدىرى ءساۋىر ايىندا بەلگىلى بولماق.

تەلەارنانىڭ مالىمەتىنشە، ناۋرىز مەرەكەسىندە الىپ ءتيىننىڭ جانىندا ءتۇرلى جارمەڭكەلەر مەن شەبەرلىك سىنىپتارى وتەدى. سونداي-اق، قالا تۇرعىندارى ۇلتتىق تاعامداردان ءدام تاتىپ، كەشكى ساعات 9-دا ارنايى وتشاشۋدى تاماشالاي الادى. 

اتىشۋلى ارت-نىساننىڭ بۇگىنگى بەينەسى وسىنداي. كەي جەرلەرىنىڭ سابانى ءتۇسىپ، تەسىلىپ قالعان تۇستارى دا انىق كورىنىپ تۇر. العاشىندا 9 اي عانا تۇرادى دەگەن ءمۇسىننىڭ اتاكەنت كورمە ورتالىعىندا تۇرعانىنا 8 ايعا جۋىقتادى. الىپ ءتيىننىڭ ابدەن كىرلەگەنىن تۇرعىندار دا بايقاعان.

«ءتيىندى تازالاپ العان دۇرىس شىعار. ەڭ بولماسا، مەرەكە كۇندەرىنە قارسى تازالاۋ قاجەت قوي»، «سۋرەتىنە قاراعاندا ءبىرشاما ەسكىلەۋ كورىنەدى ەكەن. ءبىراق سوندا دا ادەمى، قالاعا كورىك بەرىپ تۇر»، «كىرىن تازالاپ السا، كەلۋشىلەردىڭ كوز قۋانىشىنا اينالار ەدى...»، – دەستى الىپ ءتيىن ماڭىندا سەرۋەندەپ جۇرگەن قالا تۇرعىندارى.

كوپتىڭ كوزى ۇيرەنىپ قالدى ما، كوبىسى ءتيىندى الىپ تاستاۋعا قيمايدى. تەك تازالاپ قويسا دەگەن تىلەكتەرى بار. ال الەسيا نۋگايەۆا ءمۇسىندى ساباننان جاساۋداعى باستاپقى ماقسات – قالانىڭ ەكولوگيالىق احۋالىن كورسەتۋ ەدى دەيدى.  

«سۋرەتشىنىڭ ماقساتى – ارت-نىساندى ساباننان جاساۋ ارقىلى قالامىزداعى ەكولوگيالىق جاعدايدى، اۋانىڭ قانشالىقتى لاس ەكەنىن كورسەتۋ ەدى. وزدەرىڭىز دە كورىپ تۇرعانداي، قورشاعان ورتانىڭ اسەرىنەن ءتيىننىڭ قالاي وزگەرگەنىن اڭعارۋعا بولادى»، – دەدى «Nowryz رarty» فەستيۆالىنىڭ جەتەكشىسى الەسيا نۋگايەۆا.

«ءتيىن از ۋاقىت ىشىندە كوپشىلىكتىڭ سۇيىكتى مۇسىنىنە اينالىپ ۇلگەردى. ونىڭ اينالاسىنىڭ ءوزى جاڭا كەيىپكە ەنىپ، حالىق كوپ جينالاتىن ورىنعا اينالدى. ءبىز بۇل جەردىڭ بۇدان كەيىن دە تۇرعىنداردىڭ دەمالاتىن ورنى بولىپ قالعانىن قالايمىز»، – دەيدى الەسيا نۋگايەۆا. 

ۇسىنعان: ماقپال سەمباي