2018 جىلدىڭ 13 ناۋرىزى ق ر پرەمەر-مينيستردىڭ ورىنباسارى گۇلشارا ءابدىقالىقوۆا باستاعان ءبرى توپ شەندى اتىراۋ وبلىسىنا ساپارلارى بارىسىندا كوپ بالالى وتباسىلاردىڭ ءۇيىن ارالادى. ءابدىقالىقوۆانىڭ مۇنداعى ماقساتى – الەۋمەتتىك جاعدايى تومەن تۇعىنداردىڭ مۇڭ-مۇقتاجىن ەستىپ، مۇشكىل حالدەرىن ءوز كوزىمەن كورۋ ەدى. 

كوپ بالالى ايەلدەرمەن ق ر ەڭبەك جانە الەۋمەتتى قورعاۋ ءمينيسترى بەردىبەك ساپاربايەۆ تا كەزدەستى. ءوز قيىندىعىن  بيلىككە جەتكىزگەن انالاردىڭ ارمانى ورىندالسا دەيمىز. الايدا جاقسىلىق جاساماق نيەتپەن كوپ بالالى وتباسىلاردىڭ ۇيىنە تىكەلەي كىرگەن شەندىلەر تاعى دا حالىقتىڭ سىنىنا قالدى. وعان دالەل مىنا سۋرەت: 

سۋرەتتى ءوز پاراقشاسىنا سالعان الەۋمەتتىك جەلى بەلسەندىسى ناتاليا سادىقوۆا ءبۇي دەدى:

«ۇكىمەت باسشىسىنىڭ ورىنباسارى حالىققا ءوز اياعىمەن بارىپتى-مىس. كوپ بالالى وتباسىلار شەنەۋنىكتى ۇيلەرىنە قۋانا كىرگىزدى. ءبىراق، ءابدىحالىقوۆا ءوزىنىڭ برەند اياق كيىمىن شەشكىسى كەلمەپتى، ءتىپتى وسىنداي جاعدايدا. قاراڭىزدارشى، كوپ بالالى انا مەن بالاسى جالاڭ اياق، ال ءادىحالىقوۆا ەتىگىمەن تۇر. 

بالكىم، ءابدىحالىقوۆا حانىمدى كوپ بالالى وتباسىلاردىڭ جاعدايى الاڭداتپايتىن دا شىعار، بالكىم الاڭداتار، كىم ءبىلسىن. ءبىراق، كىشكەنە بولسا دا قاراپايىمدىلىق تانىتىپ قويساڭىزدار قايتەدى؟! حالىق بارىنە كۋا».

شەنەۋنىكتەردەن شاڭىراقتى سىيلاۋدى تالاپ ەتكەن حالىقتىڭ اشۋى قارا قازانداي. ونى تومەندە جازىلعان مىنا پىكىرلەردەن كورە الاسىزدار.

ايتا كەتەرلىگى، شاڭىراققا اياق كيىمىمەن كىرىپ كەتكەن تەك قانا ءابدىقالىقوۆا ەمەس، ونىمەن ەرىپ بارعان توپ تا جىلتىراعان ەتىكتەرىمەن تۇر. 

حالىق ايتسا، قالت ايتپايدى... بۇل سۋرەتتەردىڭ بەرگى جاعى عانا. ار جاعىنداعى جاعداي بىزگە بەيمالىم. بالكىم، اياق كيىمدەرىمەن كىرۋگە انالاردىڭ ءوزى قارسى بولماعان شىعار. دەگەنمەن، شاڭىراقتى ءقادىر تۇتقان، كيەلى ساناعان قازاق ونى «قورلاعانداردى» جەردەن الىپ، جەرگە سالاتىن كۇيگە جەتەدى. بۇل دا سونىڭ كەبى. 

گۇلىم جاقان