كايردەگى «ءال-ازحار» ۋنيۆەسيتەتىنىڭ باس ءمۇفتيى احماد ءال-تايىب يسلام داستۇرىندە ەجەلدەن قالىپتاسقان كوپ ايەل الۋشىلىققا قارسى شىقتى.

«كوپ ايەل الىپ، يسلامنىڭ ءبىر مىندەتىن اتقارامىن دەگەندەر وڭباي قاتەلەسەدى. قۇرانعا تەرەڭىنەن ءۇڭىلىپ كورسىن. وندا ءبىر نەكەلىلىك، ياعني مونوگاميا جايلى تەرەڭىنەن ايتىلعان، ال كوپ ايەل الۋ جايلى ەرەجە جوق. وعان بەلگىلى شەكتەۋ بار، ءارى ادىلەتتىلىك جاعى دا قاراستىرىلعان. بىرنەشە ايەلىنە ادىلەتتى بولا الماعان ەركەك تەك ءبىر ايەل السىن!»، - دەدى ءدىن مامانى.

ونىڭ ايتۋىنشا، كوپ ايەل الۋشىلىق – ايەلدەر مەن بالالارعا دەگەن ادىلەتسىزدىكتىڭ بەلگىسى. «ايەل – قوعامنىڭ ءبىر بولشەگى، تەڭ جارتىسى. ولاردىڭ مۇددەلەرىن دە ويلاۋىمىز ءتيىس»، - دەدى ءمۇفتي. الايدا كوپ ايەل الۋعا تىيىم سالۋ تۋرالى ايتپاعان. تەك ايەلدەردىڭ قۇقىعىن، قالاۋىن سىيلاي ءبىلۋ كەرەكتىگىن ەسكەرتتى.

«يسلامدا ايەلدەرگە ەرەكشە قۇرمەتپەن قارايدى. ولارعا دەگەن قارىم-قاتىناستا يسلام ءدىنى ەر ادامنان ادىلەتتى بولۋدى تالاپ ەتەدى»، - دەپ ءسوزىن قورىتىندىلادى.

جالپى كوپ ايەل الۋشىلىق الەمدە سيرەك كەزدەسەدى. ال تۇركيا، تۋنيس جانە يزرايلدە كوپ ايەل الۋعا زاڭ تۇرعىسىنان تىيىم سالىنعان.

دەرەككوز: newsru.co.il

ۇسىنعان: گۇلىم جاقان