جەكسەنبى كۇنى 17 ناۋرىزدا قازان قالاسىندا «رەسەي اۋماعىنىڭ تۇتاستىعى، الەۋمەتتىك ادىلەتتىلىك جانە جاڭا كۋرس» اتتى ميتينگ بولدى. الاڭعا جينالعان جۇزگە جۋىق قاۋىم نيەتتەرىن بيلىككە اشىق ءبىلدىرىپ، مەملەكەتتى باسقارۋ جۇيەسىن وزگەرتۋدى تالاپ ەتتى.
جيىرماعا جۋىق پوليسيا قىزمەتكەرى شەرۋدى سىرتتاي باقىلاپ تۇردى.
«سوۆەت وداعىن ساقتاپ قالۋ رەفەرەندۋمى كۇنىندە ءبىز رەسەي تەرريتورياسىنىڭ تۇتاستىعى، الەۋمەتتىك ادىلەتتىلىك ءۇشىن ميتينگكە جينالدىق. بىزگە كەرەگى – ازاماتتىق قوعامنىڭ ساقتالۋى، ءسوز بوستاندىعى، بيلىكتى ەركىن سىناۋ، لايىقتى ءبىلىم جۇيەسى، مەديسينا ءارى ءتيىمدى سوت جۇيەسى»، - ميتينگىنى ۇيىمداستىرۋشىلاردىڭ ءبىرى ەۆگەنيا يسلاموۆا.
يسلاموۆانىڭ سوزدەرىن وزگە شەرۋشىلەر جالعاستىرىپ اكەتتى. العاشقى بولىپ ءسوز العان «ورىس مادەنيەتى» قاۋىمداستىعىنىڭ ءتوراعاسى ميحايل ششەگلوۆ الدىمەن حالىقتى مەرەكەمەن قۇتتىقتادى.
«بۇگىن ءبىز ءۇشىن ۇلى كۇن! سوۆەت وداعىن ساقتاپ قالۋ ءۇشىن داۋىس بەرگەنىمىزگە 1 جىل تولدى. قىرىمنىڭ رەسەيگە قوسىلعانىنا 5 جىل بولدى. بار قالاعانىمىز – قاراپايىم حالىقتىڭ جاقسى ءومىر ءسۇرۋى»، - دەدى ششەگلوۆ.
سوۆەت وداعىنىڭ وراعى مەن بالعاسىن ءارى رەسەي يمپەرياسىنىڭ تۋىن ۇستاپ شىققان ميحايل ششەگلوۆتىڭ ءسوزىن مۇقيات تىڭدادى. ونىڭ ايتۋىنشا، رەسەي اينالاسىنداعى جەردىڭ ءبارى دەرلىك ورىستارعا ءتان ەكەن.
«قازاقستان ورىستىكى. قازاقتارعا قارسىلىعىمىز جوق. قازاقستان – كازاكتاردىكى، سونىمەن بولدى. تۇسىنەسىزدەر مە، اينالانىڭ ءبارى بىزگە ءتان، ءبارى بىزدىكى. بەرمەۋىمىز كەرەك، ساقتايىق»، - دەگەن ششەگلوۆ شەرۋشىلەردى ءبىر رۋحتاندىرىپ الدى. سەبەبى ونىڭ ءسوزىن قولداعاندار «ءبىزدى ەشكىم جەڭە المايدى! رەسەي، قازان، رەسەي» دەپ ايعايعا باستى.
اۋدارعان: گۇلىم جاقان
پىكىر قالدىرۋ