اقتوبەدەگى تەراكت كەزىندە جارالانعان پوليسيا قىزمەتكەرىنە باسشىلىعى باسپانا بەردى. 25 جاستاعى الىبەك جەتىعارين 2016 جىلدىڭ ماۋسىمىندا قارۋ-جاراق دۇكەنىنە شابۋىل كەزىندە جاراقات العان. سودان بەرى 3 جىل وتسە دە، دەنساۋلىعى دىمكاس جىگىتتىڭ وتباسى تەك مۇگەدەكتىگى ءۇشىن الاتىن جاردەماقىمەن كۇنەلتىپ كەلىپتى. «ەرلىگى ءۇشىن» مەدالىن العان ەكس-پوليسەيدىڭ ەرلىگى نەگە كەش ەلەندى؟ بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنىڭ دەرەگىن نەگىزگە الا وتىرىپ حابارلايدى.

الىبەك جەتىعارين پوليسيا ساپىنداعى ەڭبەك جولى وسىلاي تەز اياقتالادى دەپ ويلاماعانىن ايتادى. ادال ەڭبەك ەتىپ، مانسابىم وسەر دەگەن ارمانى دا بولعان. ەكى جىلدىڭ ىشىندە جاس جىگىت ءوزىن تەك جاقسى قىرىنان كورسەتىپتى. 6 مارتە ماقتاۋ العان، سونىڭ ىشىندە 3 مارتە ىشكى ىستەر مينيسترلىگى العىس جاريالاپتى.

ساپتا جۇرگەن سەرجانتتىڭ قاتاردان شىعىپ قالعانىنا 2016 جىلدىڭ ماۋسىمىنداعى تەراكت سەپ بولدى. سول كۇنگى وقيعا الىبەكتىڭ ءالى كوز الدىندا. پاترۋلدىك پوليسياعا «پاللادا» قارۋ-جاراق دۇكەنىنە ءبىر توپ قارۋلانعان ادام شابۋىل جاساعانى تۋرالى حابار جەتەدى. وقيعا ورنىنا ءبىرىنشى بولىپ جەتكەندەردىڭ اراسىندا وسى الىبەك تە بار ەدى. 

«ەڭ ءبىرىنشى بولىپ باردىق، سول كەزدە ءبىر توپ ادام شىعىپجاتقان كەزدە ءبىز الدارىنان كەزدەسىپ قالدىق. سول كەزدە اتىس بولىپ، ىشىمنەن، قولىمنان جاراقات الدىم. 7-8 دروب قالدى، ونى الۋ نە بولماي تۇر، ۋاقتىمەن دەنەنىڭ ۇستىنە شىعادى" دەدى الىبەك جەتىعارين.

سودىرلاردىڭ سويقانىنان جاراقات العان ءتارتىپ ساقشىسى ۇزاق ەمدەلگەن. الايدا، العان جاراقاتىنان وڭ جاق قولى جانسىزدانىپ قالىپتى. كەيىن مۇگەدەكتىك بەرىپ، جۇمىستان بوساعان. ءوزى قىزمەت ەتكەن مەكەمەگە كەرەك بولماي قالعانىنا رەنجىگەن جاس جىگىت كەيىن سوتقا شاعىمدانادى. وسى تۇسىنىسپەۋشىلىكتىڭ بارلىعى نەدەن تۋىنداعانىن بۇگىن ايماقتىڭ باس پوليسەيى ءوزى ايتىپ بەردى. 

ماحامبەت ءابيساتوۆ، وبلىستىق پوليسيا دەپارتامەنتىنىڭ باسشىسى: «2018 جىلدىڭ قاراشاسىندا دەنساۋلىق جاعدايىنا بايلانىستى جۇمىستان بوساتىلدى. كەيىن انىقتاعانىمدا بۇل مەن ەڭبەك دەمالىسىندا جۇرگەندە بولعان جاعداي ەكەنىن ءبىلدىم. ءبىراق ول تۋرالى ماعان ەشكىم بايانداماعان. ءبىز مىنا ءقازىر كورسەتىپ جاتقان قۇرمەتتىڭ ءبارىن سول كەزدە جاساۋعا ءتيىس ەدىك. سوندىقتان، شەشىم قابىلداپ، ولقىلىق جىبەرگەن ەكى ادام قىزمەتىنەن بوساتىپ، ءبىرقاتار باسقارما باسشىلار مەنىڭ بۇيرىعىممەن جازالارىن الدى ».

الىبەك قىزمەتتىك پاتەر بولسا دا، باسپانالى بولعانىنا ريزا. جاقسى جاڭالىقتى ەڭ اۋەلى اتا- اناما، كەلىنشەگىمە ايتتىم دەيدى. جاس وتباسىنىڭ 4 جاسار قىزى بار ەكەن، كەلىنشەگى ەكىنشىسىنە جۇكتى.

الىبەك جەتىعارين: «قۋانىشتىمىن پاتەر العانىما. اكە-شەشەم، كەلىنشەگىم كوردى. ۇنادى ولارعا دا. 2 بولمەلى، 60 شارشى مەتر. بىزگە جەتەدى دەپ ويلايمىن. ءبارى جاقسى، كىشىگىرىم رەمونت جاساۋ كەرەك.»

پوليسيا دەپارتامەنتىنىڭ باسشىسى الىبەككە قىزمەتتىك پاتەردە قالاعانىڭشا تۇرا بەر دەپ جومارتتىق تانىتتى. ودان بولەك، ارىپتەستەرى كومەك رەتىندە ءبىر كۇندىك جالاقىلارىن اۋدارعان. جانە الىبەك جەتىعارينگە وسى ۋاقىتقا دەيىن الىپ وتىرعان جالاقىسىنىڭ 50 پايىزىن اي سايىن اۋداراتىن بولدى.

 ۇسىنعان: فاريزا جومارت قىزى