الماتىدا بىرنەشە الەۋمەتتىك كومەكتىڭ مولشەرى كوبەيەدى دەپ حابارلايدى Qamshy.kz اقپارات اگەنتتىگى Almaty.tv سايتىنىڭ دەرەگىن نەگىزگە الىپ. 

بۇگىن قالالىق ءماسليحاتتىڭ كەزەكتى سەسسياسىندا الەۋمەتتىك كومەك، تۇرعىن ءۇي كومەگى جانە مۇگەدەك بالالاردى ۇيدە وقىتۋعا ارنالعان جاردەماقىلاردى بىرنەشە ەسەگە كوبەيتۋ تۋرالى ۇسىنىستار ايتىلدى. ياعني، جان باسىنا شاققاندا تابىسى كۇنكورىس دەڭگەيىنىڭ ەكى ەسە مولشەرىنەن اسپايتىن از قامتىلعان ازاماتتارعا كورسەتىلەتىن كومەك 50 مىڭ 500 تەڭگەگە دەيىن ارتتىرۋ كوزدەلسە، «باقىتتى وتباسى» باعدارلاماسى اياسىندا وتباسى شىعىنىنىڭ شەكتى دەڭگەيىن 10 پايىزدان بەس پايىزعا دەيىن تومەندەتۋ قاراستىرىلعان. ال مۇگەدەك بالالاردى ۇيدە وقىتاتىن وتباسىعا توقسان سايىن بەرىلەتىن جاردەماقىنى 30 مىڭ تەڭگەگە دەيىن ارتتىرۋ جوسپارلانۋدا.

«وتكەن جىلى جاردەماقى 800 بالاعا تولەندى. بيىل دا وسى 800 بالانى قامتۋدى جوسپارلاپ وتىرمىز. بۇل جاردەماقىنى الۋ ءۇشىن قوسىمشا 11،4 ملن تەڭگە ءبولىنىپ وتىر. ايتىلعان ءۇش الەۋمەتتىك كومەكتىڭ ۇشەۋى دە بۇرىننان بار، بۇل جاڭالىق ەمەس. تەك ولاردى الاتىن ادامداردىڭ سانى مەن كومەكتىڭ كولەمى عانا ارتىپ وتىر»، - دەيدى الماتى قالاسى الەۋمەتتىك ءال-اۋقات باسقارماسىنىڭ باسشىسى راحات شيماشيەۆا.

ۇسىنعان: اسەل بولات قىزى