نيدەرلاندتاعى ۋترەحت قالاسىندا جولدا كەتىپ بارا جاتقان ترامۆايعا بەلگىسىز بىرەۋ وق اتقان. وقيعا 18 ناۋرىزدا بولدى. AFP فرانسۋزدىق باسىلىمىنىڭ مالىمەتىنشە، بىرنەشە ادام جارالاندى، ءبىر ادام قايتىس بولدى.

وق اتقان ادام وقيعا ورنىنان ءىزىن سۋىتىپ ۇلگەردى. الايدا كوپ ۇزاماي قىلمىسكەر ۇستالدى. انىقتالعانداي جولاۋشىلارعا وق اتقان 37 جاستاعى تۇركيا تۋماسى – گەكمان تانيس. بۇل تۋرالى جۋرناليستەرگە جەرگىلىكتى پوليسيا باسشىسى روب ۆان برەە حابارلاعان. گەكمان ءتانيستىڭ قاي جەردە تۇتقىندالعانى ازىرگە بەلگىسىز.

وق جەرگىلىكتى ۋاقىتپەن ساناعاندا 10:45-تە قالانىڭ وڭتۇستىگىندەگى 24oktoberplein ايالداماسىندا اتىلعان. پوليسيا وقيعانى «تەراكت بولۋى مۇمكىن» دەپ بولجاپ وتىر، الايدا رەسمي دەرەك ناقتىلانبادى.

Utrecht Internet Courant (DUIC) باسىلىمى وقيعا ورنىنا ۆيدەو جاريالادى.

«قانداي دا ءبىر سەبەبى بولدى ما، بىلمەدىم. جارالانعان بىرنەشە ادامدى كوردىم، ترامۆايدىڭ ىشىندە دە، سىرتىندا دا...»، - دەدى كۋاگەردىڭ ءبىرى.

كەلەسى ءبىر كۋاگەردىڭ ايتقانى  NOS ارناسى جاريالادى: «ترامۆايدان جارالانعان ايەل اتىپ شىقتى، كەۋدەسى، قولى، كيىمى قانعا بويالعان، قۇلاپ ءتۇستى. مەن ونى كولىگىمە اكەلىپ، كومەكتەسپەك بولدىم. پوليسيا كەلگەندە، ەس-تۇسسىز جاتقان».

قازىرگى ۋاقىتتا وقيعا ورنىندا تەرگەۋ جۇرگىزىلىپ جاتىر. مەكتەپتەردىڭ ەسىگى جابىلىپ، ادامدارعا كوشەگە شىقپاۋعا كەڭەس بەرىلدى.

قىلمىسكەر تۋرالى...

ۋترەحت قالاسىنىڭ قۇقىق قورعاۋ ورگانى تۆيتتەردە شابۋىل جاساعان ادامنىڭ سۋرەتىن جاريالادى.

ول بۇدان بۇرىن دا بىرنەشە مارتە ۇستالعان كورىنەدى. جەرگىلىكتى بيزنەسمەن بي-بي -سي تىلشىسىنە گەكماننىڭ يگيل تەرروريستىك ۇيىمىنا قاتىسى بولعاندىعىن ايتتى. سول ءۇشىن پوليسيا ونى ۇستاپ، كوپ ۇزاماي بوساتىپ جىبەرگەن.

دايىنداعان: گۇلىم جاقان